ന്യൂഡൽഹി: കാനഡയും ഇന്ത്യയും തമ്മിലുള്ള സ്വതന്ത്ര വ്യാപാര കരാർ (FTA) സംബന്ധിച്ച ചർച്ചകൾ സർക്കാർ തലത്തിൽ വീണ്ടും സജീവമാകുന്നതായി കാനഡയുടെ ധനകാര്യ മന്ത്രി ഫ്രാൻസ്വാ-ഫിലിപ്പ് ഷാംപെയിൻ. പ്രധാനമന്ത്രി മാർക്ക് കാർണിയുടെ ഇന്ത്യ സന്ദർശനത്തോടനുബന്ധിച്ച് ഒരു പ്രമുഖ വിദേശ മാധ്യമത്തിന് നൽകിയ അഭിമുഖത്തിലാണ് ഇരുരാജ്യങ്ങളും തമ്മിലുള്ള സാമ്പത്തിക ബന്ധം മെച്ചപ്പെടുത്തുന്നതിനെക്കുറിച്ച് അദ്ദേഹം വ്യക്തമാക്കിയത്.
പത്തു വർഷം മുമ്പ് താൻ വ്യാപാര മന്ത്രിയായിരുന്ന കാലത്ത് ആരംഭിച്ച ചർച്ചകൾ നിലവിൽ വേഗത്തിൽ പൂർത്തിയാക്കാനാണ് കാനഡ ആഗ്രഹിക്കുന്നതെന്ന് ഷാംപെയിൻ പറഞ്ഞു. കഴിഞ്ഞ കുറച്ചു വർഷങ്ങളായി ഇരുരാജ്യങ്ങളും തമ്മിൽ നിലനിന്നിരുന്ന നയതന്ത്ര തർക്കങ്ങൾ പരിഹരിക്കാനും ബന്ധം പുനഃക്രമീകരിക്കാനുമുള്ള ശ്രമങ്ങളുടെ ഭാഗമായാണ് ഈ നീക്കം. ഇന്ത്യയുമായുള്ള സമഗ്ര സാമ്പത്തിക പങ്കാളിത്ത കരാർ (CEPA) സംബന്ധിച്ച ചർച്ചകൾ തുടരാൻ പ്രധാനമന്ത്രി നരേന്ദ്ര മോദിയും പ്രധാനമന്ത്രി മാർക്ക് കാർണിയും നേരത്തെ ധാരണയിലെത്തിയിരുന്നു. ഇന്ത്യയെ വിശ്വസനീയമായ വ്യാപാര പങ്കാളിയായാണ് കാനഡ കാണുന്നതെന്ന് കാർണിയും മുൻപ് വ്യക്തമാക്കിയിട്ടുണ്ട്.
ആഗോള സാമ്പത്തിക സാഹചര്യങ്ങൾ മാറിയ പശ്ചാത്തലത്തിൽ ഇന്ത്യയുമായുള്ള സഹകരണം കാനഡയ്ക്ക് ഏറെ ഗുണകരമാകുമെന്ന് മന്ത്രി ചൂണ്ടിക്കാട്ടി. ഭക്ഷ്യസുരക്ഷ, ഊർജം, നിർണായക ധാതുക്കൾ, കൃത്രിമ ബുദ്ധി (AI) എന്നീ മേഖലകളിൽ ഇന്ത്യയുമായുള്ള പങ്കാളിത്തം ഇരുരാജ്യങ്ങൾക്കും വലിയ നേട്ടമുണ്ടാക്കും. ജി7 രാജ്യങ്ങളായ യുകെയും ഫ്രാൻസും ഇന്ത്യയുമായി പുലർത്തുന്ന അടുത്ത ബന്ധം ഉദാഹരണമായി കാട്ടിയ അദ്ദേഹം, ഇന്ത്യ ഒരു ആഗോള സാമ്പത്തിക ശക്തിയായി വളരുന്നത് കണക്കിലെടുത്ത് നിർമ്മാണാത്മകമായ ഇടപെടലുകൾ നടത്താനാണ് കാനഡയുടെ തീരുമാനമെന്നും കൂട്ടിച്ചേർത്തു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/KdmCA708iUa8aT1Ocx1qs1?mode=gi_t
India-Canada free trade agreement talks resume; agreement to strengthen economic ties
