ഒന്റാറിയോ: കാനഡയിലെ പ്രമുഖ കമ്പനികളുടെ സി.ഇ.ഒമാരും സാധാരണ തൊഴിലാളികളും തമ്മിലുള്ള വരുമാനത്തിൽ വൻ വർദ്ധനവുണ്ടായതായി റിപ്പോർട്ട്. രാജ്യത്തെ ഏറ്റവും ഉയർന്ന ശമ്പളം വാങ്ങുന്ന 100 സി.ഇ.ഒമാരും, ഒരു സാധാരണ തൊഴിലാളിയും ഒരു വർഷം കൊണ്ട് സമ്പാദിക്കുന്ന തുക വെറും എട്ട് മണിക്കൂർ കൊണ്ട് നേടിയെടുക്കുന്നതായാണ് പുതിയ കണക്കുകൾ വ്യക്തമാക്കുന്നത്. പ്രമുഖ ഗവേഷണ സ്ഥാപനമായ കനേഡിയൻ സെന്റർ ഫോർ പോളിസി ആൾട്ടർനേറ്റീവ്സ് (CCPA) പുറത്തുവിട്ട റിപ്പോർട്ടിലാണ് ഈ വിവരങ്ങളുള്ളത്.
റിപ്പോർട്ട് പ്രകാരം, കാനഡയിലെ ഒരു ശരാശരി തൊഴിലാളിയുടെ വാർഷിക വരുമാനം 65,548 ഡോളറാണ്. എന്നാൽ മുൻനിര സി.ഇ.ഒമാരുടെ ശരാശരി വാർഷിക വരുമാനം 16.2 മില്യൺ ഡോളറിലെത്തി. ഇത് ഒരു സാധാരണ തൊഴിലാളിയുടെ വരുമാനത്തേക്കാൾ 248 മടങ്ങ് കൂടുതലാണ്. 2022-ൽ ഇത് 246 മടങ്ങായിരുന്നു. 2020-ന് ശേഷം സി.ഇ.ഒമാരുടെ ശമ്പളത്തിൽ 49 ശതമാനം വർദ്ധനവുണ്ടായപ്പോൾ തൊഴിലാളികളുടെ വേതനത്തിൽ 15 ശതമാനം വർദ്ധനവ് മാത്രമാണ് ഉണ്ടായത്.
സി.ഇ.ഒമാരുടെ അടിസ്ഥാന ശമ്പളത്തിൽ കഴിഞ്ഞ പത്ത് വർഷമായി വലിയ മാറ്റമില്ലെങ്കിലും ബോണസ് ഇനത്തിലാണ് വരുമാനം കുതിച്ചുയരുന്നത്. സി.ഇ.ഒ വരുമാനത്തിന്റെ 84 ശതമാനവും ക്യാഷ് ബോണസ്, സ്റ്റോക്ക് അവാർഡുകൾ എന്നിവയിൽ നിന്നാണ് ലഭിക്കുന്നത്. മുൻകാലങ്ങളിൽ സി.ഇ.ഒമാരെ വെറും മാനേജർമാരായി കണ്ടിരുന്ന സ്ഥാനത്ത് ഇന്ന് വലിയ ആനുകൂല്യങ്ങൾ നൽകേണ്ട ‘സൂപ്പർ സ്റ്റാറുകളായാണ്’ കമ്പനികൾ കണക്കാക്കുന്നതെന്ന് റിപ്പോർട്ട് തയ്യാറാക്കിയ ഡേവിഡ് മക്ഡൊണാൾഡ് ചൂണ്ടിക്കാട്ടി.
2020 മുതൽ 2025 വരെയുള്ള കാലയളവിൽ ഉൽപ്പന്നങ്ങളുടെ വിലയിൽ 18 ശതമാനം വർദ്ധനവുണ്ടായി. എന്നാൽ ഇതേ കാലയളവിൽ തൊഴിലാളികളുടെ വേതനം 15 ശതമാനം മാത്രമാണ് വർദ്ധിച്ചത്. ഇത് പ്രായോഗികമായി തൊഴിലാളികൾക്ക് മൂന്ന് ശതമാനം വരുമാന നഷ്ടമുണ്ടാക്കിയതായി റിപ്പോർട്ട് വിലയിരുത്തുന്നു. കോർപ്പറേറ്റ് ലാഭം വർദ്ധിക്കുമ്പോഴും അതിന്റെ ഗുണം താഴെത്തട്ടിലുള്ളവർക്ക് ലഭിക്കുന്നില്ലെന്ന ആക്ഷേപം ശക്തമാണ്.
സമ്പന്നരായ സി.ഇ.ഒമാർക്ക് സർക്കാർ നയരൂപീകരണത്തിലും നികുതി നിയമങ്ങളിലും വലിയ സ്വാധീനം ചെലുത്താൻ കഴിയുന്നുണ്ടെന്ന് യുണിഫോർ നാഷണൽ പ്രസിഡന്റ് ലാന പെയ്ൻ പറഞ്ഞു. ഓഹരി വിപണിയിൽ നിന്നുള്ള വരുമാനത്തിന് കുറഞ്ഞ നികുതി നിരക്ക് മാത്രം നൽകിയാൽ മതിയെന്ന നിയമം ഇതിന് ഉദാഹരണമാണ്. തൊഴിലാളികൾ തങ്ങളുടെ മുഴുവൻ വരുമാനത്തിനും നികുതി നൽകുമ്പോൾ, കോർപ്പറേറ്റുകൾക്ക് ഇളവുകൾ ലഭിക്കുന്നത് ജനാധിപത്യപരമായ സാമ്പത്തിക വ്യവസ്ഥയ്ക്ക് ഭീഷണിയാണെന്നും റിപ്പോർട്ട് മുന്നറിയിപ്പ് നൽകുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
15% for workers, 49% for CIOs! Income inequality is rising in Canada
