ലോയ്ഡ്മിൻസ്റ്റർ (സാസ്കചെവാൻ): കാനഡയിലെ പുതിയ കുടിയേറ്റ നിയന്ത്രണങ്ങളും താത്കാലിക വിദേശ തൊഴിലാളി പദ്ധതിയിലെ വെട്ടിച്ചുരുക്കലുകളും കാരണം സാസ്കചെവാനിലെ ഒരു ഇന്ത്യൻ റെസ്റ്റോറന്റ് അടച്ചുപൂട്ടലിന്റെ വക്കിൽ. ഇന്ത്യൻ വിഭവങ്ങൾക്ക് പേരുകേട്ട ലോയ്ഡ്മിൻസ്റ്ററിലെ ‘ഇന്ത്യൻ കിച്ചൺ’ എന്ന സ്ഥാപനമാണ് ജീവനക്കാരുടെ അഭാവം മൂലം പ്രതിസന്ധിയിലായിരിക്കുന്നത്. വിദഗ്ദ്ധരായ രണ്ട് ഷെഫുമാർക്ക് വർക്ക് പെർമിറ്റ് നഷ്ടമാകുന്നതോടെ റെസ്റ്റോറന്റ് പൂട്ടേണ്ടി വരുമെന്ന് ഉടമ രവീന്ദർ കൗർ പറയുന്നു.
റെസ്റ്റോറന്റ് അടച്ചുപൂട്ടേണ്ട സ്ഥിതിയാണ്. നിലവിലുള്ള രണ്ട് ഷെഫുമാരെ അധികം ജോലിഭാരം ഏൽപ്പിക്കാതിരിക്കാൻ തങ്ങൾ ഇപ്പോൾ നേരത്തെ അടയ്ക്കുകയാണ്. തന്റെ സ്വപ്നം ഉപേക്ഷിക്കേണ്ടി വരുമെന്ന് തോന്നുന്നുവെന്ന് രവീന്ദർ കൗർ വെളിപ്പെടുത്തി. വർഷങ്ങളായി കാനഡയിൽ താമസിച്ച് നികുതി അടച്ച് ജോലി ചെയ്യുന്നവരാണ് റെസ്റ്റോറന്റിലെ പ്രധാന ഷെഫുമാരായ അരവിന്ദ് കൈൻതുരയും, ഭൂപേന്ദ്ര റാവത്തും. കൈൻതുരയുടെ വർക്ക് പെർമിറ്റ് ഒക്ടോബറിൽ അവസാനിച്ചു, റാവത്തിന്റേത് ജനുവരിയിൽ അവസാനിക്കും.
നീണ്ട ഏഴ് വർഷത്തിലധികം കാനഡയിൽ ജോലി ചെയ്തിട്ടും വർക്ക് പെർമിറ്റ് നീട്ടി നൽകുന്നതിനുള്ള അപേക്ഷകൾക്ക് പുരോഗതിയില്ലാത്തത് ഇവരെ ആശങ്കയിലാഴ്ത്തിയിട്ടുണ്ട്. വർക്ക് പെർമിറ്റ് പുതുക്കിയില്ലെങ്കിൽ ജനുവരിയിൽ ഇന്ത്യയിലേക്ക് മടങ്ങേണ്ടിവരുമെന്ന് കൈൻതുര പറയുന്നു. കാൻസർ രോഗബാധിതനായ ഷെഫ് ഭൂപേന്ദ്ര റാവത്തിന്, വർക്ക് പെർമിറ്റ് നഷ്ടപ്പെടുന്നത് തന്റെ ചികിത്സയ്ക്കും ആശ്രിതരായ കുട്ടികളുടെ വിദ്യാഭ്യാസത്തിനും പ്രതിസന്ധിയുണ്ടാക്കുമോ എന്ന ഭയമുണ്ട്.
“വർക്ക് പെർമിറ്റ് കാലഹരണപ്പെട്ടാൽ കുട്ടികൾക്ക് വിദ്യാഭ്യാസം തുടരാൻ കഴിയില്ലെന്ന് സ്കൂളിൽ നിന്ന് അറിയിപ്പ് ലഭിച്ചിട്ടുണ്ടെന്ന് അദ്ദേഹം പറഞ്ഞു. കാനഡയിൽ വളർന്ന റാവത്തിന്റെ മൂന്ന് കുട്ടികളിൽ ഒരാളായ 12 വയസ്സുകാരി ഋധിമ, ഇവിടെ പഠിച്ച് അഭിഭാഷകയാകാൻ ആഗ്രഹിക്കുന്നയാളാണ്.
റെസ്റ്റോറന്റ് നിലനിർത്താൻ കൗർ നിരവധി തൊഴിലവസരങ്ങൾ നൽകിയിട്ടും ആധികാരിക ഇന്ത്യൻ വിഭവങ്ങൾ തയ്യാറാക്കാൻ ആവശ്യമായ പരിശീലനം ലഭിച്ച ഒരാളെപ്പോലും കണ്ടെത്താൻ സാധിച്ചില്ല. നൂറിലധികം അപേക്ഷകൾ ലഭിച്ചെങ്കിലും ആവശ്യമായ വൈദഗ്ധ്യമുള്ളവർ ആരുമുണ്ടായിരുന്നില്ല. ഷെഫുമാരെ നഷ്ടപ്പെട്ടാൽ റെസ്റ്റോറന്റിന്റെ വാടകയും മറ്റ് ചെലവുകളും വഹിക്കാൻ സാധിക്കാതെ വരുമെന്ന ആശങ്കയിലാണ് കൗർ.
കനേഡിയൻ ഫെഡറേഷൻ ഓഫ് ഇൻഡിപെൻഡന്റ് ബിസിനസ് (CFIB) റിപ്പോർട്ട് അനുസരിച്ച്, സമാനമായ തൊഴിലാളി ക്ഷാമം കാനഡയിലെമ്പാടുമുള്ള ചെറുകിട സ്ഥാപനങ്ങളെ ബാധിക്കുന്നുണ്ട്. വിദഗ്ദ്ധരായ തൊഴിലാളികളെ ആശ്രയിക്കുന്ന അഞ്ചിൽ ഒരു ബിസിനസ്സ് അടച്ചുപൂട്ടൽ ഭീഷണി നേരിടുന്നുണ്ടെന്ന് CFIB-യുടെ ദേശീയ കാര്യ ഡയറക്ടർ ക്രിസ്റ്റീന സാന്റിനി വ്യക്തമാക്കി.
വിദേശ തൊഴിലാളികളെ നഷ്ടപ്പെടുന്നത് കനേഡിയൻ പൗരന്മാർക്കുള്ള ജോലികൾ കുറയ്ക്കുന്നതിനും ഉപഭോക്താക്കൾക്ക് ലഭിക്കുന്ന സേവനങ്ങളിൽ കാലതാമസം വരുത്തുന്നതിനും കാരണമായേക്കാം. ജീവിതം കാനഡയിൽ ഉറപ്പിച്ച തൊഴിലാളികളെയും അവരെ ആശ്രയിക്കുന്ന സമൂഹങ്ങളെയും സർക്കാർ പരിഗണിക്കണമെന്ന് രവീന്ദർ കൗർ പറയുന്നു.
immigration-canada-business-indian-restaurant-work-permit
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
