മാഡ്രിഡ്/റോം: അനധികൃത കുടിയേറ്റത്തെച്ചൊല്ലിയുള്ള തർക്കം രൂക്ഷമായതോടെ ഇറ്റലിയിൽ നിന്നുള്ള വിമാനങ്ങളിലും കപ്പലുകളിലും എത്തുന്ന യാത്രക്കാർക്ക് കശനമായ അതിർത്തി നിയന്ത്രണങ്ങൾ ഏർപ്പെടുത്താൻ സ്പെയിൻ തീരുമാനിച്ചു. ശനിയാഴ്ച അർദ്ധരാത്രി മുതൽ സെപ്റ്റംബർ 7 വരെയാണ് പുതിയ നിയന്ത്രണങ്ങൾ പ്രാബല്യത്തിലുണ്ടാകുക. ഇറ്റലിയിൽ നിന്നുള്ള പ്രവാഹം വർദ്ധിച്ച സാഹചര്യത്തിൽ ഇറ്റാലിയൻ പൗരന്മാർക്കും മറ്റ് രാജ്യങ്ങളിൽ നിന്നുള്ള യാത്രക്കാർക്കും പാസ്പോർട്ട്, ദേശീയത, വിസ പരിശോധനകൾ നിർബന്ധമാക്കുമെന്ന് സ്പാനിഷ് ഭരണകൂടം അറിയിച്ചു.
മൊറോക്കോയുമായി അതിർത്തി പങ്കിടുന്ന സ്പാനിഷ് എൻക്ലേവായ സെവൂത്തയിലേക്ക് ജൂലൈ 30-ന് 72,000-ത്തോളം അനധികൃത കുടിയേറ്റക്കാർ കൂട്ടത്തോടെ ഇരച്ചുകയറിയിരുന്നു. ഇതിനെത്തുടർന്ന് സ്പെയിനിൽ നിന്നുള്ള യാത്രക്കാർക്ക് ഇറ്റലി കടുത്ത അതിർത്തി നിയന്ത്രണങ്ങൾ ഏർപ്പെടുത്തിയിരുന്നു. ഇതിനുള്ള മറുപടിയായാണ് ഇപ്പോൾ സ്പെയിനും സമാനമായ തിരിച്ചടി നടപടികളിലേക്ക് കടന്നിരിക്കുന്നത്.
സ്പെയിനിൽ നിന്നുള്ള ഭീഷണികൾക്കോ ആജ്ഞകൾക്കോ വഴങ്ങില്ലെന്നും ഓഗസ്റ്റ് 15 വരെ അതിർത്തി നിയന്ത്രണങ്ങൾ തുടരുമെന്നും ഇറ്റലി വെള്ളിയാഴ്ച വ്യക്തമാക്കിയിരുന്നു.
ഏർപ്പെടുത്തിയ നിയന്ത്രണങ്ങൾ ഞായറാഴ്ചയ്ക്കകം പിൻവലിച്ചില്ലെങ്കിൽ തിരിച്ചടിയെന്നോണമുള്ള നടപടികൾ സ്വീകരിക്കുമെന്ന് സ്പെയിൻ നേരത്തെ മുന്നറിയിപ്പ് നൽകിയിരുന്നു. എന്നാൽ ഈ അന്ത്യശാസനം ഇറ്റലി തള്ളുകയായിരുന്നു.
സുരക്ഷാ ഭീഷണികളോ ഭീകരവാദ സാധ്യതകളോ ഇല്ലെന്നും, പുതിയ കുടിയേറ്റ തരംഗമോ യൂറോപ്യൻ പ്രദേശങ്ങളിലേക്ക് കടക്കാൻ ശ്രമിക്കുന്ന അനധികൃത കുടിയേറ്റക്കാരോ ഇല്ലെന്ന് ഉറപ്പായാൽ മാത്രമേ തീരുമാനത്തിൽ മാറ്റമുണ്ടാകൂ എന്ന് ഇറ്റാലിയൻ ഭരണകൂടം പ്രസ്താവനയിലൂടെ വ്യക്തമാക്കി. ഇതോടെ ഇരു യൂറോപ്യൻ രാജ്യങ്ങൾക്കുമിടയിൽ കുടിയേറ്റ വിഷയത്തെച്ചൊല്ലിയുള്ള നയതന്ത്ര തർക്കം കൂടുതൽ സങ്കീർണ്ണമായിരിക്കുകയാണ്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Illegal immigration dispute: Spain imposes border controls on travelers from Italy
