ഒട്ടാവ: ലോകകപ്പ് ഫുട്ബോൾ ടൂർണമെന്റിന് ആതിഥേയത്വം വഹിക്കാൻ കാനഡ ഒരുങ്ങുന്നതിനിടെ രാജ്യത്ത് മനുഷ്യക്കടത്ത് ഭീഷണി വർധിക്കുമെന്ന് ഫെഡറൽ സാമ്പത്തിക ഇന്റലിജൻസ് ഏജൻസിയുടെ മുന്നറിയിപ്പ്. വലിയ കായികമേളകൾ മനുഷ്യക്കടത്തുകാർക്ക് കൂടുതൽ അവസരങ്ങൾ സൃഷ്ടിക്കാമെന്നും ദുർബലരായ ആളുകൾ ചൂഷണത്തിനിരയാകാൻ സാധ്യതയുണ്ടെന്നും കാനഡയുടെ ഫിനാൻഷ്യൽ ട്രാൻസാക്ഷൻസ് ആൻഡ് റിപ്പോർട്സ് അനാലിസിസ് സെന്റർ ഓഫ് കാനഡ വ്യക്തമാക്കുന്നു. ജൂൺ 11 മുതൽ ജൂലൈ 19 വരെ കാനഡ, മെക്സിക്കോ, അമേരിക്ക എന്നിവ ചേർന്നാണ് ലോകകപ്പിന് ആതിഥേയത്വം വഹിക്കുന്നത്. ടൊറന്റോ, വാങ്കൂവർ എന്നീ നഗരങ്ങളിലായി 13 മത്സരങ്ങളാണ് കാനഡയിൽ നടക്കുക.
ലക്ഷക്കണക്കിന് വിദേശ സന്ദർശകർ എത്തുന്നതോടെ താമസസൗകര്യങ്ങൾ, നൈറ്റ് ലൈഫ്, വിനോദം എന്നിവയ്ക്കുള്ള ആവശ്യകത ഉയരുമെന്നും ഇത് ലൈംഗിക ചൂഷണത്തിന് കാരണമാകുമെന്നും ഏജൻസി ചൂണ്ടിക്കാട്ടുന്നു. ഓൺലൈൻ എസ്കോർട്ട് പ്ലാറ്റ്ഫോമുകൾ, സോഷ്യൽ മീഡിയ എന്നിവ വഴി ഇത്തരം നിയമവിരുദ്ധ പ്രവർത്തനങ്ങൾ പ്രോത്സാഹിപ്പിക്കപ്പെടാൻ സാധ്യതയുണ്ട്. കൂടാതെ ഹോസ്പിറ്റാലിറ്റി, നിർമാണം, സുരക്ഷാ മേഖലകളിലെ വർധിച്ച തൊഴിൽ ആവശ്യകത മുൻനിർത്തി നിർബന്ധിത തൊഴിൽ ചൂഷണവും വർധിച്ചേക്കാം. കഴിഞ്ഞ 2024-25 വർഷങ്ങളിൽ മനുഷ്യക്കടത്തുമായി ബന്ധപ്പെട്ട 316 സംശയാസ്പദമായ സാമ്പത്തിക ഇടപാടുകളുടെ വിവരങ്ങൾ ഫിൻട്രാക്ക് സുരക്ഷാ ഏജൻസികൾക്ക് കൈമാറിയിരുന്നു.
മനുഷ്യക്കടത്തുമായി ബന്ധപ്പെട്ട സംശയാസ്പദമായ സാമ്പത്തിക ഇടപാടുകൾ കണ്ടെത്തുന്നതിനായി ബാങ്കുകൾ, ക്രെഡിറ്റ് യൂണിയനുകൾ, കാസിനോകൾ എന്നിവ ജാഗ്രത പാലിക്കണമെന്ന് ഔദ്യോഗിക നിർദ്ദേശമുണ്ട്. ഹോട്ടലുകളിലും ഹോംസ്റ്റേകളിലും നടത്തുന്ന വലിയ പണമിടപാടുകളും, രാത്രികാലങ്ങളിൽ എടിഎമ്മുകളിൽ (ATM) നിന്ന് അസാധാരണമായ രീതിയിൽ പണം പിൻവലിക്കുന്നതും കർശനമായി നിരീക്ഷിക്കും. സംശയാസ്പദമായ ഇടപാടുകൾ ശ്രദ്ധയിൽപ്പെട്ടാൽ പ്രവർത്തനത്തിന്റെ സ്വഭാവം വ്യക്തമാക്കുന്ന വിവരങ്ങൾ സഹിതം ഉടൻ റിപ്പോർട്ട് ചെയ്യണമെന്ന് ഫിൻട്രാക്ക് ധനകാര്യ സ്ഥാപനങ്ങൾക്ക് കർശന നിർദ്ദേശം നൽകി. ഇത്തരത്തിൽ ലഭിക്കുന്ന വിവരങ്ങൾ കനേഡിയൻ സെക്യൂരിറ്റി ഇന്റലിജൻസ് സർവീസ് (CSIS), ആർ.സി.എം.പി (RCMP) ഉൾപ്പെടെയുള്ള അന്വേഷണ ഏജൻസികൾക്ക് കൈമാറുമെന്ന് അധികൃതർ അറിയിച്ചു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Human trafficking threat in Canada during World Cup excitement; Intelligence agency issues warning, strict instructions to financial institutions
