ഒട്ടാവ: കാനഡയിൽ 16 വയസ്സിൽ താഴെയുള്ള കുട്ടികൾക്ക് സോഷ്യൽ മീഡിയ പ്ലാറ്റ്ഫോമുകളും AI ചാറ്റ്ബോട്ടുകളും ഉപയോഗിക്കുന്നതിന് കർശന നിയന്ത്രണം വേണമെന്ന് ഭൂരിഭാഗം ജനങ്ങളും ആവശ്യപ്പെടുന്നതായി പുതിയ സർവേ റിപ്പോർട്ട്. ലെഗർ (Leger) നടത്തിയ സർവേയിലാണ് പൗരന്മാർ തങ്ങളുടെ ആശങ്ക വ്യക്തമാക്കിയത്.
കുട്ടികളിലും കൗമാരക്കാരിലും ഇത്തരം സാങ്കേതികവിദ്യകൾ ഉണ്ടാക്കുന്ന ദോഷഫലങ്ങളെക്കുറിച്ച് 80 ശതമാനത്തിലധികം ആളുകൾ ആശങ്ക പ്രകടിപ്പിച്ചു. ഇതേത്തുടർന്ന് ഇൻസ്റ്റഗ്രാം, ടിക്ടോക്ക് തുടങ്ങിയ സോഷ്യൽ മീഡിയകൾക്ക് പ്രായപരിധി നിശ്ചയിക്കുന്നതിനെ 70 ശതമാനം പേരും, ചാറ്റ് ജിപിറ്റി (ChatGPT) പോലുള്ള AI സംവിധാനങ്ങൾക്ക് നിയന്ത്രണം കൊണ്ടുവരുന്നതിനെ 69 ശതമാനം പേരും പിന്തുണച്ചു.
സോഷ്യൽ മീഡിയ നിയന്ത്രണങ്ങൾ നടപ്പിലാക്കുന്നത് ഫെഡറൽ സർക്കാരിന്റെ ഉത്തരവാദിത്തമായിരിക്കണമെന്ന് സർവേയിൽ പങ്കെടുത്ത 55 ശതമാനം പേർ അഭിപ്രായപ്പെട്ടു. നിലവിൽ കനേഡിയൻ സർക്കാർ ‘ഓൺലൈൻ ഹാർംസ് ബിൽ’ (Online Harms Bill) കൊണ്ടുവരാനുള്ള തയ്യാറെടുപ്പിലാണ്. ഇതിൽ ആർട്ടിഫിഷ്യൽ ഇന്റലിജൻസ് ചാറ്റ്ബോട്ടുകളെ കൂടി ഉൾപ്പെടുത്തുന്ന കാര്യം സർക്കാർ പരിഗണിക്കുന്നുണ്ടെന്ന് സാംസ്കാരിക മന്ത്രി മാർക്ക് മില്ലർ സൂചിപ്പിച്ചു. കുട്ടികൾക്ക് സോഷ്യൽ മീഡിയ വിലക്കുന്നതുമായി ബന്ധപ്പെട്ട് മാനിറ്റോബ പ്രീമിയർ വാബ് കിന്യൂ പ്രഖ്യാപിച്ച നടപടികൾക്ക് പിന്നാലെയാണ് ദേശീയതലത്തിൽ ചർച്ചകൾ സജീവമായത്. കഴിഞ്ഞ ഡിസംബറിൽ ഓസ്ട്രേലിയ ഇത്തരം നിയമം നടപ്പിലാക്കിയതും കാനഡയിലെ പൊതുവികാരത്തെ സ്വാധീനിച്ചിട്ടുണ്ട്.
അടുത്തിടെ അമേരിക്കയിൽ മെറ്റ, ഗൂഗിൾ തുടങ്ങിയ കമ്പനികൾക്കെതിരെ ഉയർന്ന നിയമനടപടികളും, ഒപൺ എഐയുടെ ചാറ്റ് ജിപിറ്റി ദുരുപയോഗം ചെയ്തതുമായി ബന്ധപ്പെട്ട വിവാദങ്ങളും ജനങ്ങൾക്കിടയിൽ ഭീതി വർധിപ്പിച്ചതായി സർവേ ഏജൻസി വൈസ് പ്രസിഡന്റ് ആൻഡ്രൂ എൻസ് ചൂണ്ടിക്കാട്ടി. എങ്കിലും, ഇത്തരം നിരോധനങ്ങൾ നടപ്പിലാക്കാൻ കമ്പനികൾ എത്രത്തോളം സഹകരിക്കും എന്ന കാര്യത്തിൽ 60 ശതമാനം പേർക്കും സംശയമുണ്ട്. മാത്രമല്ല, പഠന ആവശ്യങ്ങൾക്കായി AI ഉപയോഗിക്കുന്നത് തടയുന്നത് കുട്ടികളുടെ സർഗ്ഗാത്മകതയെ ബാധിക്കുമെന്ന് 40 ശതമാനം പേർ ആശങ്കപ്പെടുന്നുമുണ്ട്. മേയ് 1 മുതൽ 4 വരെ 1,848 പേരെ ഉൾപ്പെടുത്തിയാണ് സർവേ പൂർത്തിയാക്കിയത്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Canada prepares for change: Huge public support for online restrictions for children under 16
