ടൊറന്റോ: കാനഡ സർക്കാർ പൗരത്വ നിയമങ്ങളിൽ ഇളവ് വരുത്തിയതിനെ തുടർന്ന് കനേഡിയൻ പൗരത്വം സ്വന്തമാക്കാൻ അമേരിക്കൻ പൗരന്മാർ വലിയ രീതിയിൽ താൽപര്യം പ്രകടിപ്പിക്കുന്നതായി റിപ്പോർട്ടുകൾ. വിദേശത്ത് ജനിച്ച കാനഡക്കാരുടെ തുടർന്നുള്ള തലമുറകൾക്കും പൗരത്വം അനുവദിക്കുന്ന പുതിയ ഭേദഗതി 2025 ഡിസംബറിലാണ് നിലവിൽ വന്നത്. ഇതിനു പിന്നാലെ പാരമ്പര്യമായ പൗരത്വ തെളിവിനായി (Proof of Citizenship by Descent) അപേക്ഷിക്കുന്നവരുടെ എണ്ണത്തിൽ വലിയ വർധനവാണ് രേഖപ്പെടുത്തിയിരിക്കുന്നത്. ഡൊണാൾഡ് ട്രംപ് അധികാരമേറ്റ ശേഷമുള്ള അമേരിക്കയിലെ നിലവിലെ രാഷ്ട്രീയ സാഹചര്യങ്ങളും കനേഡിയൻ പൗരത്വത്തോടുള്ള താൽപര്യം വർധിക്കാൻ കാരണമായതായി കുടിയേറ്റവിദഗ്ധർ ചൂണ്ടിക്കാണിക്കുന്നു.
വിദേശത്ത് ജനിച്ച ആദ്യ തലമുറയിലെ സന്തതികൾക്ക് മാത്രം പൗരത്വ അവകാശം പരിമിതപ്പെടുത്തിയിരുന്ന കാനഡയുടെ മുൻ നിയമം ഭരണഘടനാവിരുദ്ധമാണെന്ന് 2023-ൽ കോടതി കണ്ടെത്തിയിരുന്നു. ഇതിന്റെ അടിസ്ഥാനത്തിലാണ് നിയമ ഭേദഗതിക്ക് കാനഡ തയ്യാറായത്. പുതിയ നിയമപ്രകാരം, തലമുറകളായി കാനഡയ്ക്ക് പുറത്ത് താമസിക്കുന്നവർക്കും തങ്ങളുടെ മുൻഗാമികൾ കാനഡക്കാരായിരുന്നു എന്ന് തെളിയിക്കാൻ സാധിച്ചാൽ പൗരത്വത്തിന് അർഹത ലഭിക്കും. എന്നാൽ, കാനഡയിൽ ഒരിക്കലും താമസിച്ചിട്ടില്ലാത്ത പുതിയ പൗരന്മാർക്ക് വിദേശത്ത് ജനിക്കുന്ന തങ്ങളുടെ മക്കൾക്ക് പൗരത്വം കൈമാറുന്നതിന് കൃത്യമായ നിയന്ത്രണങ്ങളും പുതിയ നിയമത്തിൽ വ്യവസ്ഥ ചെയ്യുന്നുണ്ട്.
കനേഡിയൻ കുടിയേറ്റ ഏജൻസി പുറത്തുവിട്ട വിവരങ്ങൾ പ്രകാരം 2025 ഡിസംബറിൽ 275 ആയിരുന്ന അധിക അപേക്ഷകൾ, 2026 ജനുവരിയിൽ 1,140 ആയും ഫെബ്രുവരിയിൽ 1,255 ആയും മാർച്ചിൽ 1,405 ആയും ഉയർന്നു. ഈ അപേക്ഷകളിൽ 48 ശതമാനവും അമേരിക്കയിൽ നിന്നുള്ളവയാണ്. അമേരിക്കയും കാനഡയും തമ്മിലുള്ള ദീർഘകാല ചരിത്രബന്ധവും അമേരിക്കയിലെ പുതിയ രാഷ്ട്രീയ മാറ്റങ്ങളുമാണ് ഈ വർധനവിന് പിന്നിലെന്നാണ് വിലയിരുത്തൽ.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Americans seeking Canadian citizenship; Huge increase in applications, 48 percent of new applicants from the US
