കാനഡയിലെ 354 വർഷത്തെ ചരിത്രമുള്ള ഹഡ്സൺസ് ബേ കമ്പനി (HBC) അതിന്റെ എല്ലാ 96 സ്റ്റോറുകളും അടച്ചുപൂട്ടാനും ഏകദേശം 8,347 ജീവനക്കാരെ പിരിച്ചുവിടാനും തീരുമാനിച്ചിരിക്കുന്നു. ജൂൺ 1-നകം ഈ നടപടി പൂർത്തിയാക്കുമെന്ന് കമ്പനി അറിയിച്ചു. കമ്പനീസ് ക്രെഡിറ്റേഴ്സ് അറേഞ്ച്മെന്റ് ആക്ട് (CCAA) പ്രകാരം കോടതിയുടെ മേൽനോട്ടത്തിൽ നടത്തുന്ന പുനർനിർമ്മാണ പ്രക്രിയയുടെ ഭാഗമായാണ് ഈ തീരുമാനം. ജൂൺ 15-നകം അധികമായി 900 ജീവനക്കാരെ പിരിച്ചുവിടുകയും കമ്പനിയുടെ പ്രവർത്തനങ്ങൾ അവസാനിപ്പിക്കാൻ സഹായിക്കുന്നതിനായി ഏകദേശം 100 ജീവനക്കാരെ മാത്രം നിലനിർത്തുകയും ചെയ്യും.
പ്രാരംഭത്തിൽ, ടൊറന്റോയിലെ മുഖ്യ കേന്ദ്രം ഉൾപ്പെടെ ആറ് സ്റ്റോറുകൾ നിലനിർത്താനായിരുന്നു HBC യുടെ പദ്ധതി. എന്നാൽ കടക്കാർക്ക് തിരിച്ചടയ്ക്കാനായി 1 ബില്ല്യൺ ഡോളർ സമാഹരിക്കുന്നതിൽ ശ്രദ്ധ കേന്ദ്രീകരിക്കാൻ വേണ്ടി ഈ പദ്ധതി ഉപേക്ഷിച്ചു. കമ്പനി ഇപ്പോൾ സ്റ്റോർ വാടക, ബൗദ്ധിക സ്വത്തവകാശം, ചരിത്രപരമായ പുരാവസ്തുക്കൾ ഉൾപ്പെടെയുള്ള ആസ്തികൾ വിൽക്കുന്ന നടപടിയിൽ ആണ്. HBC, ബൗദ്ധിക സ്വത്തവകാശത്തിനായി കനേഡിയൻ ടയറുമായിയും വാടകയ്ക്ക് വേണ്ടി കോടീശ്വരി റൂബി ലിയുവിന്റെ ഉടമസ്ഥതയിലുള്ള ഒരു കമ്പനിയുമായും ഏകദേശം 30 മില്യൺ ഡോളറിന്റെ കരാറുകൾ ഉറപ്പാക്കിയിട്ടുണ്ട്., എന്നാൽ ഇവയ്ക്ക് കോടതിയുടെ അനുമതി ആവശ്യമാണ്.
കനേഡിയൻ ടയർ കരാറിന് അനുമതി തേടാനും മുൻ ജീവനക്കാർക്ക് ഫെഡറൽ വേജ് എർണർ പ്രൊട്ടക്ഷൻ പ്രോഗ്രാം (WEPPA) വഴി 8,800 ഡോളർ വരെ കുടിശ്ശിക വേതനം ലഭിക്കുമെന്ന് ഉറപ്പാക്കാനും HBC ജൂൺ 3-ന് കോടതിയിൽ ഹാജരാകും. പ്രതിസന്ധിയിൽ ആയ ജീവനക്കാർക്കായി നിർദ്ദേശിച്ചിട്ടുള്ള ഹാർഡ്ഷിപ്പ് ഫണ്ടിനെ കുറിച്ച് പ്രത്യേക വിചാരണ നടത്തും. ഈ തീരുമാനം കാനഡയിലെ റീട്ടെയിൽ മേഖലയിൽ വലിയ ആഘാതം സൃഷ്ടിക്കുമെന്നും പ്രാദേശിക സമ്പദ്വ്യവസ്ഥയിൽ വ്യാപകമായ പ്രത്യാഘാതങ്ങൾ ഉണ്ടാകുമെന്നും വിശകലകർ അഭിപ്രായപ്പെടുന്നു.
