മോൺട്രിയലിലും ക്യൂബെക്കിലും ജൂലൈ 1 ചൊവ്വാഴ്ച അൺഒഫീഷ്യൽ മൂവിംങ് ഡേയാണ്, അതിനാൽ സാധനങ്ങൾ കൊണ്ടുപോകുന്ന കമ്പനികൾ അതിവേഗം പ്രവർത്തിക്കുകയാണ്. ഈ ദിവസങ്ങളിലെ തിരക്ക് കാരണം മൂന്നുമാസം മുമ്പേ ബുക്കിംഗുകൾ പൂർത്തിയായെന്ന് ബസ്റ്റ്-എ-മൂവ് ഉടമ ജോനാഥൻ പെയ്ൻചോഡ് പറയുന്നു. ഈ മാറ്റം എളുപ്പമാക്കാൻ ചില കാര്യങ്ങൾ ശ്രദ്ധിക്കണമെന്ന് അദ്ദേഹം നിർദ്ദേശിക്കുന്നു.
സാധനങ്ങൾ കൊണ്ടുപോകാൻ വരുന്നവർക്ക് വാഹനം പാർക്ക് ചെയ്യാൻ സൗകര്യമുണ്ടാക്കുക എന്നതാണ് ഏറ്റവും പ്രധാനം. വീടിനകത്തും ചില ഒരുക്കങ്ങൾ ആവശ്യമാണ്. ആവശ്യമില്ലാത്തതും ഉപയോഗിക്കാത്തതുമായ സാധനങ്ങൾ ഒഴിവാക്കുന്നത് പുതിയൊരു തുടക്കമായി കാണാമെന്ന് സോർട്ട് ഇറ്റ് ഔട്ട് വിത്ത് സമരയുടെ ഉടമ സമറ ഷാപ്സൺ പറയുന്നു. എത്രയും നേരത്തെ ആവശ്യമില്ലാത്ത സാധനങ്ങൾ ഒഴിവാക്കുന്നത് സമയവും പണവും സമ്മർദ്ദവും ലാഭിക്കാൻ സഹായിക്കും.
മൂവിംങ് ഡേയ്ക്ക് മുൻപ് തന്നെ അത്യാവശ്യ സാധനങ്ങൾ ഒരു പെട്ടിയിലാക്കി വെക്കുന്നതും ഓരോ പെട്ടിയുടെ പുറത്തും അതിലെ സാധനങ്ങൾ എന്തൊക്കെയാണെന്ന് എഴുതിവെക്കുന്നതും വളരെ നല്ലതാണ്. അടുക്കള, കുളിമുറി, കുട്ടികളുണ്ടെങ്കിൽ അവരുടെ മുറി എന്നിവിടങ്ങളിലെ സാധനങ്ങൾ ആദ്യം അഴിച്ചു വെക്കാൻ ശ്രമിക്കുന്നത് വേഗത്തിൽ ഒരു പുതിയ സ്ഥലത്ത് സ്ഥിരതാമസമാക്കാൻ സഹായിക്കുമെന്നും ഷാപ്സൺ കൂട്ടിച്ചേർത്തു.
സാധനങ്ങൾ പാക്ക് ചെയ്യാൻ എത്ര സമയമെടുക്കുമെന്ന് പലരും കണക്കാക്കാറില്ല. അതിനാൽ, നേരത്തെ തന്നെ പാക്കിംഗ് സാമഗ്രികൾ വാങ്ങി പതിയെ പാക്കിംഗ് തുടങ്ങുന്നത് സമ്മർദ്ദം കുറയ്ക്കുകയും മൂവിംങ് ഡേ കൂടുതൽ ആസ്വാദ്യകരമാക്കുകയും ചെയ്യുമെന്ന് പെയ്ൻചോഡ് ഓർമ്മിപ്പിക്കുന്നു.
