ഒട്ടാവ: ഓൺലൈൻ വഴി വിൽക്കുന്നതും ശരീരത്തിലേക്ക് കുത്തിവെക്കുന്നതുമായ പെപ്റ്റൈഡ് ഉൽപ്പന്നങ്ങൾ ഗുരുതരമായ ആരോഗ്യപ്രശ്നങ്ങൾക്ക് കാരണമായേക്കാമെന്ന മുന്നറിയിപ്പുമായി ഹെൽത്ത് കാനഡ. അംഗീകാരമില്ലാത്ത ഇത്തരം ഉൽപ്പന്നങ്ങൾ ഉപയോഗിക്കുന്നതിനെതിരെ കാനഡയിലെ ആരോഗ്യ മന്ത്രാലയം പൗരന്മാർക്ക് കർശന മുന്നറിയിപ്പ് നൽകി. ശരീരഭാരം കുറയ്ക്കാനും പ്രായം തോന്നിക്കാതിരിക്കാനും (ആന്റി-ഏജിംഗ്) സോഷ്യൽ മീഡിയ ഇൻഫ്ലുവൻസർമാർ ഇവയെ വ്യാപകമായി പ്രോത്സാഹിപ്പിക്കുന്ന പശ്ചാത്തലത്തിലാണ് ഈ നടപടി.
ശരീരത്തിന്റെ സ്വാഭാവിക പ്രവർത്തനങ്ങളെ മാറ്റാൻ ശേഷിയുള്ള ജൈവ പദാർത്ഥങ്ങളാണ് പെപ്റ്റൈഡുകൾ. സാധാരണയായി ഡോക്ടർമാരുടെ നിർദ്ദേശപ്രകാരം മാത്രം നൽകേണ്ട മരുന്നുകളാണിവ. എന്നാൽ, വിപണിയിൽ ലഭ്യമായ പല പെപ്റ്റൈഡ് ഉൽപ്പന്നങ്ങളുടെയും സുരക്ഷയോ ഗുണമേന്മയോ പരിശോധിക്കപ്പെട്ടിട്ടില്ലെന്ന് ഹെൽത്ത് കാനഡ വ്യക്തമാക്കി. കഴിഞ്ഞ ആറുമാസത്തിനിടെ ഇത്തരം മരുന്നുകൾ ഉപയോഗിച്ച നാലുപേർക്ക് ശാരീരിക അസ്വസ്ഥതകളും ദോഷഫലങ്ങളും ഉണ്ടായതായി പരാതി ലഭിച്ചിട്ടുണ്ട്. കൃത്യമായ ശുചിത്വ മാനദണ്ഡങ്ങൾ പാലിക്കാത്ത ലാബുകളിൽ നിന്നാകാം ഇവ വരുന്നതെന്ന് ആൽബർട്ട സർവകലാശാലയിലെ ആരോഗ്യ വിദഗ്ധർ ആശങ്ക പ്രകടിപ്പിച്ചു.
സോഷ്യൽ മീഡിയയിലൂടെയുള്ള തെറ്റായ പ്രചാരണങ്ങളാണ് ഇത്തരം ഉൽപ്പന്നങ്ങൾ ജനപ്രിയമാകാൻ പ്രധാന കാരണം. മസിൽ വളർച്ചയ്ക്കും മറ്റുമായി ഇവ വെള്ളത്തിൽ കലർത്തി സ്വയം കുത്തിവെക്കുന്ന രീതി അപകടകരമാണെന്ന് വിദഗ്ധർ ചൂണ്ടിക്കാട്ടുന്നു. വ്യാജ ഉൽപ്പന്നങ്ങൾ തിരിച്ചറിയാൻ എട്ട് അക്ക മരുന്ന് തിരിച്ചറിയൽ നമ്പർ (DIN) പരിശോധിക്കണമെന്ന് ഹെൽത്ത് കാനഡ നിർദ്ദേശിച്ചു. നിയമലംഘനം നടത്തുന്ന കമ്പനികൾക്കെതിരെ കർശന നടപടി സ്വീകരിക്കുമെന്നും അനധികൃത ഉൽപ്പന്നങ്ങളെക്കുറിച്ച് വിവരം ലഭിക്കുന്നവർ അധികൃതരെ അറിയിക്കണമെന്നും ആരോഗ്യ വകുപ്പ് അറിയിച്ചു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
"Don't go with the trend"; Health Canada warns against peptide injections
