ജനറൽ മോട്ടോഴ്സ് (ജി.എം.) ഓഷാവ പ്ലാന്റിൽ ഒരു ഷിഫ്റ്റ് വെട്ടിക്കുറയ്ക്കുന്നതിന്റെ ഭാഗമായി, പ്ലാന്റിന് ആവശ്യമായ ഓട്ടോ പാർട്സുകൾ വിതരണം ചെയ്യുന്ന ടി.എഫ്.ടി. ഗ്ലോബൽ ഇൻക്. എന്ന കമ്പനി ഏകദേശം 250 തൊഴിലാളികളെ പിരിച്ചുവിടുമെന്ന് പ്രഖ്യാപിച്ചു. കാനഡയിലെ വാഹന വ്യവസായത്തെ ഭീഷണിപ്പെടുത്തിക്കൊണ്ടുള്ള അമേരിക്കൻ പ്രസിഡന്റ് ഡൊണാൾഡ് ട്രംപിന്റെ താരിഫ് നയങ്ങളാണ് ഈ തൊഴിൽനഷ്ടത്തിന് പ്രധാന കാരണമെന്ന് റിപ്പോർട്ടുകൾ സൂചിപ്പിക്കുന്നുണ്ട്. ഈ മാസം 26-ന് 245 തൊഴിലാളികളെയും, കൂടാതെ ‘മറ്റുള്ളവർ’ എന്ന വിഭാഗത്തിൽ ഉൾപ്പെട്ട മൂന്ന് തൊഴിലാളികളെയും പിരിച്ചുവിടുമെന്നാണ് കമ്പനി പ്ലാന്റിനുള്ളിൽ പതിച്ച നോട്ടീസിൽ പറയുന്നത്.
ഓഷാവയിലെ ജി.എം. ഫാക്ടറിക്കായി ഓട്ടോ പാർട്സുകൾ നിർമ്മിക്കുന്ന നിരവധി വിതരണക്കാരിൽ ഒരാളാണ് ടി.എഫ്.ടി. ഗ്ലോബൽ ഇൻക്. സെപ്റ്റംബർ 26-ന് 245 തൊഴിലാളികളെ പിരിച്ചുവിടുമെന്നാണ് കമ്പനി അറിയിച്ചിട്ടുള്ളതെങ്കിലും, ഈ തീയതി നവംബർ ആദ്യവാരത്തേക്ക് നീട്ടാൻ സാധ്യതയുണ്ടെന്ന് തൊഴിലാളി യൂണിയൻ പ്രസിഡന്റായ ജെഫ് ഗ്രേ പറഞ്ഞു. ജി.എം. മൂന്നാം ഷിഫ്റ്റ് അടച്ചുപൂട്ടാൻ തീരുമാനിച്ചതിനാൽ, അതിന്റെ നേരിട്ടുള്ള പ്രത്യാഘാതം ടി.എഫ്.ടി.യുടെ പ്രവർത്തനങ്ങളെയും ബാധിച്ചിട്ടുണ്ടെന്ന് കമ്പനിയുടെ ഹ്യൂമൻ റിസോഴ്സ് ഡയറക്ടർ എമി ടിൽട്ടൺ വ്യക്തമാക്കി.
കനേഡിയൻ സമ്പദ്വ്യവസ്ഥയിൽ തൊഴിൽ നഷ്ടം വലിയ തിരിച്ചടിയാണ് ഉണ്ടാക്കിയിരിക്കുന്നത്. പുതിയ കണക്കുകൾ പ്രകാരം, ഓഷാവയിലെ തൊഴിലില്ലായ്മ നിരക്ക് ഒമ്പത് ശതമാനമായി ഉയർന്ന് രാജ്യത്തെ രണ്ടാമത്തെ ഉയർന്ന നിരക്കിലെത്തി. ഓട്ടോ താരിഫുകൾ കാരണം പ്രതിസന്ധിയിലായ വിൻഡ്സറാണ് ഏറ്റവും ഉയർന്ന തൊഴിലില്ലായ്മ നിരക്കുള്ള നഗരം. ട്രംപിന്റെ താരിഫ് നയങ്ങൾ കാരണം രാജ്യത്ത് വാഹന വ്യവസായ മേഖലയ്ക്ക് 19,000-ത്തോളം തൊഴിലവസരങ്ങളാണ് നഷ്ടപ്പെട്ടതെന്ന് റിപ്പോർട്ടുകൾ പറയുന്നു.
തൊഴിൽ നഷ്ടമുണ്ടായാൽ തൊഴിലാളികളെ എങ്ങനെ സഹായിക്കുമെന്ന ചോദ്യത്തിന്, പരിശീലന പരിപാടികൾക്കായി ബില്യൺ കണക്കിന് ഡോളർ മുടക്കുന്നുണ്ടെന്ന് ഒന്റാറിയോ പ്രീമിയർ ഡഗ് ഫോർഡ് മറുപടി നൽകി. സൈനിക വാഹനങ്ങൾ നിർമ്മിക്കുന്നതിൽ ജി.എം.നെ പിന്തുണയ്ക്കുന്നതിനെക്കുറിച്ചും ആലോചിക്കുന്നുണ്ടെന്ന് അദ്ദേഹം കൂട്ടിച്ചേർത്തു. ‘ട്രംപിന്റെ താരിഫ് കാരണമാണ് ഈ അനിശ്ചിതത്വം. നമുക്ക് സ്ഥിരത ആവശ്യമുണ്ട്. കമ്പനികൾക്കും സ്ഥിരത വേണം’, ഫോർഡ് പറഞ്ഞു.
ജി.എം. പ്ലാന്റിലെ തൊഴിലാളികൾക്കിടയിൽ വലിയ ആശങ്ക നിലനിൽക്കുന്നുണ്ടെന്ന് പേര് വെളിപ്പെടുത്താൻ ആഗ്രഹിക്കാത്ത ഒരു തൊഴിലാളി പറഞ്ഞു. ‘ഒരുപക്ഷേ ഞാൻ ഇപ്പോഴും രക്ഷപ്പെട്ടേക്കാം’ എന്ന ചെറിയൊരു പ്രതീക്ഷ അവശേഷിക്കുന്നുണ്ടെന്ന് അദ്ദേഹം പറഞ്ഞു. കൂടാതെ, മറ്റ് ജോലികൾ ലഭിച്ചാലും വരുമാനത്തിൽ കുറവുണ്ടാകാൻ സാധ്യതയുണ്ടെന്നും ഇത് തൊഴിലാളികൾക്ക് കഷ്ടപ്പാടുണ്ടാക്കുമെന്നും അദ്ദേഹം കൂട്ടിച്ചേർത്തു. അതേസമയം, ഷിഫ്റ്റ് വെട്ടിക്കുറയ്ക്കുന്നതുമായി ബന്ധപ്പെട്ട് ഒരു പ്രത്യേക തീയതി പ്രഖ്യാപിച്ചിട്ടില്ലെന്ന് ജി.എം. വക്താവ് അറിയിച്ചു.
ട്രംപ് സർക്കാർ ഓട്ടോ പാർട്സുകൾക്ക് 25 ശതമാനവും സ്റ്റീൽ, അലുമിനിയം ഉൽപ്പന്നങ്ങൾക്ക് 50 ശതമാനവും താരിഫ് ഏർപ്പെടുത്തിയതാണ് പ്രതിസന്ധിക്ക് പ്രധാന കാരണം. ഷിഫ്റ്റ് കുറയ്ക്കുമ്പോൾ, ടയറുകൾ മുതൽ ഇൻഫോടെയ്ൻമെൻറ് സിസ്റ്റങ്ങൾ വരെ നിർമ്മിക്കുന്ന സപ്ലയർ കമ്പനികളെയും ഇത് ബാധിക്കുമെന്ന് ഓട്ടോമോട്ടീവ് പാർട്സ് മാനുഫാക്ചറേഴ്സ് അസോസിയേഷൻ പ്രസിഡന്റ് ഫ്ലേവിയോ വോൾപെ പറഞ്ഞു. ഒരു സാധാരണ തൊഴിലാളിക്ക് രാഷ്ട്രീയക്കാരനാകാൻ താല്പര്യമില്ലെന്നും അവർ ആഗ്രഹിക്കുന്നത് സമാധാനപരമായി ജോലി ചെയ്യാനാണെന്നും അദ്ദേഹം കൂട്ടിച്ചേർത്തു.
