മരുന്നുകളുടെ വില കുറഞ്ഞേക്കും? കാനഡയിൽ ജെനറിക് ഓസെംപിക് ഉൽപ്പാദനം ആരംഭിക്കുന്നു

ഒട്ടാവ: കാനഡയിൽ ജെനറിക് ഓസെംപിക് ഉൽപ്പാദനം ആരംഭിക്കുന്നു. പ്രമേഹത്തിനും അമിതവണ്ണത്തിനും ഉപയോഗിക്കുന്ന ഈ മരുന്നിന്റെ വില കുറഞ്ഞ ജെനറിക് പതിപ്പുകൾ വിപണിയിലെത്തുന്നത് കാനഡയ്ക്ക് നിർണ്ണായക നിമിഷമാണെന്ന് പ്രമുഖ എൻഡോക്രൈനോളജിസ്റ്റ് ഡോ. സു പെഡേഴ്സൺ അറിയിച്ചു. ബ്രാൻഡ് നാമത്തിലുള്ള ഓസെംപിക്, വെഗോവി (Wegovy) തുടങ്ങിയ മരുന്നുകൾ വാങ്ങാൻ സാമ്പത്തികമായി പ്രയാസപ്പെടുന്നവർക്ക് പുതിയ നീക്കം വലിയ ആശ്വാസമാകുമെന്ന് അവർ വ്യക്തമാക്കി. ഈ ആഴ്ച മുതൽ കാനഡയിലെ മരുന്ന് കമ്പനികൾക്ക് കുറഞ്ഞ നിരക്കിലുള്ള ജെനറിക് പതിപ്പുകൾ നിർമ്മിക്കാൻ അനുമതി ലഭിച്ചിട്ടുണ്ട്.

ഓസെംപിക്കിലെയും വെഗോവിയിലെയും പ്രധാന ഘടകമായ സെമാഗ്ലൂറ്റൈഡ് (Semaglutide) നിർമ്മിക്കുന്നതിനായി ഡിസംബർ 29 വരെ ഒൻപത് അപേക്ഷകളാണ് ഹെൽത്ത് കാനഡയ്ക്ക് ലഭിച്ചത്. നോവോ നോർഡിസ്ക് കമ്പനി തങ്ങളുടെ സെമാഗ്ലൂറ്റൈഡ് മരുന്നുകളുടെ പേറ്റന്റ് കാലാവധി നീട്ടാതിരുന്ന ഏക രാജ്യം കാനഡയാണ്. ഹെൽത്ത് കാനഡയുടെ കർശനമായ പരിശോധനകൾക്ക് ശേഷമാണ് ഇത്തരം മരുന്നുകൾക്ക് അംഗീകാരം നൽകുന്നതെന്നും അതിനാൽ ഇവയ്ക്ക് ബ്രാൻഡ് മരുന്നുകൾക്ക് സമാനമായ ഫലപ്രാപ്തിയും സുരക്ഷിതത്വവും ഉണ്ടാകുമെന്നും ഡോ. പെഡേഴ്സൺ വിലയിരുത്തി.

ജെനറിക് മരുന്നുകൾ വിപണിയിലെത്തുന്നതോടെ വിലയിൽ ഉടനടി കുറവുണ്ടാകുമെന്ന് പ്രതീക്ഷിക്കുന്നുണ്ടെങ്കിലും കൃത്യമായി എത്രത്തോളം കുറയുമെന്ന് ഇപ്പോൾ വ്യക്തമല്ല. ബ്രാൻഡ് മരുന്നുകൾക്ക് സമാനമായ രീതിയിൽ തന്നെയാണോ ജെനറിക് മരുന്നുകളും ഡോസ് ക്രമീകരിച്ച് നൽകുക എന്നതിലും അനിശ്ചിതത്വം നിലനിൽക്കുന്നുണ്ട്. മരുന്നുകൾ കൂടുതൽ ആളുകൾക്ക് ലഭ്യമാകുന്നത് ഗുണകരമാണെങ്കിലും അമിതവണ്ണത്തിനുള്ള ഏക പരിഹാരമിതല്ലെന്നും ജീവിതശൈലീ മാറ്റങ്ങൾ, മാനസിക പിന്തുണ തുടങ്ങിയവയ്ക്കും പ്രാധാന്യമുണ്ടെന്നും ഡോക്ടർ ചൂണ്ടിക്കാട്ടി.

ജെനറിക് മരുന്നുകൾ ഉപയോഗിക്കണോ എന്നത് ഓരോ രോഗിയും സ്വന്തം ഡോക്ടറുമായി ആലോചിച്ച് തീരുമാനിക്കണമെന്ന് ഡോ. പെഡേഴ്സൺ നിർദ്ദേശിച്ചു. ഉൽപ്പാദനം ആരംഭിച്ചെങ്കിലും ഹെൽത്ത് കാനഡയുടെ അംഗീകാര നടപടികൾ പൂർത്തിയാകുന്ന മുറയ്ക്ക് മാത്രമേ ഫാർമസികളിൽ ഇവ ലഭ്യമാകുകയുള്ളൂ. കാനഡയിലെ മുതിർന്നവരിൽ മൂന്നിലൊരാൾ അമിതവണ്ണം നേരിടുന്ന സാഹചര്യത്തിൽ മരുന്നുകളുടെ ലഭ്യത വർദ്ധിക്കുന്നത് പൊതുജനാരോഗ്യ രംഗത്ത് വലിയ മാറ്റമുണ്ടാക്കുമെന്നാണ് വിലയിരുത്തൽ.

കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt

Could drug prices fall? Generic Ozempic production begins in Canada