കാനഡ സാമ്പത്തിക മാന്ദ്യത്തിലേക്കോ? ജിഡിപിയിൽ തുടർച്ചയായ രണ്ടാം പാദത്തിലും ഇടിവ്; നിരക്കുകൾ പുറത്തുവിട്ട് അധികൃതർ

ഒട്ടാവ: കാനഡയുടെ മൊത്ത ആഭ്യന്തര ഉൽപ്പാദനം (ജിഡിപി) തുടർച്ചയായ രണ്ടാം പാദത്തിലും ഇടിവ് രേഖപ്പെടുത്തിയതോടെ രാജ്യം ‘ടെക്നിക്കൽ റിസഷൻ’ അഥവാ സാങ്കേതിക സാമ്പത്തിക മാന്ദ്യത്തിലേക്ക് നീങ്ങുന്നതായി റിപ്പോർട്ട്. കഴിഞ്ഞ വെള്ളിയാഴ്ച പുറത്തുവന്ന ഔദ്യോഗിക കണക്കുകൾ പ്രകാരമാണ് രാജ്യത്തെ പുതിയ സാമ്പത്തിക സാഹചര്യം വ്യക്തമാകുന്നത്. മുൻവർഷങ്ങളിലെ കടുത്ത സാമ്പത്തിക പ്രതിസന്ധികളുമായി താരതമ്യം ചെയ്യുമ്പോൾ ഇപ്പോഴത്തെ അവസ്ഥ അത്ര ഗുരുതരമല്ലെന്നാണ് വിദഗ്ധർ പറയുന്നത്. എങ്കിലും, ഈ കണക്കുകൾ കാനഡയിൽ വലിയ രാഷ്ട്രീയ ചർച്ചകൾക്ക് വഴിതുറന്നിട്ടുണ്ട്.

കണക്കുകൾ പ്രകാരം 2026-ലെ ആദ്യ പാദത്തിൽ കാനഡയുടെ യഥാർത്ഥ ജിഡിപി വാർഷിക അടിസ്ഥാനത്തിൽ 0.1 ശതമാനം കുറഞ്ഞു. തൊട്ടുമുമ്പത്തെ പാദമായ 2025-ലെ ഒക്ടോബർ-ഡിസംബർ കാലയളവിൽ ജിഡിപിയിൽ 1 ശതമാനം ഇടിവ് രേഖപ്പെടുത്തിയിരുന്നു. സാമ്പത്തിക ശാസ്ത്ര തത്വമനുസരിച്ച് തുടർച്ചയായി രണ്ട് പാദങ്ങളിൽ സാമ്പത്തിക വളർച്ച നെഗറ്റീവ് ആകുന്നത് സാങ്കേതിക മാന്ദ്യമായാണ് കണക്കാക്കുന്നത്. എന്നാൽ, നിലവിൽ ലഭ്യമായത് പ്രാഥമിക വിവരങ്ങൾ മാത്രമാണെന്നും വരും ദിവസങ്ങളിൽ ഇതിൽ മാറ്റങ്ങൾ വരാൻ സാധ്യതയുണ്ടെന്നുമാണ് സാമ്പത്തിക വിദഗ്ധരുടെ വിലയിരുത്തൽ.

അതേസമയം, പുതിയ റിപ്പോർട്ടുകൾ പുറത്തുവന്നതിന് പിന്നാലെ കാനഡയിലെ ലിബറൽ സർക്കാരിനെതിരെ പ്രതിപക്ഷം വിമർശനം ശക്തമാക്കി. പ്രതിപക്ഷ നേതാവ് പിയറി പൊയ്ലിവ്രെ പ്രധാനമന്ത്രി മാർക്ക് കാർണിക്കും സർക്കാരിനുമെതിരെ രൂക്ഷമായ സാമ്പത്തിക ആരോപണങ്ങളുമായി രംഗത്തെത്തി. അമേരിക്കൻ പ്രസിഡന്റ് ഡൊണാൾഡ് ട്രംപും കാനഡയുടെ സാമ്പത്തിക സ്ഥിതിയെ പരിഹസിച്ച് സോഷ്യൽ മീഡിയയിൽ കുറിപ്പ് പങ്കുവെച്ചിട്ടുണ്ട്.

എന്നാൽ, സാങ്കേതിക മാന്ദ്യവും യഥാർത്ഥ സാമ്പത്തിക മാന്ദ്യവും തമ്മിൽ വലിയ വ്യത്യാസമുണ്ടെന്ന് കാനഡയിലെ ബിസിനസ് സൈക്കിൾ കൗൺസിൽ അംഗം സ്റ്റീവൻ ആംബ്ലർ വ്യക്തമാക്കുന്നു. സമ്പദ്‌വ്യവസ്ഥയിൽ ഗണ്യമായതും (Pronounced), ദീർഘകാലം നിലനിൽക്കുന്നതും (Persistent), എല്ലാ വ്യവസായ മേഖലകളെയും ഒരേപോലെ ബാധിക്കുന്നതുമായ (Pervasive) ഇടിവ് ഉണ്ടാകുമ്പോൾ മാത്രമാണ് ഔദ്യോഗികമായി മാന്ദ്യം പ്രഖ്യാപിക്കാറുള്ളത്. കഴിഞ്ഞ വർഷം ജൂലൈ-സെപ്റ്റംബർ പാദത്തിൽ കാനഡ 2.6 ശതമാനം വളർച്ച നേടിയിരുന്നു. നിലവിലും വളർച്ച രേഖപ്പെടുത്തുന്ന വ്യവസായ മേഖലകളുടെ എണ്ണം കൂടുതലായതിനാൽ കടുത്ത സാമ്പത്തിക തകർച്ചയ്ക്കുള്ള സാധ്യത കുറവാണെന്ന് അദ്ദേഹം ചൂണ്ടിക്കാട്ടി.

രാജ്യത്ത് നിലവിൽ വലിയ തൊഴിൽ നഷ്ടങ്ങൾ റിപ്പോർട്ട് ചെയ്തിട്ടില്ലെങ്കിലും വിപണി ദുർബലമാണെന്ന സൂചനകൾ നിലനിൽക്കുന്നുണ്ട്. കഴിഞ്ഞ ഏപ്രിലിലെ കണക്കുകൾ പ്രകാരം കാനഡയിലെ തൊഴിലില്ലായ്മ നിരക്ക് 6.9 ശതമാനമായും യുവജന തൊഴിലില്ലായ്മ 14.3 ശതമാനമായും ഉയർന്നിട്ടുണ്ട്. ബിസിനസ് നിക്ഷേപങ്ങളിലെ കുറവും ഭവന നിർമാണ മേഖലയിലെ മന്ദഗതിയും കാനഡ നേരിടുന്ന മറ്റ് വെല്ലുവിളികളാണ്. നിലവിലെ സാഹചര്യത്തിൽ പൊതുജനങ്ങൾ അനാവശ്യമായി ആശങ്കപ്പെടേണ്ടതില്ലെന്നും, എന്നാൽ സാമ്പത്തിക വളർച്ചയുടെ വേഗത കുറയുന്നതിനെ ജാഗ്രതയോടെ കാണണമെന്നുമാണ് സാമ്പത്തിക വിദഗ്ധർ നൽകുന്ന നിർദേശം.

📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla

Is Canada heading for recession? GDP declines for second consecutive quarter; Officials release rates