ഇന്ധനം നിറയ്ക്കാൻ ഇതാണ് പറ്റിയസമയം! സാസ്കാച്ചെവനിൽ വില റെക്കോർഡ് താഴ്ചയിൽ

സസ്‌കച്ചെവൻ: സസ്‌കച്ചെവനിൽ ഇന്ധനവിലയിൽ സമീപ ദിവസങ്ങളിൽ ഗണ്യമായ കുറവ് രേഖപ്പെടുത്തി. ഇതോടെ, മാസങ്ങളിലെ ഏറ്റവും താഴ്ന്ന നിലയിലേക്ക് ഇന്ധനവില എത്തി. ഈ കുറവ് പ്രവിശ്യയിലെ വാഹനയാത്രക്കാർക്കും സാധാരണക്കാർക്കും വലിയ ആശ്വാസമായിട്ടുണ്ട്. ഇതിന് പ്രധാന കാരണം ‘വിന്റർ ബ്ലെൻഡ് ഗ്യാസ്’ ഉപയോഗിച്ച് തുടങ്ങിയതാണ്. നിലവിൽ സസ്‌കറ്റൂണിൽ ലിറ്ററിന് ഏകദേശം $1.08 വരെയും റെജീനയിൽ $1.17 വരെയും ആണ് വില.

കാനേഡിയൻസ് ഫോർ അഫോർഡബിൾ എനർജി പ്രസിഡന്റ് ഡാൻ മക്റ്റീഗ് പറയുന്നതനുസരിച്ച്, വേനൽക്കാലത്ത് ഉപയോഗിക്കുന്നതിൽ നിന്ന് വിന്റർ ബ്ലെൻഡ് ഗ്യാസിലേക്ക് മാറിയതാണ് ലിറ്ററിന് 9 മുതൽ 10 സെൻ്റ് വരെ ലാഭമുണ്ടാക്കാൻ കാരണം. ഇതിന് പുറമെ കനേഡിയൻ ഡോളർ ശക്തിപ്പെട്ടതും വില കുറയാൻ ചെറിയ തോതിൽ സഹായിച്ചിട്ടുണ്ട്.

മറ്റ് പ്രവിശ്യകളെ അപേക്ഷിച്ച് സസ്‌കച്ചെവനിൽ സാധാരണയായി ഇന്ധനവില കുറവായിരിക്കും. കാരണം, ഇവിടെ പല പമ്പുകളും ചിപ്‌സ്, കാപ്പി തുടങ്ങിയ മറ്റ് സാധനങ്ങൾ വിറ്റാണ് ലാഭം കണ്ടെത്താൻ ശ്രമിക്കുന്നത്.

സാധാരണക്കാർ വലിയ മാറ്റം കാണുന്നില്ല

വില കുറഞ്ഞിട്ടും സസ്‌കറ്റൂണിലെ പലരും ഇതിനെ വലിയ കാര്യമായി കാണുന്നില്ല. ദൈനംദിന യാത്രകൾക്ക് എപ്പോഴും ഇന്ധനം വാങ്ങേണ്ടിവരുന്നതിനാൽ ഈ ചെറിയ വിലക്കുറവ് തങ്ങളുടെ ജീവിതത്തെ കാര്യമായി ബാധിക്കുന്നില്ലെന്നാണ് അവരുടെ അഭിപ്രായം. “വില കുറയുകയോ കൂടുകയോ ചെയ്താലും നമുക്ക് ഗ്യാസ് വേണ്ടതുതന്നെ,” ഒരാൾ പ്രതികരിച്ചു.

മുന്നറിയിപ്പുമായി വിദഗ്ദ്ധർ

എന്നാൽ ഈ വിലയിടിവ് അധികനാൾ തുടരുമെന്നുറപ്പില്ലെന്ന് മക്റ്റീഗ് മുന്നറിയിപ്പ് നൽകുന്നു. അമേരിക്കയിലെ ഉൽപ്പാദന പ്രശ്‌നങ്ങളാണ് വില കൂടാൻ സാധ്യതയുള്ള കാരണം. അടുത്തിടെ ചിക്കാഗോയിലെ ഒരു റിഫൈനറിയിൽ തീപിടിത്തമുണ്ടായത് ഗ്യാസോലിൻ വില ലിറ്ററിന് എട്ട് സെന്റ് വരെ ഉയർത്താൻ സാധ്യതയുണ്ട്. നിലവിൽ ഈ വർദ്ധനവ് പമ്പുകളിൽ വരാത്തതിനാൽ, അടുത്ത ദിവസങ്ങളിൽ വില കൂടാൻ സാധ്യതയുണ്ടെന്നും അദ്ദേഹം കൂട്ടിച്ചേർത്തു.

വില കുറവിൽ പെട്രോൾ വാങ്ങാൻ ഒരു ടിപ്പ്:

ഇന്ധനം കുറഞ്ഞ വിലയിൽ വാങ്ങാൻ ആഗ്രഹിക്കുന്നവർക്കായി മക്റ്റീഗ് ഒരു നിർദ്ദേശവും പങ്കുവെച്ചു: കാനഡയിലെ പല നഗരങ്ങളിലും വൈകുന്നേരം ആറ് മണിക്ക് ശേഷം ഗ്യാസ് സ്റ്റേഷനുകൾ സാധാരണയായി വില കുറയ്ക്കാറുണ്ട്. ദിവസം നിശ്ചയിച്ച വിൽപ്പന ലക്ഷ്യം കൈവരിച്ച ശേഷം കൂടുതൽ ഉപഭോക്താക്കളെ ആകർഷിക്കാൻ അവർ മാർജിൻ കുറയ്ക്കുന്നതാണ് ഇതിന് കാരണം.

📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82

Now is the time to fill up on gas! Prices are at record lows in Saskatchewan