നയാഗ്ര: ആഗോള രാഷ്ട്രീയ സമവാക്യങ്ങളിൽ മാറ്റങ്ങളും അമേരിക്കയുടെ സംരക്ഷണവാദ നയങ്ങളും വർധിച്ചുവരുന്ന സാഹചര്യത്തിൽ, കാനഡ വിദേശകാര്യ മന്ത്രി അനിത ആനന്ദ് ബഹുരാഷ്ട്ര സഹകരണത്തിന്റെ പ്രാധാന്യം ഊന്നിപ്പറഞ്ഞുകൊണ്ട് നയാഗ്ര ON ഇന്നും നാളെയുമായി നടക്കുന്ന ജി7 വിദേശകാര്യ മന്ത്രിമാരുടെ യോഗത്തിന് ആതിഥേയത്വം വഹിക്കുകയാണ്. കാനഡയുടെ ജി7 അധ്യക്ഷ പദവിയുടെ സമാപന പരിപാടിയായ ഈ രണ്ടുദിന ഉച്ചകോടിയിൽ “ലോക വേദിയിൽ കാനഡ നേതൃസ്ഥാനത്ത് തുടരണം” എന്ന് ആനന്ദ് വ്യക്തമാക്കി.
ഫ്രാൻസ്, ജർമനി, ഇറ്റലി, ജപ്പാൻ, യു.കെ , അമേരിക്ക, യൂറോപ്യൻ യൂണിയൻ എന്നീ ജി7 അംഗരാജ്യങ്ങളുടെ വിദേശകാര്യ മന്ത്രിമാരെ ഒരുമിച്ചുകൂട്ടുന്ന ഈ ചർച്ചകൾ, റഷ്യയുടെ യുക്രൈൻ അധിനിവേശം, പ്രധാനപ്പെട്ട ധാതുക്കളുടെമേൽ ചൈനയുടെ വർധിച്ചുവരുന്ന നിയന്ത്രണം എന്നിവയുൾപ്പെടെയുള്ള സമകാലിക ആഗോള വെല്ലുവിളികളെ അഭിസംബോധന ചെയ്യും. ഓസ്ട്രേലിയ, ബ്രസീൽ, ഇന്ത്യ, മെക്സിക്കോ, സൗദി അറേബ്യ, ദക്ഷിണാഫ്രിക്ക, ദക്ഷിണ കൊറിയ, ഉക്രൈൻ എന്നീ രാജ്യങ്ങളിൽനിന്നുള്ള പ്രതിനിധികളെയും ആനന്ദ് ചർച്ചകളിൽ പങ്കെടുക്കാൻ ക്ഷണിച്ചിട്ടുണ്ട്.
പ്രസിഡന്റ് ഡൊണാൾഡ് ട്രംപിന്റെ കീഴിൽ അമേരിക്കയുടെ പുതുക്കിയ സംരക്ഷണവാദ നയങ്ങളുടെ പശ്ചാത്തലത്തിലാണ് ഈ യോഗം നടക്കുന്നത്. കാനഡയുമായുള്ള ഉഭയകക്ഷി വ്യാപാര ചർച്ചകൾ നിർത്തിവച്ചതും ജി7 പങ്കാളികൾക്കെതിരെ തീരുവ ചുമത്തിയതും ട്രംപ് ഭരണകൂടത്തിന്റെ പ്രവർത്തനങ്ങളിൽ ഉൾപ്പെടുന്നു. യുക്രൈനെക്കുറിച്ചുള്ള അവരുടെ സ്ഥിരതയില്ലാത്ത നിലപാടും ചൈനയ്ക്ക് നൽകിയ പുതിയ വ്യാപാര ഇളവുകളും ആഗോള സുരക്ഷയെക്കുറിച്ചുള്ള സംയുക്ത പ്രസ്താവന തയ്യാറാക്കുന്നതിന് മുമ്പ് അനിശ്ചിതത്വം കൂട്ടിയിട്ടുണ്ട്. റഷ്യൻ വിരുദ്ധ നിലപാടിന് പേരുകേട്ട അമേരിക്കൻ സ്റ്റേറ്റ് സെക്രട്ടറി മാർക്കോ റൂബിയോയാണ് വാഷിംഗ്ടണിനെ പ്രതിനിധീകരിച്ച് ചർച്ചകളിൽ പങ്കെടുക്കുന്നത്.
ഗാസയിലെ ദുർബലമായ വെടിനിർത്തൽ കരാറിനെക്കുറിച്ചും ആനന്ദും റൂബിയോയും ചർച്ച ചെയ്യുമെന്ന് പ്രതീക്ഷിക്കുന്നു. സംഘർഷം അവസാനിപ്പിക്കുന്നതിനുള്ള ട്രംപിന്റെ നയതന്ത്ര ശ്രമങ്ങളെ ഇരുവരും പിന്തുണയ്ക്കുന്നുണ്ടെങ്കിലും, ഹമാസ് നിരായുധീകരിക്കണമെന്നും ഗാസയ്ക്കുള്ള മാനുഷിക സഹായം മുൻഗണനയായി തുടരണമെന്നും അവർ ഊന്നിപ്പറയുന്നു. വെടിനിർത്തൽ നിരീക്ഷിക്കാൻ സൈനിക ഉദ്യോഗസ്ഥരെ അയയ്ക്കുന്നതിനൊപ്പം ഗാസയുടെ ഭാവി പുനർനിർമ്മാണ പ്രവർത്തനങ്ങളിലും കാനഡ പങ്കുവഹിക്കും.
സമുദ്ര സുരക്ഷയിലും പ്രധാന ധാതുക്കളിലുമുള്ള സഹകരണവും യോഗത്തിന്റെ പ്രധാന വിഷയമായിരിക്കും. റഷ്യയുടെ “ഷാഡോ ഫ്ലീറ്റ്” എന്നറിയപ്പെടുന്ന എണ്ണക്കപ്പലുകളുടെ ശൃംഖലയെ നേരിടാനും ചൈനീസ് ധാതു സംസ്കരണത്തെ ആശ്രയിക്കുന്നത് കുറയ്ക്കാനുമുള്ള ശ്രമങ്ങൾക്ക് കാനഡ നേതൃത്വം നൽകുന്നുണ്ട്. സാമ്പത്തിക ദേശീയത ആഗോള നയതന്ത്രത്തെ കൂടുതൽ സ്വാധീനിക്കുന്ന ഈ കാലത്ത് ജി7 അംഗങ്ങൾക്ക് ഐക്യം നിലനിർത്താൻ കഴിയുമോ എന്ന് ഈ ഉച്ചകോടി പരീക്ഷിക്കുമെന്ന് വിശകലന വിദഗ്ധർ അഭിപ്രായപ്പെടുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
G7 foreign ministers meet to be held in Niagara today
