സൂറിച്ച്: ജര്‍മന്‍ ഹോക്കി ഫെഡറേഷന്‍ മുന്‍ മേധാവി ഫ്രാന്‍സ് റെയിന്‍ഡല്‍ അന്താരാഷ്ട്ര ഐസ് ഹോക്കി ഫെഡറേഷന്റെ (ഐഐഎച്ച്എഫ്) പുതിയ പ്രസിഡന്റായി തെരഞ്ഞെടുക്കപ്പെട്ടു. നിലവിലെ പ്രസിഡന്റ് ലൂക് ടാര്‍ഡിഫ് വീണ്ടും മത്സരിക്കാതിരുന്നതോടെയാണ് റെയിന്‍ഡല്‍ സ്ഥാനത്തെത്തിയത്. കാനഡയ്ക്ക് ഐഐഎച്ച്എഫ് കൗണ്‍സിലില്‍ ഒരു സീറ്റ് പോലും ലഭിച്ചില്ല.
വെള്ളിയാഴ്ച സ്‌പെയിനിലെ ടെനറിഫ് ദ്വീപില്‍ നടന്ന തെരഞ്ഞെടുപ്പില്‍ ചെക്ക് റിപ്പബ്ലിക്കിന്റെ മുന്‍ താരം പെട്ര് ബ്രിഷയെ 60-57ന് പരാജയപ്പെടുത്തിയാണ് റെയിന്‍ഡല്‍ പ്രസിഡന്റായത്. ഇരുവരും മുന്‍ ഹോക്കി താരങ്ങളും ഒളിമ്പിക് മെഡല്‍ ജേതാക്കളുമാണ്.
ആദ്യ റൗണ്ടില്‍ ബ്രിഷയ്ക്ക് 48 വോട്ടും റെയിന്‍ഡലിന് 36 വോട്ടുമാണ് ലഭിച്ചത്. കിര്‍ഗിസ്ഥാന്റെ ഐവാസ് ഒമോര്‍കനോവ് പുറത്തായതിന് പിന്നാലെ ലഭിച്ച വോട്ടുകളാണ് റെയിന്‍ഡലിന് രണ്ടാം റൗണ്ടില്‍ നിര്‍ണായകമായത്.
1976-ലെ ഒളിമ്പിക്‌സില്‍ വെസ്റ്റ് ജര്‍മനിക്ക് വേണ്ടി ഫോര്‍വേഡായി കളിച്ച റെയിന്‍ഡല്‍ അമേരിക്കയ്ക്കും ഫിന്‍ലന്‍ഡിനുമെതിരെ വിജയിച്ച് വെങ്കല മെഡല്‍ നേടിയ ടീമിന്റെ ഭാഗമായിരുന്നു. 1992-ല്‍ ചെക്കോസ്ലോവാക്യ വെങ്കലം നേടിയപ്പോള്‍ ഗോള്‍കീപ്പറായിരുന്നു ബ്രിഷ.
ALSO READ: സാമ്പത്തിക നിയമലംഘന കേസ്; പ്രീമിയര്‍ ലീഗ് വിധിക്കെതിരെ മാഞ്ചസ്റ്റര്‍ സിറ്റിയുടെ അപ്പീല്‍
അഞ്ച് വര്‍ഷം മുമ്പ് ടാര്‍ഡിഫിനോട് പരാജയപ്പെട്ട റെയിന്‍ഡല്‍ ഇപ്പോള്‍ ഐഐഎച്ച്എഫ് പ്രസിഡന്റായി തിരിച്ചെത്തുകയാണ്. എന്‍എച്ച്എല്ലുമായി നേരത്തെയും അടുത്ത് പ്രവര്‍ത്തിച്ചിട്ടുള്ള അദ്ദേഹം 2016-ല്‍ എന്‍എച്ച്എല്‍ സംഘടിപ്പിച്ച വേള്‍ഡ് കപ്പ് ഓഫ് ഹോക്കിയില്‍ ടീം യൂറോപ്പിന്റെ പ്രസിഡന്റായിരുന്നു.
അതേസമയം, ഹോക്കി കാനഡയുടെ പ്രസിഡന്റും സി.ഇ.ഒയുമായ കാതറിന്‍ ഹെന്‍ഡേഴ്‌സണിന് ഐഐഎച്ച്എഫ് കൗണ്‍സിലിലേക്ക് തിരഞ്ഞെടുക്കപ്പെടാനായില്ല. 2026 മുതല്‍ 2030 വരെയുള്ള കാലയളവിലേക്കുള്ള കൗണ്‍സിലിലാണ് കാനഡയ്ക്ക് സീറ്റ് നഷ്ടമായത്.
ടാര്‍ഡിഫിന്റെ കാലാവധിയില്‍ ഈ വര്‍ഷത്തെ മിലാന്‍-കോര്‍ട്ടിന ഒളിമ്പിക്‌സില്‍ എന്‍എച്ച്എല്‍ താരങ്ങള്‍ തിരിച്ചെത്തിയതും 2022-ലെ റഷ്യന്‍ അധിനിവേശത്തെ തുടര്‍ന്ന് റഷ്യന്‍ ടീമുകളെ ഐഐഎച്ച്എഫ് മത്സരങ്ങളില്‍നിന്ന് ഒഴിവാക്കിയതും പ്രധാന സംഭവങ്ങളായിരുന്നു. 71-കാരനായ ടാര്‍ഡിഫ് മാര്‍ച്ചില്‍ വീണ്ടും മത്സരിക്കില്ലെന്ന് പ്രഖ്യാപിച്ചിരുന്നു. പുതിയ തലമുറയിലെ നേതാവിന് അവസരം നല്‍കേണ്ട സമയമാണിതെന്നായിരുന്നു അദ്ദേഹത്തിന്റെ നിലപാട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
‘Franz Reindl Elected IIHF President’
