കാനഡയിലെ സാസ്കച്ചുവാൻ പ്രവിശ്യ തങ്ങളുടെ എല്ലാ കൽക്കരി താപവൈദ്യുത നിലയങ്ങളുടെയും പ്രവർത്തനം തുടരാൻ തീരുമാനിച്ചത് ഫെഡറൽ സർക്കാരുമായി ഒരു വലിയ നിയമപോരാട്ടത്തിന് വഴിയൊരുക്കിയിരിക്കുകയാണ്. പൊതുജനങ്ങളെ നേരിട്ട് അറിയിക്കാതെ, സർക്കാർ ഉടമസ്ഥതയിലുള്ള സാസ്ക് പവറിലെ ജീവനക്കാർക്ക് അയച്ച ഒരു സ്വകാര്യ കത്തിലൂടെയാണ് ഈ നിർണായക പ്രഖ്യാപനം നടത്തിയത്. ഫെഡറൽ ക്ലീൻ ഇലക്ട്രിസിറ്റി ചട്ടങ്ങളുടെ നിയമസാധുതയെ ചോദ്യം ചെയ്യുന്ന നിലപാടാണ് പ്രവിശ്യയുടേതെന്ന് ക്രൗൺ ഇൻവെസ്റ്റ്മെന്റ്സ് കോർപ്പറേഷൻ (സിഐസി) മന്ത്രി ജെറമി ഹാരിസൺ കത്തിൽ വ്യക്തമാക്കി.
ട്രൂഡോ സർക്കാർ 2016-ൽ കൊണ്ടുവന്ന നിയമപ്രകാരം, കൽക്കരി നിലയങ്ങൾ 2030-ഓടെയോ അല്ലെങ്കിൽ 50 വർഷത്തെ പ്രവർത്തനത്തിന് ശേഷമോ അടച്ചുപൂട്ടേണ്ടതുണ്ട്. ഈ നിയമം വന്നപ്പോൾ, സാസ്കച്ചുവാൻ അതിനെ പിന്തുണച്ചിരുന്നു. മാത്രമല്ല, കോറോണാക്ക്, എസ്റ്റെവാൻ പോലുള്ള നിലയങ്ങൾക്ക് സാമ്പത്തിക സഹായവും പ്രഖ്യാപിച്ചിരുന്നു. എന്നാൽ ഇപ്പോഴത്തെ തീരുമാനം ആ മുൻ നിലപാടിൽ നിന്നുള്ള വ്യക്തമായ വ്യതിയാനമാണ്.
പുതിയ നീക്കം അനുസരിച്ച്, ബൗണ്ടറി ഡാം 4 എന്ന നിലയത്തിൽ ഈ വർഷം തന്നെ അറ്റകുറ്റപ്പണികൾ ആരംഭിക്കും. പോപ്ലാർ റിവർ, ഷാൻഡ്, ബൗണ്ടറി ഡാം തുടങ്ങിയ പ്രധാന നിലയങ്ങളും തുടർന്നും പ്രവർത്തിക്കും. 2030 മുതൽ പുതിയ സ്മോൾ മോഡുലാർ റിയാക്ടറുകൾ (എസ്എംആറുകൾ) സ്ഥാപിക്കുമെന്ന ദീർഘകാല പ്രതീക്ഷയും പ്രവിശ്യ പങ്കുവെക്കുന്നുണ്ട്. പ്രവിശ്യയുടെ ഈ തീരുമാനത്തിനെതിരെ ശക്തമായ വിമർശനങ്ങൾ ഉയർന്നിട്ടുണ്ട്.
റജൈന യൂണിവേഴ്സിറ്റിയിലെ സാമ്പത്തികശാസ്ത്ര പ്രൊഫസറായ ബ്രെറ്റ് ഡോൾട്ടർ ഈ നീക്കത്തെ രൂക്ഷമായി വിമർശിച്ചു. ഇത് പരിസ്ഥിതി നിയമങ്ങൾക്ക് വിരുദ്ധമാണെന്നും, ഫെഡറൽ സർക്കാരുമായി ദീർഘകാല നിയമ പോരാട്ടത്തിന് ഇത് കാരണമാകുമെന്നും അദ്ദേഹം പറഞ്ഞു. ഇത് പണം കളയുന്ന കാര്യമാണ്. ഇന്നത്തെ കാലത്ത് വിഎച്ച്എസ് കടകൾ തുറക്കുന്നതുപോലെയാണിത്,” അദ്ദേഹം വിമർശിച്ചു. എസ്എംആറുകൾ 2029-ഓടെ തയ്യാറാക്കി 2034-ഓടെ പ്രവർത്തിപ്പിക്കാനാണ് പദ്ധതി.
നിലവിലെ ഈ തീരുമാനം ഫെഡറൽ നിയമങ്ങളുമായി നേരിട്ട് ഏറ്റുമുട്ടാൻ സാധ്യതയുണ്ടെന്നും, വിഷയം കോടതിമുറികളിലേക്ക് നീങ്ങാൻ സാധ്യതയുണ്ടെന്നും നിരീക്ഷകർ പറയുന്നു. ഈ പദ്ധതികളുടെ ചിലവുകൾ സംബന്ധിച്ച് സർക്കാർ ഇതുവരെ വ്യക്തമായ വിവരങ്ങൾ പുറത്തുവിട്ടിട്ടില്ല എന്നതും വിമർശനങ്ങൾക്ക് കാരണമാകുന്നുണ്ട്. സാസ്കച്ചുവാനിന്റെ ഈ കൽക്കരി ആശ്രിതത്വം തുടരാനുള്ള ശ്രമം, പരിസ്ഥിതി ചട്ടങ്ങളോടുള്ള വെല്ലുവിളി, ദീർഘകാല വൈദ്യുതി ഉപഭോഗം എന്നിവ പ്രാദേശികവും ദേശീയവുമായ തലങ്ങളിൽ വലിയ പ്രത്യാഘാതങ്ങൾ സൃഷ്ടിച്ചേക്കാൻ സാധ്യതയുണ്ട്.
