ലോസ് ആഞ്ചലസ്: ലോകപ്രശസ്ത അമേരിക്കൻ ഗായകൻ ഡി4വിഡിനെതിരെ (D4vd) 14 വയസ്സുകാരിയെ കൊലപ്പെടുത്തിയ കേസിൽ പ്രോസിക്യൂഷൻ കുറ്റപത്രം സമർപ്പിച്ചു. ഡേവിഡ് ബർക്ക് എന്ന ഡി4വിഡിന്റെ ഉടമസ്ഥതയിലുള്ള ടെസ്ല കാറിന്റെ മുൻവശത്തെ സ്റ്റോറേജ് ബോക്സിൽ നിന്നുമാണ് ക്രൂരമായി കൊലചെയ്യപ്പെട്ട നിലയിൽ പെൺകുട്ടിയുടെ മൃതദേഹം കണ്ടെത്തിയത്. കഴിഞ്ഞ വർഷം സെപ്റ്റംബറിൽ കണ്ടെത്തിയ മൃതദേഹം തിരിച്ചറിയാൻ സാധിക്കാത്തവിധം ജീർണ്ണിച്ച നിലയിലായിരുന്നു. തിങ്കളാഴ്ചയാണ് ലോസ് ആഞ്ചലസ് കൗണ്ടി ഡിസ്ട്രിക്റ്റ് അറ്റോർണി ഓഫീസ് ഗായകനെതിരെ ഒന്നാം ഡിഗ്രി കൊലപാതകക്കുറ്റം ഉൾപ്പെടെയുള്ള ഗൗരവകരമായ വകുപ്പുകൾ ചുമത്തിയത്.
സെലസ്റ്റെ റിവാസ് ഹെർണാണ്ടസ് എന്ന പെൺകുട്ടിയാണ് കൊല്ലപ്പെട്ടത്. 2024-ൽ, 13 വയസ്സുള്ളപ്പോഴാണ് പെൺകുട്ടിയെ കാണാതാകുന്നത്. 2025 ഏപ്രിൽ 23-ന് ഹോളിവുഡ് ഹിൽസിലുള്ള ബർക്കിന്റെ വസതി സന്ദർശിച്ചതിന് ശേഷം സെലസ്റ്റെയെക്കുറിച്ച് വിവരമൊന്നുമില്ലായിരുന്നുവെന്ന് ഡിസ്ട്രിക്റ്റ് അറ്റോർണി നഥാൻ ഹോച്ച്മാൻ പറഞ്ഞു. താനുമായി പെൺകുട്ടിക്കുണ്ടായിരുന്ന ലൈംഗിക ബന്ധം പുറംലോകമറിയുമെന്നും അത് സംഗീത ജീവിതത്തെ തകർക്കുമെന്നുമുള്ള ഭയമാണ് കൊലപാതകത്തിന് പ്രേരിപ്പിച്ചതെന്ന് പ്രോസിക്യൂഷൻ കോടതിയെ അറിയിച്ചു.
പെൺകുട്ടിയെ കൊലപ്പെടുത്തിയ ശേഷം മൃതദേഹം കഷ്ണങ്ങളാക്കി മുറിച്ച് രണ്ട് ബാഗുകളിലാക്കി കാറിൽ ഒളിപ്പിക്കുകയായിരുന്നുവെന്നാണ് കണ്ടെത്തൽ. ഹോളിവുഡ് ഹിൽസിലെ തെരുവിൽ 72 മണിക്കൂറിലധികം പാർക്ക് ചെയ്തതിനെത്തുടർന്ന് ടോവിംഗ് യാർഡിലേക്ക് മാറ്റിയ കാറിൽ നിന്നാണ് മൃതദേഹം കണ്ടെത്തിയത്. കാറിൽ നിന്ന് അസഹനീയമായ ദുർഗന്ധം വമിച്ചതിനെത്തുടർന്ന് ഉദ്യോഗസ്ഥർ നടത്തിയ പരിശോധനയിൽ പ്രാണികൾ അരിച്ച നിലയിൽ മൃതദേഹ ഭാഗങ്ങൾ അടങ്ങിയ ബാഗുകൾ കണ്ടെത്തുകയായിരുന്നു.
മൃതദേഹത്തിന് ഏകദേശം നാല് മാസത്തോളം പഴക്കമുണ്ടായിരുന്നു. സാമ്പത്തിക നേട്ടം, സാക്ഷിയെ ഇല്ലാതാക്കൽ തുടങ്ങിയ പ്രത്യേക സാഹചര്യങ്ങൾ പരിഗണിച്ച് പ്രതിക്ക് വധശിക്ഷ വരെ ലഭിക്കാവുന്ന കുറ്റങ്ങളാണ് ചുമത്തിയിരിക്കുന്നത്. എന്നാൽ വധശിക്ഷ വേണമോ എന്ന കാര്യത്തിൽ പ്രോസിക്യൂഷൻ അന്തിമ തീരുമാനമെടുത്തിട്ടില്ല. അതേസമയം, ഗായകൻ ഡി4വിഡ് നിരപരാധിയാണെന്ന് അദ്ദേഹത്തിന്റെ അഭിഭാഷകർ പ്രസ്താവനയിൽ അറിയിച്ചു.
സെലസ്റ്റെയുടെ മരണത്തിൽ ബർക്കിന് പങ്കില്ലെന്നും ഇത് തെളിയിക്കാനുള്ള കൃത്യമായ രേഖകൾ കൈവശമുണ്ടെന്നുമാണ് പ്രതിഭാഗം വാദിക്കുന്നത്. ഏപ്രിൽ 16-നാണ് കൊലപാതക കേസിൽ ഡി4വിഡിനെ പോലീസ് അറസ്റ്റ് ചെയ്തത്. നിലവിൽ ജാമ്യമില്ലാ വകുപ്പുകൾ പ്രകാരം ജയിലിലാണ് അദ്ദേഹം. ഗായകൻ കുറ്റക്കാരനാണെന്ന് കണ്ടെത്തിയാൽ അത് ലോക സംഗീത മേഖലയെത്തന്നെ പിടിച്ചുലയ്ക്കുന്ന ഒന്നായി മാറും. കേസിന്റെ കൂടുതൽ വിശദാംശങ്ങൾ വരും ദിവസങ്ങളിൽ കോടതി പരിശോധിക്കും.
Fearing that the relationship would be exposed, 14-year-old girl was killed
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
