മോൺട്രിയൽ: നോട്ടർ-ഡാം-ഡി-ഗ്രാസ് (NDG) മേഖലയിലെ വോക്ക്ലി അവന്യൂവിലുള്ള രണ്ട് ബഹുനില കെട്ടിടങ്ങളിലെ താമസക്കാർ കടുത്ത തണുപ്പിലും അടിസ്ഥാന സൗകര്യങ്ങളില്ലാതെയും ദുരിതമനുഭവിക്കുന്നതായി റിപ്പോർട്ട്. കഴിഞ്ഞ 10 ദിവസമായി കെട്ടിടത്തിലെ പൈപ്പുകൾ പൊട്ടി വെള്ളം പുറത്തേക്കൊഴുകുന്ന നിലയിലും ഹീറ്റിംഗ് സംവിധാനം നിലച്ച അവസ്ഥയിലുമാണ് ഇവിടെയുള്ളവർ കഴിയുന്നത്. കഴിഞ്ഞ ശനിയാഴ്ച മേഖലയിലുണ്ടായ വൈദ്യുതി തടസ്സത്തിന് പിന്നാലെയാണ് കെട്ടിടത്തിലെ പൈപ്പുകൾ ഒന്നൊന്നായി പൊട്ടിത്തെറിക്കാൻ തുടങ്ങിയത്.
കെട്ടിടത്തിലെ റേഡിയേറ്ററുകളിലേക്ക് ചൂടുവെള്ളം എത്തിക്കുന്ന പൈപ്പുകൾ തകരാറിലായതോടെ അകത്തെ താപനില പൂജ്യം ഡിഗ്രിയിലേക്ക് താഴ്ന്നു. ഫ്ലാറ്റുകളിൽ താമസിക്കാൻ കഴിയാത്ത സാഹചര്യമായതോടെ പലരും ജിമ്മുകളിലും സുഹൃത്തുക്കളുടെ വീടുകളിലുമാണ് അഭയം തേടിയിരിക്കുന്നത്. ഒരു കുടുംബം തങ്ങളുടെ കൈക്കുഞ്ഞുമായി അടുക്കളയിൽ ചെറിയ ഇലക്ട്രിക് ഹീറ്ററിന് ചുവട്ടിലാണ് രാത്രികൾ കഴിച്ചുകൂട്ടുന്നത്. ഫ്ലാറ്റിലെ ഭിത്തികളും തറയും പൂർണ്ണമായും നശിച്ചതായും കറുത്ത നിറത്തിലുള്ള അഴുക്കുവെള്ളം മുറികളിൽ പടർന്നതായും താമസക്കാർ പരാതിപ്പെടുന്നു. കെട്ടിട ഉടമയോട് പരാതിപ്പെട്ടെങ്കിലും അറ്റകുറ്റപ്പണികൾ നടത്താൻ തയ്യാറാകാത്തതിനെ തുടർന്ന് സിറ്റി അധികൃതർ ഇടപെട്ട് ചില ഫ്ലാറ്റുകൾ ഒഴിപ്പിച്ചു.
കെട്ടിട ഉടമയായ ജീൻ ഡി’ഹെയ്റ്റിക്കെതിരെ 2023 മുതൽ നഗരസഭ 15 തവണ നിയമലംഘന നോട്ടീസുകൾ നൽകിയിട്ടുണ്ട്. എന്നാൽ സമീപകാലത്തുണ്ടായ വൈദ്യുതി തടസ്സമാണ് പൈപ്പുകൾ പൊട്ടാൻ കാരണമായതെന്നും പ്രശ്നങ്ങൾ പരിഹരിക്കാൻ ശ്രമിക്കുന്നുണ്ടെന്നുമാണ് ഉടമയുടെ വാദം. നിലവിൽ റെഡ് ക്രോസ് ദുരിതബാധിതർക്ക് അടിയന്തര താമസസൗകര്യം വാഗ്ദാനം ചെയ്തിട്ടുണ്ട്. തങ്ങളുടെ സുരക്ഷ ഉറപ്പാക്കുന്നത് വരെയും കെട്ടിടത്തിലെ അറ്റകുറ്റപ്പണികൾ പൂർത്തിയാക്കുന്നത് വരെയും നിയമപോരാട്ടം തുടരുമെന്ന് വാടകക്കാർ അറിയിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Broken pipes and a broken heating system; Families in a high-rise building in Montreal are in distress
