കാനഡയിൽ PR സ്വപ്നം കാണുന്ന വിദഗ്ദ്ധ തൊഴിലാളികൾക്ക് പ്രതീക്ഷയേകി പുതിയ എക്സ്പ്രസ് എൻട്രി നറുക്കെടുപ്പ് ഫലം IRCC പുറത്തുവിട്ടു. പ്രത്യേക തൊഴിൽ നൈപുണ്യമുള്ളവർക്കായി IRCC പുതുതായി ആരംഭിച്ച ‘ട്രേഡ്സ് ഒക്യുപേഷൻസ്’ (Trades Occupations) വിഭാഗത്തിൽ ഉൾപ്പെടുന്ന 3000 പേർക്കാണ് ഇത്തവണ കാനഡയിലേക്ക് സ്ഥിരതാമസത്തിനായി അപേക്ഷിക്കാനുള്ള ക്ഷണം (ITA) ലഭിച്ചിരിക്കുന്നത്. 2026-ലെ ഇരുപതാമത്തെ നറുക്കെടുപ്പും ട്രേഡ്സ് വിഭാഗത്തിലെ ആദ്യ നറുക്കെടുപ്പുമാണിത്.
കുറഞ്ഞ കടമ്പ; ആശ്വാസമായി സ്കോർ
വിവിധ ട്രേഡ്സ് തസ്തികകളിലുള്ളവർക്ക് കൂടുതൽ പരിഗണന നൽകിയുള്ള നറുക്കെടുപ്പിൽ സ്കോർ പരിധിയിലും വലിയ ആശ്വാസമാണ് ഉദ്യോഗാർത്ഥികൾക്ക് ലഭിച്ചിരിക്കുന്നത്. 477 ആണ് ഇത്തവണ നിശ്ചയിച്ചിട്ടുള്ള ഏറ്റവും കുറഞ്ഞ CRS സ്കോർ. 2026 ഫെബ്രുവരി 14 രാത്രി 8:53-ന് (UTC സമയം) മുൻപ് പ്രൊഫൈൽ തയ്യാറാക്കിയവരെയൊക്കെയാണ് ഈ നറുക്കെടുപ്പിൽ പരിഗണിച്ചിട്ടുള്ളത്. സാധാരണ എക്സ്പ്രസ് എൻട്രി നറുക്കെടുപ്പുകളിൽ ഉയർന്ന സ്കോർ ആവശ്യമുള്ള സ്ഥാനത്താണ് പ്രത്യേക വിഭാഗത്തിന് ഈ ഇളവ് ലഭിച്ചിരിക്കുന്നത്.
ഈ വർഷം ഇതുവരെ നടന്ന എക്സ്പ്രസ് എൻട്രി നറുക്കെടുപ്പുകളുടെ കണക്കുകൾ പരിശോധിച്ചാൽ രാജ്യത്തിനകത്തുള്ളവർക്കും പ്രത്യേക അനുഭവസമ്പത്തുള്ളവർക്കുമാണ് ഐആർസിസി കൂടുതൽ മുൻഗണന നൽകിയിരിക്കുന്നതെന്ന് വ്യക്തമാകും. പ്രത്യേകിച്ചും പ്രൊവിൻഷ്യൽ നോമിനി പ്രോഗ്രാം (PNP), കനേഡിയൻ എക്സ്പീരിയൻസ് ക്ലാസ് (CEC) എന്നിവയിലൂടെ ഇതിനകം കാനഡയിലുള്ളവർക്കാണ് കൂടുതൽ പരിഗണന ലഭിക്കുന്നത്. 2026-ൽ ഇതുവരെ ഐആർസിസി 58,830 അപേക്ഷാ ക്ഷണങ്ങളാണ് നൽകിയത്. ഇതിൽ ഏറ്റവും കൂടുതൽ അപേക്ഷകൾ പോയത് കനേഡിയൻ എക്സ്പീരിയൻസ് ക്ലാസ് (30,250), ഫ്രഞ്ച് ഭാഷാ പ്രാവീണ്യമുള്ളവർ (18,000) എന്നീ വിഭാഗങ്ങളിലേക്കാണ്.
കാനഡയിലെ തൊഴിൽ വിപണിയിലെ കടുത്ത ആവശ്യകത കണക്കിലെടുത്താണ് നിർമ്മാണം, അറ്റകുറ്റപ്പണി തുടങ്ങിയ മേഖലകളിൽ പ്രാഗത്ഭ്യമുള്ള ട്രേഡ്സ് തൊഴിലാളികളെ പ്രത്യേകമായി തിരഞ്ഞെടുക്കുന്നത്. വരും ആഴ്ചകളിലും വിവിധ തൊഴിൽ വിഭാഗങ്ങളെ കേന്ദ്രീകരിച്ച് സമാനമായ നറുക്കെടുപ്പുകൾ ഉണ്ടാകാനാണ് സാധ്യത.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Express Entry Trades Occupations; Here are the details of the draw held on April 2.
