മാറുന്നു, കാനഡയുടെ കുടിയേറ്റ നയം; എക്സ്പ്രസ് എൻട്രി സിസ്റ്റത്തിൽ വരാനിരിക്കുന്നത് വൻ മാറ്റങ്ങൾ

അടുത്ത വർഷം മുതൽ കാനഡയുടെ എക്സ്പ്രസ് എൻട്രി സിസ്റ്റത്തിൽ വൻ മാറ്റങ്ങളാണ് വരാനിരിക്കുന്നത്. പുതിയ സാമ്പത്തിക, തൊഴിൽ വിപണി ആവശ്യങ്ങൾ നിറവേറ്റുന്നതിനായി ​IRCC വലിയ പരിഷ്കരിക്കാരങ്ങൾക്ക് ഒരുങ്ങുകയാണ്. ഇതിലൂടെ കാനഡയുടെ മത്സരക്ഷമത വർദ്ധിപ്പിക്കാനും, രാജ്യത്തിന്റെ വളർച്ചയ്ക്ക് സംഭാവന ചെയ്യാൻ കഴിവുള്ള ഉദ്യോഗാർത്ഥികളെ ആകർഷിക്കാനും ആണ് ലക്ഷ്യമിടുന്നത്.

2026-ൽ എക്സ്പ്രസ് എൻട്രിയിൽ പുതിയതായി ‘ലീഡർഷിപ്പ് ആൻഡ് ഇന്നവേഷൻ’ എന്ന വിഭാഗം ഉൾപ്പെടുത്താൻ IRCC ആലോചിക്കുന്നുണ്ട്. ദീർഘകാല തൊഴിൽ ക്ഷാമം പരിഹരിക്കുന്നതിനുമപ്പുറം, കാനഡയുടെ ആഗോള മത്സരക്ഷമത വർദ്ധിപ്പിക്കാൻ കഴിവുള്ളവരെ തിരഞ്ഞെടുക്കുകയാണ് ഈ വിഭാഗത്തിന്റെ ലക്ഷ്യം. താഴെ പറയുന്ന ജോലികൾ ഈ വിഭാഗത്തിൽ ഉൾപ്പെടുത്താൻ സാധ്യതയുണ്ട്:

സീനിയർ മാനേജർമാർ: ബിസിനസ് വിജയത്തിന് നേതൃത്വം നൽകാൻ കഴിയുന്ന പരിചയസമ്പന്നരായ ഉദ്യോഗസ്ഥർ.

സൈനികർ: കാനഡയുടെ സൈനിക ശേഷി വർദ്ധിപ്പിക്കുന്നതിനായി സഖ്യരാജ്യങ്ങളിൽ നിന്നുള്ള വിദഗ്ദ്ധരായ സൈനികർ.

ശാസ്ത്രജ്ഞന്മാരും ഗവേഷകരും: രാജ്യത്തിന്റെ സാമ്പത്തിക വളർച്ചയെ സഹായിക്കുന്ന കണ്ടുപിടുത്തങ്ങൾ നടത്തുന്നവർ.

നിലവിലുള്ള വിഭാഗങ്ങൾ തുടരുമോ?

2023-ൽ അവതരിപ്പിച്ച നിലവിലെ വിഭാഗങ്ങൾ 2026-ലും തുടരാൻ സാധ്യതയുണ്ട്. ഇതിൽ ചില മാറ്റങ്ങൾ വരുത്തുന്നതിനെക്കുറിച്ച് IRCC പൊതുജനങ്ങളുടെ അഭിപ്രായം തേടുന്നുണ്ട്.

നിലവിലെ പ്രധാന വിഭാഗങ്ങൾ ഇവയാണ്:

ഫ്രഞ്ച് ഭാഷാ പ്രാവീണ്യം: ഫ്രഞ്ച് സംസാരിക്കുന്ന സമൂഹങ്ങളെ പിന്തുണയ്ക്കാൻ ലക്ഷ്യമിട്ടുള്ളതാണ് ഈ വിഭാഗം.

വിവിധ മേഖലകളിലെ തൊഴിലുകൾ: ആരോഗ്യം, സാമൂഹ്യ സേവനം, ശാസ്ത്രം, സാങ്കേതികവിദ്യ, എഞ്ചിനീയറിംഗ്, ഗണിതം (STEM), കൃഷി, വ്യാപാരം, വിദ്യാഭ്യാസം തുടങ്ങിയ മേഖലകളിലെ തൊഴിൽ ക്ഷാമം പരിഹരിക്കുക എന്നതാണ് ലക്ഷ്യം.

യോഗ്യതാ മാനദണ്ഡങ്ങളിലെ മാറ്റങ്ങൾ

വർഗ്ഗാധിഷ്ഠിത തിരഞ്ഞെടുപ്പുകൾക്കായി അപേക്ഷിക്കുന്നവരുടെ യോഗ്യതാ മാനദണ്ഡങ്ങളിലും മാറ്റങ്ങൾ വരാം. നിലവിൽ 6 മാസത്തെ പ്രവൃത്തി പരിചയം മതിയായിരുന്നത് 12 മാസമായി ഉയർത്തുന്നതിനെക്കുറിച്ച് IRCC ആലോചിക്കുന്നുണ്ട്. കൂടാതെ, ആരോഗ്യ സംരക്ഷണം പോലെയുള്ള നിയന്ത്രിത തൊഴിൽ മേഖലകളിൽ കനേഡിയൻ പ്രവൃത്തിപരിചയമുള്ളവർക്ക് മുൻഗണന നൽകാനും സാധ്യതയുണ്ട്.

പൊതുജനങ്ങൾക്ക് അഭിപ്രായം അറിയിക്കാം

2026-ലെ മാറ്റങ്ങളെക്കുറിച്ച് പൊതുജനങ്ങളുടെ അഭിപ്രായങ്ങൾ തേടുന്നതിനുള്ള ഓൺലൈൻ സർവേ IRCC ആരംഭിച്ചിട്ടുണ്ട്. വ്യക്തികൾക്കും, ബിസിനസ്സുകൾക്കും, സംഘടനകൾക്കും ഈ സർവേയിൽ പങ്കെടുത്ത് നിർദ്ദേശങ്ങൾ സമർപ്പിക്കാം. 2025 സെപ്റ്റംബർ 3 വരെയാണ് അഭിപ്രായങ്ങൾ രേഖപ്പെടുത്താനുള്ള സമയം. ഈ അഭിപ്രായങ്ങളുടെ അടിസ്ഥാനത്തിലായിരിക്കും 2026-ലെ എക്സ്പ്രസ് എൻട്രി സിസ്റ്റത്തിൽ അന്തിമ തീരുമാനമെടുക്കുക.

New Canada Express Entry Draw Category Changes For 2026