മാഡ്രിഡ്: മകന് ഓട്ടിസം ബാധിച്ച വിവരവും അതിനെത്തുടർന്ന് കുടുംബം നേരിട്ട വെല്ലുവിളികളും വെളിപ്പെടുത്തി സ്പാനിഷ് ഫുട്ബോൾ താരം മാർക്ക് കുക്കുറെയ്യ. ബിബിഒ സ്പോർട്സിന് നൽകിയ അഭിമുഖത്തിലാണ് തന്റെ വ്യക്തിജീവിതത്തെയും കരിയറിനെയും കുറിച്ച് വികാരഭരിതനായി താരം സംസാരിച്ചത്. രോഗവിവരം ആദ്യം തിരിച്ചറിഞ്ഞപ്പോൾ താനും പങ്കാളി ക്ലോഡിയ റോഡ്രിഗസും കഠിനമായ ഘട്ടത്തിലൂടെയാണ് കടന്നുപോയതെന്നും, അവസ്ഥ മനസ്സിലാക്കി പുതിയ കാര്യങ്ങൾ പഠിച്ചെടുക്കുകയായിരുന്നുവെന്നും കുക്കുറെയ്യ വ്യക്തമാക്കി.
തുടക്കത്തിൽ സാധാരണ സ്കൂളിൽ അയച്ചെങ്കിലും അതിനോട് പൊരുത്തപ്പെടാൻ മകന് സാധിച്ചിരുന്നില്ല. തുടർന്ന് പ്രത്യേക ശ്രദ്ധയും പരിചരണവും നൽകുന്ന സ്കൂളിലേക്ക് മകനെ മാറ്റുകയായിരുന്നു. നിലവിൽ ക്ലബ്ബുകൾ മാറുന്നതും കുടുംബ സമേതമുള്ള യാത്രകളും മകന്റെ തെറാപ്പിയും വിദ്യാഭ്യാസവും ഉറപ്പാക്കുന്ന സൗകര്യങ്ങൾ കൂടി പരിഗണിച്ചാണ് തീരുമാനിക്കുന്നതെന്നും അദ്ദേഹം കൂട്ടിച്ചേർത്തു.
മകന് തന്റെ മുടി ഏറെ ഇഷ്ടമായതിനാലാണ് അത് നീട്ടി വളർത്തുന്നതെന്നും, ഭാവിയിൽ ഏതെങ്കിലും ഘട്ടത്തിൽ മറന്നുപോയാലും ഈ മുടി കണ്ടെങ്കിലും മകന് തന്നെ തിരിച്ചറിയാൻ സാധിക്കുമെന്നാണ് കരുതുന്നതെന്നും കുക്കുറെയ്യ പറഞ്ഞു. സമാനമായ രീതിയിൽ ഓട്ടിസം ബാധിച്ച കുട്ടികളെ വളർത്തുന്ന മറ്റ് മാതാപിതാക്കൾക്ക് പിന്തുണയും ധൈര്യവും നൽകാനാണ് താൻ ഈ അനുഭവങ്ങൾ പരസ്യമായി പങ്കുവെക്കുന്നതെന്നും സ്പാനിഷ് താരം വ്യക്തമാക്കി.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
"Even if he forgets me, let him at least recognize me by this hair"—Footballer Marc Cucurella opens up about his son's medical condition.
