ട്രെൻഡായി ETFs നിക്ഷേപങ്ങൾ; തുടക്കക്കാരും നിക്ഷേപകരും അറിയേണ്ടതെല്ലാം

എക്സ്ചേഞ്ച് ട്രേഡഡ് ഫണ്ടുകൾ (ETFs) സമീപകാലത്ത് നിക്ഷേപകർക്കിടയിൽ വലിയ പ്രചാരം നേടിയിട്ടുണ്ട്. ETFs മാത്രം ഉപയോഗിച്ചുള്ള നിക്ഷേപ തന്ത്രങ്ങളും വർധിച്ചുവരികയാണ്. എന്നാൽ, ഇത് പോർട്ട്ഫോളിയോയിൽ അമിതമായ വൈവിധ്യവത്കരണത്തിന് (over-diversification) കാരണമാകുമോ എന്ന ആശങ്ക ചില നിക്ഷേപകർക്കുണ്ട്. ഒരു പോർട്ട്ഫോളിയോ മുഴുവനായും ETFs-ൽ നിക്ഷേപിക്കുന്നത് പ്രായോഗികമായ ഒരു തന്ത്രമാണെന്ന് സാമ്പത്തിക വിദഗ്ദ്ധർ പറയുന്നു. എന്നിരുന്നാലും, നിങ്ങൾ വാങ്ങുന്ന ഫണ്ടുകളിൽ എന്തൊക്കെ ഓഹരികളും ബോണ്ടുകളും ഉൾപ്പെടുന്നുണ്ടെന്ന് അറിഞ്ഞിരിക്കേണ്ടത് അത്യാവശ്യമാണ്.

എഡ്വേർഡ് ജോൺസിലെ പ്രിൻസിപ്പൽ ആയ ജോനാഥൻ റിവാർഡ് പറയുന്നതനുസരിച്ച്, ETF-ൽ ശ്രദ്ധ കേന്ദ്രീകരിക്കുന്ന നിക്ഷേപകർ അവരുടെ സമയപരിധിയും (time horizon) റിസ്കെടുക്കാനുള്ള കഴിവും (risk appetite) പരിഗണിക്കേണ്ടത് പ്രധാനമാണ്. “നിങ്ങൾക്ക് 100% ETFs-ൽ നിക്ഷേപിക്കാം. പക്ഷേ, ആ ETF-ൽ എന്താണ് ഉള്ളതെന്നും, അതിലെ ഓഹരി വിഹിതം എങ്ങനെയാണെന്നും നിങ്ങൾ അറിഞ്ഞിരിക്കണം. ചില ETFs-ൽ ഓഹരികളും ബോണ്ടുകളും ഒരുമിച്ച് വരും, ചിലത് ഏതെങ്കിലും ഒരു പ്രത്യേക മേഖലയിൽ മാത്രം ശ്രദ്ധ കേന്ദ്രീകരിക്കുന്നവയായിരിക്കും,”എന്ന് റിവാർഡ് വിശദീകരിച്ചു. ഒന്നിലധികം ETFs കൈവശം വെക്കുമ്പോൾ, മൊത്തത്തിലുള്ള ആസ്തി വിഭജനം (asset allocation) എങ്ങനെയായിരിക്കുമെന്ന് മനസിലാക്കേണ്ടതും പ്രധാനമാണ്.

മാക്കൻസി ഇൻവെസ്റ്റ്‌മെന്റ്‌സിന്റെ ETF ഉൽപ്പന്ന തന്ത്രജ്ഞയായ പ്രെർണ മാത്യൂസ് നിക്ഷേപം വൈവിധ്യവത്കരിക്കുന്നതിനെക്കുറിച്ച് ചില പ്രധാന കാര്യങ്ങൾ ചൂണ്ടിക്കാട്ടി. നിക്ഷേപം ഭൂമിശാസ്ത്രപരമായ അതിരുകൾക്കപ്പുറത്തേക്ക് വ്യാപിപ്പിക്കേണ്ടത് പ്രധാനമാണ്. കാനഡ, യു.എസ്, അന്താരാഷ്ട്ര എക്സ്പോഷർ എന്നിവയിൽ മാത്രം ഒതുങ്ങാതെ, സ്ഥിര വരുമാനം (fixed income), റിയൽ എസ്റ്റേറ്റ് പോലുള്ള യഥാർത്ഥ ആസ്തികൾ (real assets), തീമാറ്റിക് ഉൽപ്പന്നങ്ങൾ (thematic products), ഇതര ETFs (alternative ETFs) എന്നിവയും പരിഗണിക്കാവുന്നതാണ്. ഈ വൈവിധ്യം നിക്ഷേപത്തിന് വ്യത്യസ്ത വരുമാന സ്രോതസ്സുകൾ നൽകും. വ്യത്യസ്ത നിക്ഷേപ ശൈലികളുള്ള ETFs വാങ്ങുന്നതും ഒരു നല്ല തന്ത്രമാണ്. പരമ്പരാഗത ഇൻഡക്സ് ETFs-നൊപ്പം, സജീവമായി കൈകാര്യം ചെയ്യുന്ന (actively managed) ETFs-ഉം ചേർക്കുന്നത് ഉദാഹരണമാണ്.

കൂടുതൽ കാലയളവിലേക്ക് നിക്ഷേപിക്കുന്നവർ വളർച്ചയ്ക്ക് ഊന്നൽ നൽകാനും ഉയർന്ന ഓഹരി എക്സ്പോഷറിലൂടെ കൂടുതൽ റിസ്കെടുക്കാനും തയ്യാറായേക്കാം. സ്ഥിര വരുമാനത്തിന്റെ കാര്യത്തിൽ, ഹ്രസ്വകാല, ദീർഘകാല വരുമാനങ്ങൾ തമ്മിലുള്ള വ്യത്യാസങ്ങൾ ശ്രദ്ധിക്കണമെന്ന് മാത്യൂസ് ഓർമ്മിപ്പിച്ചു. അമിതമായ വൈവിധ്യവത്കരണം ചിലപ്പോൾ ദോഷകരമായി മാറിയേക്കാം. ഉദാഹരണത്തിന്, ഒരു നിക്ഷേപകൻ കനേഡിയൻ ഓഹരികളിൽ ഒരു ETF വഴി നിക്ഷേപിക്കുകയും, അതേസമയം ഒരു അസറ്റ് അലോക്കേഷൻ ETF വാങ്ങുകയും ചെയ്താൽ, അയാൾ പ്രതീക്ഷിച്ചതിലും കൂടുതൽ കനേഡിയൻ ഓഹരികളിൽ നിക്ഷേപിച്ചേക്കാം. ഓരോ ETF-ലും എന്താണ് ഉൾപ്പെട്ടിരിക്കുന്നതെന്ന് പൂർണ്ണമായി മനസ്സിലാക്കാതിരുന്നാൽ ഇത്തരം പ്രശ്നങ്ങൾ ഉണ്ടാകാമെന്നും അവർ കൂട്ടിച്ചേർത്തു.

ETFs investments are a trend; everything beginners and investors need to know