തലസ്ഥാന നഗരമായ എഡ്മണ്ടനുമായുള്ള റെയിൽ ബന്ധം സ്ഥാപിക്കുന്നത് വേഗത്തിലാക്കണമെന്ന് ആവശ്യപ്പെട്ട് ജാസ്പർ നഗരസഭ രംഗത്ത്. നഗരസഭയുടെ റെയിൽ മാസ്റ്റർ പ്ലാനിന്റെ ആദ്യഘട്ടത്തിൽ തന്നെ ഈ റെയിൽ കണക്ഷൻ ഉൾപ്പെടുത്തണമെന്ന് പ്രവിശ്യയോട് ആവശ്യപ്പെടാനാണ് കൗൺസിൽ യോഗം ഏകകണ്ഠമായി തീരുമാനിച്ചിരിക്കുന്നത്. നിലവിലെ പദ്ധതി പ്രകാരം 60 വർഷം കൊണ്ടാണ് എഡ്മണ്ടൻ റെയിൽ കണക്ഷൻ പൂർത്തിയാക്കുക. ഇത് 30 വർഷമെന്ന സമയപരിധിക്കുള്ളിൽ പൂർത്തീകരിക്കണമെന്നാണ് ജാസ്പറിന്റെ ആവശ്യം.
എഡ്മണ്ടൻ നഗരത്തിലെ അന്താരാഷ്ട്ര വിമാനത്താവളവുമായി റെയിൽ ബന്ധം സ്ഥാപിക്കുന്നത് ജാസ്പറിന്റെ ടൂറിസം മേഖലയ്ക്ക് വലിയ ഉണർവ് നൽകുമെന്ന് ജാസ്പർ ചീഫ് അഡ്മിനിസ്ട്രേറ്റീവ് ഓഫീസർ ബിൽ ഗിവൻ പറഞ്ഞു. ഇത് നഗരത്തിലെ ഗതാഗതക്കുരുക്ക് ഒഴിവാക്കാനും സഹായിക്കും. പ്രവിശ്യ അവരുടെ റെയിൽവേ പദ്ധതികൾ വികസിപ്പിക്കുമ്പോൾ ജാസ്പറിനെയും പരിഗണിക്കണം. ഇതിനായി തങ്ങളുടെ എം.എൽ.എ, മന്ത്രിമാർ, പ്രീമിയർ എന്നിവരുമായി ചർച്ച നടത്തുമെന്നും ബിൽ ഗിവൻ വ്യക്തമാക്കി.
കഴിഞ്ഞ വേനൽക്കാലത്ത് ഉണ്ടായ കാട്ടുതീയിൽ നഗരത്തിലെ 30 ശതമാനത്തോളം കെട്ടിടങ്ങൾ നശിച്ചിരുന്നു. ഈ സാഹചര്യത്തിൽ തലസ്ഥാന നഗരവുമായുള്ള റെയിൽ ബന്ധം നഗരത്തിനും പാർക്കിനും പുനർനിർമ്മാണ പ്രവർത്തനങ്ങളിൽ ഏറെ സഹായകമാകും. ഹ്രസ്വകാല ചിന്തകൾ നഗരത്തിന്റെ വീണ്ടെടുപ്പിന് തടസ്സമാണെന്നും ദീർഘകാല നേട്ടങ്ങളാണ് പ്രധാനം എന്നും ജാസ്പർ പാർക്ക് ചേംബർ ഓഫ് കോമേഴ്സ് പ്രതിനിധി പോൾ ബട്ട്ലർ പറഞ്ഞു. കാറുകളിൽ നിന്നുള്ള ശബ്ദവും അന്തരീക്ഷ മലിനീകരണവും കുറച്ച് സ്ഥിരമായ ആളുകളുടെ ഒഴുക്ക് ഉറപ്പാക്കാൻ റെയിൽ കണക്ഷനിലൂടെ സാധിക്കുമെന്നും അദ്ദേഹം കൂട്ടിച്ചേർത്തു.
2024 ഏപ്രിലിൽ ആണ് പ്രവിശ്യ റെയിൽവേ മാസ്റ്റർ പ്ലാൻ പ്രഖ്യാപിച്ചത്. എഡ്മണ്ടൻ-കാൽഗറി നഗരങ്ങളെ റെഡ് ഡീർ വഴി ബന്ധിപ്പിക്കുന്നതായിരുന്നു പദ്ധതിയുടെ പ്രധാന ഭാഗം. എന്നാൽ, എഡ്മണ്ടൻ-ജാസ്പർ കണക്ഷന് സാധ്യത കുറവാണെന്ന് റെയിൽ പ്ലാനർമാർ അറിയിച്ചിരുന്നു. ഉയർന്ന നിർമ്മാണ ചെലവ്, കുറഞ്ഞ യാത്രാ സാധ്യതകൾ, ഭാവിയിലെ ജനസംഖ്യാ വർധനവിലെ അനിശ്ചിതത്വം എന്നിവയാണ് ഇതിന് കാരണമായി അവർ ചൂണ്ടിക്കാട്ടിയത്. റെയിൽ ലൈൻ സ്ഥാപിക്കാൻ മതിയായ സ്ഥലം ഇല്ലാത്തതും പദ്ധതിക്ക് വെല്ലുവിളിയാണെന്ന് കനേഡിയൻ നാഷണൽ റെയിൽവേ അറിയിച്ചു. ഈ വിഷയത്തിൽ പൊതുജനങ്ങളിൽ നിന്നും വിവിധ നഗരസഭകളിൽ നിന്നും പ്രവിശ്യ അഭിപ്രായങ്ങൾ തേടിയിരുന്നു. ഈ വർഷം അവസാനത്തോടെ റെയിൽ മാസ്റ്റർ പ്ലാനിന് അന്തിമ രൂപം നൽകുമെന്നാണ് പ്രതീക്ഷിക്കുന്നത്.
Edmonton rail connection should be expedited: City of Jasper steps up demand
