ബാങ്ക് ഉദ്യോഗസ്ഥരെന്ന പേരിൽ കോൾ വരാറുണ്ടോ? എന്നാൽ ഇതൊന്ന് ശ്രദ്ധിച്ചോള്ളൂ

ടൊറന്റോ: ബാങ്ക് ഉദ്യോഗസ്ഥരെന്ന വ്യാജേന ഫോൺ വിളിച്ച്, ആളുകളുടെ ഭയവും ആശങ്കയും ചൂഷണം ചെയ്ത് കോടിക്കണക്കിന് ഡോളർ തട്ടിയെടുക്കുന്ന സംഘങ്ങൾക്കെതിരെ ജാഗ്രതാ നിർദ്ദേശം നൽകി ടൊറന്റോ പോലീസ്. സാങ്കേതികവിദ്യയേക്കാൾ ഉപരിയായി മനുഷ്യരുടെ മനഃശാസ്ത്രത്തെയും വികാരങ്ങളെയും ലക്ഷ്യമിട്ടുള്ള തന്ത്രങ്ങളാണ് തട്ടിപ്പുകാർ ഉപയോഗിക്കുന്നതെന്ന് അന്വേഷണ ഉദ്യോഗസ്ഥരും വിദഗ്ധരും വ്യക്തമാക്കുന്നു. ടൊറന്റോ നഗരത്തിൽ മാത്രം ഈ വർഷം ഇതുവരെ 224 മില്യൺ ഡോളറിന്റെ നഷ്ടം റിപ്പോർട്ട് ചെയ്തിട്ടുണ്ട്. കാനഡയിലാകെ കഴിഞ്ഞ വർഷം 704 മില്യൺ ഡോളറിലധികം പണം ഇത്തരത്തിൽ നഷ്ടപ്പെട്ടിട്ടുണ്ടെന്നാണ് കനേഡിയൻ ആന്റി-ഫ്രോഡ് സെന്ററിന്റെ കണക്കുകൾ വ്യക്തമാക്കുന്നത്.

തുടക്കത്തിൽ കൃത്യമായ വിവരങ്ങൾ പറഞ്ഞ് വിശ്വാസ്യത നേടിയ ശേഷമാണ് തട്ടിപ്പുകാർ ഇരകളെ കെണിയിലാക്കുന്നത്. അടുത്തിടെ ടൊറന്റോയിൽ നടന്ന 20,000 ഡോളറിന്റെ തട്ടിപ്പിൽ, ഇരയുടെ പേരും ബാങ്ക് അക്കൗണ്ടിന്റെ അവസാന നാല് അക്കങ്ങളും താമസസ്ഥലവും കൃത്യമായി പറഞ്ഞാണ് തട്ടിപ്പുകാരൻ ബാങ്ക് ജീവനക്കാരനായി അഭിനയിച്ചത്. തുടർന്ന്, അക്കൗണ്ടിൽ നിന്ന് പണം നഷ്ടപ്പെട്ടെന്നോ കള്ളപ്പണം വെളുപ്പിക്കൽ കേസിൽ പെട്ടിട്ടുണ്ടെന്നോ പറഞ്ഞ് ഇരകളിൽ വലിയ ഭയം സൃഷ്ടിക്കുന്നു. ഭയവും പരിഭ്രാന്തിയും ഉണ്ടാകുന്നതോടെ മനുഷ്യരുടെ യുക്തിപരമായ ചിന്താശേഷി കുറയുമെന്നും, ഈ മാനസികാവസ്ഥ മുതലെടുത്താണ് തട്ടിപ്പുകാർ പണം കൈക്കലാക്കുന്നതെന്നും മനഃശാസ്ത്ര വിദഗ്ധ മാർട്ടിന ഡോവ് ചൂണ്ടിക്കാണിക്കുന്നു.

തട്ടിപ്പിനിരയാകുന്ന വ്യക്തിക്ക് മറ്റുള്ളവരുമായി ബന്ധപ്പെടാൻ സമയം നൽകാതെ മണിക്കൂറുകളോളം ഫോണിൽ പിടിച്ചുനിർത്തുന്നതാണ് ഇവരുടെ രീതി. ഇത്തരത്തിൽ പരിഭ്രാന്തിയിലായ ഒരു വ്യക്തി സ്വന്തം സമ്പാദ്യവും വായ്പയെടുത്ത പണവും ഉൾപ്പെടെയാണ് തട്ടിപ്പുകാർക്ക് കൈമാറിയത്. ഇത്തരം കെണികളിൽ വീഴാതിരിക്കാൻ അടിയന്തിരമായി പണമടയ്ക്കാൻ ആവശ്യപ്പെടുന്ന ഫോൺ കോളുകൾ വരുമ്പോൾ ജാഗ്രത പാലിക്കണമെന്ന് പോലീസ് അറിയിച്ചു. ബാങ്കിൽ നിന്നോ മറ്റ് സ്ഥാപനങ്ങളിൽ നിന്നോ ആണെന്ന് പറഞ്ഞ് കോളുകൾ വന്നാൽ ഉടൻ ഫോൺ വിച്ഛേദിക്കുക, അതിനുശേഷം ബാങ്കിന്റെ ഔദ്യോഗിക നമ്പറിലേക്ക് തിരിച്ചുവിളിച്ച് കാര്യങ്ങൾ ഉറപ്പുവരുത്തുക എന്നിവ മാത്രമാണ് ഇതിൽ നിന്നും രക്ഷപ്പെടാനുള്ള പ്രധാന മാർഗ്ഗമെന്ന് അന്വേഷണ ഉദ്യോഗസ്ഥനായ ഡേവ് കോഫി വ്യക്തമാക്കി.

📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla

Do you get calls claiming to be bank officials? But be careful with this.