ഒട്ടാവ : കാനഡയിൽ കഴിഞ്ഞ സാമ്പത്തിക വർഷം ഫെഡറൽ ഗവൺമെന്റ് ജീവനക്കാർക്കിടയിൽ 2,600-ലധികം ദുഷ്പെരുമാറ്റങ്ങളും നിയമലംഘനങ്ങളും റിപ്പോർട്ട് ചെയ്തതായി ഔദ്യോഗിക കണക്കുകൾ വ്യക്തമാക്കുന്നു. ഇതിന്റെ അടിസ്ഥാനത്തിൽ കുറഞ്ഞത് 145 ജീവനക്കാരെ സർവീസിൽ നിന്ന് പിരിച്ചുവിടുകയും 783 പേരെ ശമ്പളമില്ലാതെ സസ്പെൻഡ് ചെയ്യുകയും ചെയ്തു. ജോലിസമയത്തെ ഉറക്കം, ലൈംഗിക അതിക്രമം, വംശീയ അധിക്ഷേപം, ജോലിസ്ഥലത്തെ അക്രമം, സ്വകാര്യതാ ലംഘനം, ടൈംഷീറ്റ് തട്ടിപ്പ്, സർക്കാർ സ്വത്തുവകകളുടെ മോഷണം തുടങ്ങിയ കുറ്റകൃത്യങ്ങളാണ് ജീവനക്കാർക്കെതിരെ കണ്ടെത്തിയത്. പിരിച്ചുവിടലിന് പുറമെ 705 പേർക്ക് രേഖാമൂലം താക്കീത് നൽകുകയും 1,048 പേർക്കെതിരെ തരംതാഴ്ത്തൽ, നിർബന്ധിത പരിശീലനം തുടങ്ങിയ അച്ചടക്ക നടപടികൾ സ്വീകരിക്കുകയും ചെയ്തു.
പ്രിവി കൗൺസിൽ ഓഫീസിന്റെ നിർദ്ദേശപ്രകാരം 38 സർക്കാർ വകുപ്പുകളിൽ നിന്നും ഏജൻസികളിൽ നിന്നുമായി ശേഖരിച്ച വിവരങ്ങൾ പ്രകാരം 2,681 കേസുകളാണ് സ്ഥിരീകരിച്ചിട്ടുള്ളത്. കാനഡ റവന്യൂ ഏജൻസി, കറക്ഷണൽ സർവീസ് കാനഡ, ബോർഡർ സർവീസസ് ഏജൻസി തുടങ്ങിയ പ്രധാന വകുപ്പുകളിലാണ് കൂടുതൽ ക്രമക്കേടുകൾ റിപ്പോർട്ട് ചെയ്തത്. സി.ആർ.എ ജീവനക്കാർ നികുതി ഫയലുകളിൽ കൃത്രിമം കാട്ടുകയും സർക്കാർ ഫണ്ട് സ്വന്തം അക്കൗണ്ടുകളിലേക്ക് മാറ്റുകയും ചെയ്തപ്പോൾ, ബോർഡർ സർവീസ് ഉദ്യോഗസ്ഥർ കുറ്റവാളികളുമായി ബന്ധം പുലർത്തുകയും ഡാറ്റാബേസുകൾ ദുരുപയോഗം ചെയ്യുകയും ചെയ്തതായി കണ്ടെത്തിയിട്ടുണ്ട്.
കൂടുതൽ പിരിച്ചുവിടലുകൾ നടന്നത് കാനഡ റവന്യൂ ഏജൻസിയിലാണ് (25 കേസുകൾ). ഗ്ലോബൽ അഫയേഴ്സ് കാനഡ (22), സ്റ്റാറ്റിസ്റ്റിക്സ് കാനഡ (15) എന്നിവയാണ് തൊട്ടുപിന്നിലുള്ളത്. ആകെ റിപ്പോർട്ട് ചെയ്ത കേസുകളിൽ മൂന്നിൽ രണ്ട് ഭാഗവും എംപ്ലോയ്മെന്റ് ആൻഡ് സോഷ്യൽ ഡെവലപ്മെന്റ് കാനഡ ഉൾപ്പെടെയുള്ള അഞ്ച് പ്രധാന സ്ഥാപനങ്ങളിലാണ്. ജീവനക്കാരുടെ എണ്ണത്തിന് ആനുപാതികമായി പരിശോധിക്കുമ്പോൾ കറക്ഷണൽ സർവീസ് കാനഡയിലാണ് ഏറ്റവും ഉയർന്ന നിരക്കുള്ളത്. ഇവിടെ ഓരോ 1,000 ജീവനക്കാർക്കിടയിലും 21.2 കേസുകൾ റിപ്പോർട്ട് ചെയ്യപ്പെട്ടു.
റോയൽ കനേഡിയൻ മൗണ്ടഡ് പോലീസ് കഴിഞ്ഞ വർഷം 443 ദുഷ്പെരുമാറ്റ കേസുകൾ രേഖപ്പെടുത്തി. ഇതിൽ നടപടികൾ പൂർത്തിയായ 158 കേസുകളിൽ ഏഴ് പിരിച്ചുവിടലുകളും 10 തരംതാഴ്ത്തലുകളും ഉൾപ്പെടുന്നു. കൂടാതെ, കോവിഡ് കാലത്തെ ആനുകൂല്യങ്ങൾ അനർഹമായി കൈപ്പറ്റിയതിന് കഴിഞ്ഞ വർഷം പിരിച്ചുവിട്ട 78 സി.ആർ.എ ജീവനക്കാരുടെ കണക്കുകൾ ഈ പുതിയ റിപ്പോർട്ടിൽ ഉൾപ്പെട്ടിട്ടില്ല. മൊത്തം സിവിൽ സർവീസിലെ 3,12,178 ജീവനക്കാരിൽ ഒരു ശതമാനത്തിൽ താഴെ (0.86%) ആളുകൾ മാത്രമാണ് ഇത്തരത്തിൽ അച്ചടക്ക നടപടികൾ നേരിട്ടതെന്ന് കണക്കുകൾ സൂചിപ്പിക്കുന്നു.
നികുതിദായകരുടെ പണമുപയോഗിച്ച് പ്രവർത്തിക്കുന്ന ബ്യൂറോക്രസിയിലെ സുതാര്യത ഉറപ്പാക്കാൻ ഇത്തരം റിപ്പോർട്ടുകൾ അത്യാവശ്യമാണെന്ന് കനേഡിയൻ ടാക്സ് പയേഴ്സ് ഫെഡറേഷൻ ഡയറക്ടർ ഫ്രാങ്കോ ടെറാസാനോ പ്രതികരിച്ചു. പൊതുസേവന മൂല്യങ്ങളും ധാർമ്മികതയും ശക്തിപ്പെടുത്തുന്നതിന്റെ ഭാഗമായാണ് ഈ വാർഷിക റിപ്പോർട്ടുകൾ തയ്യാറാക്കാൻ വകുപ്പുകൾക്ക് നിർദ്ദേശം നൽകിയതെന്ന് പ്രിവി കൗൺസിൽ ഓഫീസ് വക്താവ് അറിയിച്ചു. വിവരങ്ങൾ പുറത്തുവിടുന്ന കാര്യത്തിൽ ഓരോ വകുപ്പുകൾക്കും സ്വയം തീരുമാനമെടുക്കാൻ അനുവാദമുണ്ടെന്നും അദ്ദേഹം വ്യക്തമാക്കി.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
Disciplinary action against over 2,600 federal employees in Canada; 145 laid off
