റിയോ ഡി ജനീറോ: പ്രശസ്ത ന്യൂട്രീഷ്യനിസ്റ്റും ഇൻസ്റ്റാഗ്രാം ഇൻഫ്ലുവൻസറുമായ ഡയാന ഏരിയസ് (39) അപ്പാർട്ട്മെന്റ് കെട്ടിടത്തിന്റെ മുകളിൽ നിന്ന് വീണ് മരിച്ചു. പരുക്കുകളോടെ ആശുപത്രിയിൽ പ്രവേശിപ്പിച്ചെങ്കിലും, ചികിത്സ പൂർത്തിയാക്കാതെ ഇവർ ആശുപത്രിയിൽ നിന്ന് പുറത്തുപോയതിനെ തുടർന്നാണ് ദാരുണാന്ത്യം സംഭവിച്ചത്. വടക്കുകിഴക്കൻ റിയോ ഡി ജനീറോയിലെ കാമ്പോസ് ഡോസ് ഗോയ്റ്റാകാസിലെ യൂണീക്ക് ടവേഴ്സ് കോണ്ടോമിനിയത്തിന് സമീപമാണ് സംഭവം.
നവംബർ 13-ന് രാവിലെ 6.30-ഓടെയാണ് ഗുരുതരമായി പരുക്കേറ്റ ഡയാനയെ അഗ്നിരക്ഷാ സേന ആശുപത്രിയിൽ എത്തിച്ചത്. എന്നാൽ, ചികിത്സ പൂർത്തിയാകും മുമ്പ് അനുമതിയില്ലാതെ ഡയാന ആശുപത്രിയിൽ നിന്ന് പുറത്തുപോയതായി ആശുപത്രി വക്താവ് ഫെരേറ മച്ചാഡോ സ്ഥിരീകരിച്ചു.
ആശുപത്രി വിട്ട് തിരികെ സ്വന്തം അപ്പാർട്മെന്റിലെത്തിയ ഡയാന അവിടെ വെച്ച് മരണത്തിന് കീഴടങ്ങുകയായിരുന്നുവെന്നാണ് റിപ്പോർട്ടുകൾ സൂചിപ്പിക്കുന്നത്. ഉച്ചയ്ക്ക് ശേഷം മൃതദേഹം പോസ്റ്റ്മോർട്ടത്തിനായി കാമ്പോസിലെ ലീഗൽ മെഡിക്കൽ ഇൻസ്റ്റിറ്റ്യൂഷനിലേക്ക് മാറ്റി. മരണകാരണം കണ്ടെത്താനായി അധികൃതർ വിശദമായ അന്വേഷണം ആരംഭിച്ചിട്ടുണ്ട്.
ആരാണ് ഡയാന ഏരിയസ്?
സമൂഹമാധ്യമങ്ങളിൽ ഫിറ്റ്നസ് ദിനചര്യകളെക്കുറിച്ചും പോഷകാഹാരത്തെക്കുറിച്ചുമുള്ള ഉപദേശങ്ങൾ നൽകി ശ്രദ്ധേയയായ വ്യക്തിയാണ് ഡയാന ഏരിയസ്. ‘ശരീരത്തെയും മനസ്സിനെയും പരിവർത്തനം ചെയ്യുക’ എന്ന ലക്ഷ്യത്തോടെയായിരുന്നു ഇവരുടെ പ്രവർത്തനങ്ങൾ. വ്യായാമ വിഡിയോകളും ഗ്ലാമർ ചിത്രങ്ങളും ഡയാന സ്ഥിരമായി സൈബർ ഇടത്തിൽ പങ്കുവച്ചിരുന്നു. നിരവധി ബോഡിബിൽഡിങ് മത്സരങ്ങളിലും ഇവർ പങ്കെടുത്തിട്ടുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
The Instagram influencer and nutritionist tragically died after falling from an apartment building in Rio de Janeiro
