കാനഡയിൽ പഠനശേഷം വർക്ക് പെർമിറ്റ് നേടാൻ ആഗ്രഹിക്കുന്ന അന്താരാഷ്ട്ര വിദ്യാർഥികൾ നിരവധി നിർണായക ഘടകങ്ങൾ പരിഗണിക്കേണ്ടതുണ്ട്. ഇമിഗ്രേഷൻ, റെഫ്യൂജീസ് ആൻഡ് സിറ്റിസൺഷിപ്പ് കാനഡ (IRCC) അംഗീകരിച്ച നിയുക്ത വിദ്യാഭ്യാസ സ്ഥാപനത്തിൽ (DLI) നിന്നാണ് ബിരുദം നേടിയിരിക്കുന്നതെന്നും,തിരഞ്ഞെടുത്തിരിക്കുന്ന കോഴ്സ് പോസ്റ്റ് ഗ്രാജ്വേഷൻ വർക്ക് പെർമിറ്റിന് (PGWP) യോഗ്യമാണെന്നും വിദ്യാർഥികൾ ഉറപ്പുവരുത്തണം. അല്ലാത്തപക്ഷം അവരുടെ അപേക്ഷകൾ നിരസിക്കപ്പെടും.
ഒരു സ്ഥാപനം DLI ആണോ എന്നറിയാൻ IRCC-യുടെ ഔദ്യോഗിക വെബ്സൈറ്റ് സന്ദർശിച്ച് അതാത് പ്രവിശ്യ അല്ലെങ്കിൽ പ്രദേശത്തിന്റെ പട്ടിക പരിശോധിക്കണം.
2024 നവംബർ 1 മുതൽ നടപ്പിലാക്കിയ പുതിയ നിയമങ്ങൾ പ്രകാരം, കോഴ്സുകൾ കാനഡയിലെ ഡിമാൻഡുള്ള തൊഴിൽ മേഖലകളുമായി ബന്ധപ്പെട്ടിരിക്കണം. കൂടാതെ, വിദ്യാർഥികൾക്ക് ഇംഗ്ലീഷിലോ ഫ്രഞ്ചിലോ നിർദിഷ്ട ഭാഷാ പ്രാവീണ്യവും ഉണ്ടായിരിക്കണം. ഒരു സ്ഥാപനം DLI ആണെങ്കിലും എല്ലാ കോഴ്സുകളും PGWP-യ്ക്ക് യോഗ്യമാകണമെന്നില്ല എന്നത് പ്രത്യേകം ശ്രദ്ധിക്കേണ്ടതാണ്.
കാനഡയിൽ സ്ഥിരതാമസം ലക്ഷ്യമിടുന്ന വിദ്യാർഥികൾക്ക് PGWP നിർണായക പങ്ക് വഹിക്കുന്നു. കനേഡിയൻ എക്സ്പീരിയൻസ് ക്ലാസ് പോലുള്ള പ്രോഗ്രാമുകളിലൂടെ സ്ഥിരതാമസം നേടാൻ കുറഞ്ഞത് ഒരു വർഷത്തെ കനേഡിയൻ ജോലി പരിചയം ആവശ്യമാണ്. അതിനാൽ, PGWP വിദ്യാർഥി ജീവിതത്തിൽ നിന്ന് സ്ഥിരതാമസത്തിലേക്കുള്ള പ്രധാന പാലമായി പ്രവർത്തിക്കുന്നു. ശരിയായ സ്ഥാപനവും കോഴ്സും തിരഞ്ഞെടുക്കുന്നതിലൂടെ, വിദ്യാർഥികൾക്ക് കാനഡയിലെ തൊഴിൽ വിപണിയിലേക്കും സ്ഥിരതാമസത്തിലേക്കുമുള്ള വഴി സുഗമമാക്കാം.
