കാൽഗറി: ആൽബർട്ടയിൽ 65 വയസ്സോ അതിൽ കൂടുതലോ ഉള്ള ജീവനക്കാരുടെ ആരോഗ്യ, മരുന്ന് ആനുകൂല്യങ്ങളുടെ സാമ്പത്തിക ഉത്തരവാദിത്തം തൊഴിലുടമകൾക്ക് നൽകുന്ന പുതിയ നിയമം ഒക്ടോബർ 1 മുതൽ പ്രാബല്യത്തിൽ വരുന്നു. പ്രായം മാത്രം കാരണമാക്കി ജീവനക്കാരുടെ ഇൻഷുറൻസ് ആനുകൂല്യങ്ങൾ ഇനിമുതൽ കമ്പനികൾക്ക് റദ്ദാക്കാനാകില്ലെന്ന് സർക്കാർ അറിയിച്ചു. ഇതുവരെ ഈ പ്രായത്തിലുള്ളവർക്ക് സർക്കാർ പദ്ധതികൾ വഴിയാണ് പ്രധാനമായും ചികിത്സാ സഹായം ലഭിച്ചിരുന്നത്. എന്നാൽ പുതിയ നിയമത്തോടെ, കമ്പനികളുടെയോ സ്വകാര്യ ഇൻഷുറൻസിന്റെയോ പരിരക്ഷയ്ക്കാണ് ആദ്യ മുൻഗണന നൽകുക.
മറ്റ് ഇൻഷുറൻസ് സൗകര്യങ്ങൾ ലഭ്യമല്ലാത്തവർക്ക് മാത്രമായിരിക്കും ഇനി സർക്കാർ പദ്ധതികൾ സഹായത്തിനെത്തുകയെന്ന് ആൽബർട്ട ആരോഗ്യ മന്ത്രാലയം വ്യക്തമാക്കി. ഇൻഷുറൻസ് ഉള്ളവർക്ക് സർക്കാർ ആദ്യം പണം നൽകില്ല. ഈ മാറ്റത്തോടെ ഇൻഷുറൻസ് പ്രീമിയം തുക ഉയരാനും കമ്പനികൾക്ക് അധിക ചെലവ് വരാനും സാധ്യതയുണ്ട്. 2021 മുതൽ 2025 വരെയുള്ള കണക്കുകൾ പ്രകാരം ആൽബർട്ടയിൽ 65 വയസ്സ് കഴിഞ്ഞ തൊഴിലാളികളുടെ എണ്ണം 18 ശതമാനത്തോളം ഉയർന്ന സാഹചര്യത്തിലാണ് പുതിയ തീരുമാനം.
പുതിയ നിയമം വരുന്നതോടെ ഇൻഷുറൻസ് ക്ലെയിമുകളിൽ 2 മുതൽ 5 ശതമാനം വരെ വർധനവുണ്ടാകുമെന്നാണ് ഇൻഷുറൻസ് രംഗത്തെ വിദഗ്ധർ പറയുന്നത്. അധിക ചെലവ് ഭയന്ന് കമ്പനികൾ മുതിർന്ന ആളുകൾക്ക് ജോലി നൽകാൻ മടിച്ചേക്കാമെന്നും, ബിസിനസ് വളർച്ചയെ ഇത് ബാധിച്ചേക്കാമെന്നും ഡോക്ടർമാരും വ്യവസായികളും ആശങ്കപ്പെടുന്നുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Companies in Alberta must now bear the healthcare costs of older employees; new policy takes effect October 1.
