ലൈസൻസും ഹെൽത്ത് കാർഡും ഒന്നാക്കരുത്; ആൽബർട്ട സർക്കാരിന്റെ പുതിയ കാർഡിനെതിരെ മുന്നറിയിപ്പുമായി കമ്മീഷണർ

എഡ്മന്റൺ: ആൽബർട്ടയിൽ ആരോഗ്യ നമ്പറും പൗരത്വ വിവരങ്ങളും ഉൾപ്പെടുത്തിക്കൊണ്ടുള്ള പുതിയ ഡ്രൈവിംഗ് ലൈസൻസ് ജൂലൈ രണ്ട് മുതൽ പുറത്തിറക്കാനുള്ള പ്രവിശ്യാ സർക്കാർ നീക്കത്തിനെതിരെ കടുത്ത ആശങ്കകളുമായി വിവര-സ്വകാര്യതാ കമ്മീഷണർ രംഗത്ത്. വിവിധ തിരിച്ചറിയൽ വിവരങ്ങൾ ഒരൊറ്റ കാർഡിലേക്ക് കേന്ദ്രീകരിക്കുന്നത് ഡാറ്റാ ചോർച്ചയ്ക്കും വ്യക്തിവിവര ദുരുപയോഗത്തിനും കാരണമാകുമെന്നും, ഇത് ക്രിമിനലുകൾക്ക് കൂടുതൽ എളുപ്പത്തിൽ വിവരങ്ങൾ തട്ടിയെടുക്കാൻ സഹായകരമാകുമെന്നും കമ്മീഷണർ മുന്നറിയിപ്പ് നൽകി. വർഷങ്ങളായി ആളുകൾ ഉപയോഗിക്കുന്ന പേപ്പർ ഹെൽത്ത് കാർഡുകൾ മാറ്റിയാണ് സർക്കാർ ഈ പുതിയ കാർഡ് കൊണ്ടുവരുന്നത്. എന്നാൽ, ഇതിൽ ഒരാൾ കാനഡയിലെ പൗരനാണോ അല്ലയോ എന്ന് വ്യക്തമാക്കുന്ന അടയാളങ്ങൾ ഉണ്ടാകും. ഇത് ഭാവിയിൽ ആളുകൾക്കിടയിൽ വിവേചനത്തിനും മാറ്റിനിർത്തലുകൾക്കും കാരണമായേക്കാമെന്നും കമ്മീഷണർ ചൂണ്ടിക്കാട്ടി.

എന്നാൽ, പുതിയ കാർഡുകളിൽ തട്ടിപ്പുകൾ തടയുന്നതിനായി 57 വ്യത്യസ്ത സുരക്ഷാ സംവിധാനങ്ങൾ ഉൾപ്പെടുത്തിയിട്ടുണ്ടെന്നും നിലവിലെ സംവിധാനത്തേക്കാൾ സുരക്ഷിതമാണിതെന്നും ആൽബർട്ട പ്രീമിയർ ഡാനിയേൽ സ്മിത്ത് വ്യക്തമാക്കി. ഇതിനു വിരുദ്ധമായി, ലൈസൻസ് നൽകുന്ന ഓഫീസ് നിലവിലെ സ്വകാര്യതാ നിയമങ്ങളുടെ പരിധിയിൽ വരുന്നില്ല എന്നതാണ് വിദഗ്ധർ ചൂണ്ടിക്കാണിക്കുന്ന പ്രധാന പോരായ്മ. അതുകൊണ്ടുതന്നെ, നാളെ ഈ കാർഡിലെ വിവരങ്ങൾ ഹാക്കർമാർ ചോർത്തിയാൽ പോലും ആ വിവരം ജനങ്ങളെ അറിയിക്കാൻ ഈ ഓഫീസിന് നിയമപരമായ ബാധ്യതയില്ല. ഈ സംവിധാനത്തിന്മേൽ കൃത്യമായ മേൽനോട്ടമില്ലാത്തത് സുരക്ഷയെ കാര്യമായി ബാധിക്കുമെന്നും അവർ വ്യക്തമാക്കി.

അടുത്തിടെ 30 ലക്ഷത്തോളം ആളുകളുടെ വ്യക്തിവിവരങ്ങൾ ഇന്റർനെറ്റിൽ ചോർന്ന സംഭവം കാനഡാ പോലീസും ഇലക്ഷൻസ് ആൽബർട്ടയും ചേർന്ന് അന്വേഷിക്കുന്നുണ്ട്. ഇതിനിടയിലാണ് പുതിയ കാർഡിനെച്ചൊല്ലിയുള്ള തർക്കവും ശക്തമാകുന്നത്. പുതിയ കാർഡ് സുരക്ഷിതമാണെന്ന് സർക്കാർ പറയുമ്പോഴും, എല്ലാ വിവരങ്ങളും ഒരിടത്ത് കൂട്ടിവെക്കുന്നത് ഹാക്കർമാർക്ക് കാര്യങ്ങൾ കൂടുതൽ എളുപ്പമാക്കുമെന്നാണ് വിദഗ്ധർ പറയുന്നത്. ഈ സാഹചര്യത്തിൽ, പുതിയ ലൈസൻസ് ഉപയോഗിക്കുമ്പോൾ ജനങ്ങൾ ശ്രദ്ധിക്കേണ്ട കാര്യങ്ങളെക്കുറിച്ചും, നമ്മുടെ വിവരങ്ങൾ ചോദിക്കാൻ അനുവാദമില്ലാത്ത സ്ഥാപനങ്ങൾ ഏതൊക്കെയാണെന്നതിനെക്കുറിച്ചും വ്യക്തമായ മാർഗനിർദേശങ്ങൾ അടുത്ത ആഴ്ചകളിൽ പുറത്തിറക്കുമെന്ന് കമ്മീഷണർ ഡയാൻ മക്ലിയോഡ് അറിയിച്ചു.

📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla

Don't confuse license and health card; Commissioner warns against Alberta government's new card