ഒട്ടാവ: കാനഡയിൽ താപനില പൂജ്യത്തിന് താഴെ തുടരുന്ന സാഹചര്യത്തിൽ അഞ്ച് പ്രവിശ്യകളിൽ കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നൽകിയിട്ടുണ്ട്.
കാനഡയുടെ വിവിധ ഭാഗങ്ങളിൽ കടുത്ത ശൈത്യവും മഞ്ഞുവീഴ്ചയും തുടരുമെന്ന് പരിസ്ഥിതി മന്ത്രാലയം അറിയിച്ചു. അറ്റ്ലാന്റിക് കാനഡയിൽ ഞായറാഴ്ച മുതൽ ചൊവ്വാഴ്ച വരെ ശക്തമായ മഞ്ഞുവീഴ്ചയ്ക്ക് സാധ്യതയുള്ളതിനാൽ ‘ഓറഞ്ച്’ അലേർട്ട് പ്രഖ്യാപിച്ചു.
ന്യൂഫൗണ്ട്ലാൻഡ് ആൻഡ് ലാബ്രഡോർ മേഖലകളിൽ 35 മുതൽ 50 സെന്റിമീറ്റർ വരെ മഞ്ഞ് വീഴാൻ സാധ്യതയുണ്ടെന്നാണ് വിലയിരുത്തൽ. കൂടാതെ, പ്രിൻസ് എഡ്വേർഡ് ഐലൻഡ്, നോവ സ്കോഷ്യ എന്നിവിടങ്ങളിലും ജാഗ്രതാ നിർദ്ദേശം നൽകിയിട്ടുണ്ട്.
ഒന്റാരിയോയുടെ തെക്കൻ മേഖലകളിൽ ശക്തമായ ശീതക്കാറ്റ് അനുഭവപ്പെടാൻ സാധ്യതയുള്ളതിനാൽ ‘യെല്ലോ’ അലേർട്ട് പുറപ്പെടുവിച്ചു. ടൊറന്റോ, ലണ്ടൻ തുടങ്ങിയ നഗരങ്ങളിൽ കാറ്റിന്റെ ആഘാതം മൂലം തണുപ്പ് -25 ഡിഗ്രി സെൽഷ്യസ് മുതൽ -30 ഡിഗ്രി സെൽഷ്യസ് വരെ അനുഭവപ്പെട്ടേക്കാം. കടുത്ത തണുപ്പ് കാരണം മിനിറ്റുകൾക്കുള്ളിൽ തന്നെ ചർമ്മത്തിൽ ഫ്രോസ്റ്റ്ബൈറ്റ് ഏൽക്കാൻ സാധ്യതയുണ്ടെന്ന് അധികൃതർ മുന്നറിയിപ്പ് നൽകി. പ്രയറി പ്രവിശ്യകളായ മാനിറ്റോബയിലും സാസ്കാച്ചവാനിലും താപനില -23 ഡിഗ്രി സെൽഷ്യസായി തുടരുകയാണ്.
അതേസമയം, പടിഞ്ഞാറൻ കാനഡയിലെ സ്ഥിതി വ്യത്യസ്തമാണ്. ആൽബർട്ടയിൽ താപനില പൂജ്യം ഡിഗ്രിക്ക് മുകളിൽ രേഖപ്പെടുത്തിയപ്പോൾ, ബ്രിട്ടീഷ് കൊളംബിയയിലെ വാൻകൂവർ മേഖലയിൽ ശക്തമായ മഴ തുടരുകയാണ്. ഇവിടെ ചൊവ്വാഴ്ച വരെ 60 മുതൽ 90 മില്ലിമീറ്റർ വരെ മഴ ലഭിക്കുമെന്നാണ് പ്രവചനം. ക്യൂബെക്കിലും കിഴക്കൻ ഒന്റാരിയോയിലും നേരിയ മഞ്ഞുവീഴ്ചയ്ക്കും രാത്രികാലങ്ങളിൽ കടുത്ത തണുപ്പിനും സാധ്യതയുണ്ടെന്നും കാലാവസ്ഥാ കേന്ദ്രം വ്യക്തമാക്കി.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
Cold wave continues in Canada; extreme alert issued in various provinces
