ജെറ്റ് സ്ട്രീം തെക്കോട്ട് നീങ്ങിയതിനെത്തുടർന്ന് തെക്കൻ ഒന്റാറിയോയിൽ കടുത്ത ശൈത്യം അനുഭവപ്പെടുമ്പോൾ, പടിഞ്ഞാറൻ കാനഡയിൽ താപനില റെക്കോർഡുകൾ ഭേദിച്ച് ഉയരുന്നു. ആൽബർട്ടയിൽ വെള്ളിയാഴ്ച മാത്രം 11 സ്ഥലങ്ങളിൽ പുതിയ താപനില റെക്കോർഡുകൾ രേഖപ്പെടുത്തിയതായി എൻവയറോൺമെന്റ് കാനഡയുടെ കണക്കുകൾ വ്യക്തമാക്കുന്നു. ലെത്ത്ബ്രിഡ്ജ് മേഖലയിൽ 19.5 ഡിഗ്രി സെൽഷ്യസ് ചൂടാണ് രേഖപ്പെടുത്തിയത്. 1987-ൽ രേഖപ്പെടുത്തിയ 17.2 ഡിഗ്രി സെൽഷ്യസ് എന്ന റെക്കോർഡാണ് ഇവിടെ തകർന്നത്. ബ്രിട്ടീഷ് കൊളംബിയയിലെ പോർട്ട് ഹാർഡി ഉൾപ്പെടെയുള്ള നാല് സ്ഥലങ്ങളിലും വെള്ളിയാഴ്ച റെക്കോർഡ് ചൂട് അനുഭവപ്പെട്ടു.
അതേസമയം, ഒന്റാരിയോയുടെ തെക്കൻ ഭാഗങ്ങളിൽ അതിശൈത്യത്തെത്തുടർന്ന് കാലാവസ്ഥാ വകുപ്പ് ജാഗ്രതാ നിർദ്ദേശം പുറപ്പെടുവിച്ചു. കാറ്റിന്റെ സ്വാധീനം മൂലം താപനില -35 ഡിഗ്രി സെൽഷ്യസ് വരെ താഴാൻ സാധ്യതയുണ്ടെന്ന് മുന്നറിയിപ്പിലുണ്ട്. ശക്തമായ കാറ്റും മഞ്ഞുവീഴ്ചയും കാഴ്ചതടസ്സത്തിന് കാരണമാകുമെന്നും മണിക്കൂറിൽ 40 മുതൽ 60 കിലോമീറ്റർ വേഗതയിൽ വരെ കാറ്റ് വീശാൻ സാധ്യതയുണ്ടെന്നും അധികൃതർ അറിയിച്ചു. ആർട്ടിക് മേഖലയിൽ നിന്നുള്ള അതിശീത വായു പ്രവാഹമാണ് ഒന്റാരിയോയിലെ കടുത്ത തണുപ്പിന് കാരണമെന്ന് കാലാവസ്ഥാ നിരീക്ഷക ഇസബെൽ റിച്ചാർഡ്സൺ വ്യക്തമാക്കി.
ഒന്റാരിയോയിലെ ഈ അതിശൈത്യം തിങ്കളാഴ്ച വരെ തുടരുമെന്നും ചൊവ്വാഴ്ച മുതൽ താപനിലയിൽ മാറ്റമുണ്ടാകുമെന്നും കാലാവസ്ഥാ കേന്ദ്രം അറിയിച്ചു. അടുത്ത ആഴ്ച ടൊറന്റോയിൽ ഉയർന്ന താപനില -2 ഡിഗ്രിയും കുറഞ്ഞ താപനില -10 ഡിഗ്രിയും രേഖപ്പെടുത്താനാണ് സാധ്യത. ബ്രിട്ടീഷ് കൊളംബിയയിലും ഒരാഴ്ചയ്ക്കുള്ളിൽ താപനില സാധാരണ നിലയിലേക്ക് മാറുമെന്ന് വാൻകൂവർ കേന്ദ്രമായി പ്രവർത്തിക്കുന്ന കാലാവസ്ഥാ നിരീക്ഷക മോർഗൻ ഷുൾ അറിയിച്ചു. കാനഡയുടെ ഒരു ഭാഗത്ത് ചൂട് കൂടുമ്പോൾ മറ്റൊരു ഭാഗത്ത് തണുപ്പ് അനുഭവപ്പെടുന്നത് സാധാരണമാണെന്നും അവർ കൂട്ടിച്ചേർത്തു.
ഫെബ്രുവരി പകുതിയോടെ ഒന്റാറിയോയിൽ താപനില ഉയരാൻ സാധ്യതയുണ്ടെന്നും ഇത് മഴയ്ക്കോ മഞ്ഞുവീഴ്ചയ്ക്കോ കാരണമായേക്കാമെന്നും കാലാവസ്ഥാ നിരീക്ഷകർ വിലയിരുത്തൽ നടത്തി. നേരത്തെ ഡിസംബർ മാസത്തിലും സമാനമായ രീതിയിൽ യൂക്കോണിൽ -45 ഡിഗ്രി സെൽഷ്യസ് തണുപ്പും ടൊറന്റോയിൽ താരതമ്യേന ഉയർന്ന ചൂടും അനുഭവപ്പെട്ടിരുന്നു. നിലവിലെ സാഹചര്യം മാറാൻ സാധ്യതയുള്ളതിനാൽ ദീർഘകാല പ്രവചനങ്ങൾ നിരീക്ഷിച്ചു വരികയാണെന്നും അധികൃതർ വ്യക്തമാക്കി.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
Climate change in Canada: Extreme cold in Ontario, record heat in western provinces
