സസ്കാറ്റൂൺ: ലൈസൻസില്ലാതെ കുടിയേറ്റ സേവനങ്ങൾ നൽകിയെന്ന ആരോപണത്തിൽ ചൈനീസ് വംശജയായ യുവതിക്കെതിരെ കേസെടുത്ത് സസ്കച്ചെവാൻ സർക്കാർ. ‘ജൂൺ എച്ച്.ആർ സൊല്യൂഷൻസ്’ എന്ന സ്ഥാപനത്തിന്റെ ഉടമ ജൂൺ സുവിനെതിരെയാണ് സസ്കച്ചെവാൻ സർക്കാർ കേസെടുത്തിരിക്കുന്നത്. 2024-ൽ പ്രാബല്യത്തിൽ വന്ന ‘ഇമിഗ്രേഷൻ സർവീസസ് ആക്ട്’ (Immigration Services Act) പ്രകാരം ചാർജ് ചെയ്യപ്പെടുന്ന ആദ്യ കേസാണിതെന്ന് മന്ത്രാലയം അറിയിച്ചു.
2025 ജനുവരി 20 മുതൽ ജൂലൈ 4 വരെയുള്ള കാലയളവിൽ സസ്കാറ്റൂണിലും പരിസര പ്രദേശങ്ങളിലും വെച്ച് നിയമവിരുദ്ധമായി കുടിയേറ്റ സേവനങ്ങളും റിക്രൂട്ട്മെന്റും നൽകി എന്നതാണ് ഇവർക്കെതിരെയുള്ള കുറ്റം. മന്ത്രാലയത്തിന്റെ അറിയിപ്പ് പ്രകാരം, നിയമത്തിലെ സെക്ഷൻ 3-1 (1) (a) പ്രകാരം നിരോധിച്ചിട്ടുള്ള പ്രവൃത്തികൾ ചെയ്തതിലൂടെ സെക്ഷൻ 7-6 (1) (k), 7-6 (2) എന്നിവയുടെ ലംഘനമാണ് നടന്നിട്ടുള്ളത്.
കുടിയേറ്റക്കാരെയും വിദേശ തൊഴിലാളികളെയും ചൂഷണങ്ങളിൽ നിന്ന് സംരക്ഷിക്കുന്നതിനായി 2024 ജൂലൈ 1-നാണ് പുതിയ നിയമം പ്രാബല്യത്തിൽ വന്നത്. പഴയ നിയമങ്ങൾക്ക് പകരമായി കൊണ്ടുവന്ന ഈ പുതിയ ചട്ടം, കാനഡയിലെ തന്നെ ഏറ്റവും കർശനമായ ‘പ്രോഗ്രാം ഇന്റഗ്രിറ്റി ഫ്രെയിംവർക്ക്’ ആണെന്ന് വിലയിരുത്തപ്പെടുന്നു. നിയമലംഘനം നടത്തുന്നവർക്കെതിരെ ഉയർന്ന പിഴ ഉൾപ്പെടെയുള്ള കടുത്ത ശിക്ഷാ നടപടികളാണ് ഇതിൽ വിഭാവനം ചെയ്തിരിക്കുന്നത്.
പുതിയ നിയമം പ്രധാനമായും കുടിയേറ്റക്കാരുടെ സംരക്ഷണമാണ് ലക്ഷ്യമിടുന്നതെങ്കിലും, സസ്കച്ചെവാൻ എംപ്ലോയ്മെന്റ് ആക്ട് പ്രകാരം കനേഡിയൻ പൗരന്മാർ, സ്ഥിരതാമസക്കാർ, താൽക്കാലിക താമസക്കാർ എന്നിവരടക്കം എല്ലാ തൊഴിലാളികൾക്കും തുല്യമായ സംരക്ഷണം ഉറപ്പാക്കുന്നുണ്ടെന്നും മന്ത്രാലയം വ്യക്തമാക്കി. ലൈസൻസുള്ള ഏജൻസികൾ വഴി മാത്രം കുടിയേറ്റ സേവനങ്ങൾ തേടണമെന്ന് അധികൃതർ പൊതുജനങ്ങളോട് നിർദ്ദേശിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Chinese woman charged in Saskatchewan for providing immigration services without a license
