ഒട്ടാവ: ചൈനീസ് വിദേശകാര്യ മന്ത്രി വാങ് യി അടുത്ത ആഴ്ച കാനഡ സന്ദർശിക്കും. പത്ത് വർഷത്തിന് ശേഷം ആദ്യമായാണ് ഒരു ചൈനീസ് വിദേശകാര്യ മന്ത്രി കാനഡയിലെത്തുന്നത്. മേയ് 28 മുതൽ 30 വരെ നീണ്ടുനിൽക്കുന്ന ഔദ്യോഗിക സന്ദർശനത്തിൽ കാനഡ വിദേശകാര്യ മന്ത്രി അനിത ആനന്ദുമായി അദ്ദേഹം കൂടിക്കാഴ്ച നടത്തും. ഇരു രാജ്യങ്ങളും തമ്മിലുള്ള വ്യാപാര ബന്ധം മെച്ചപ്പെടുത്തുന്നതിനും പുതുക്കിയ തന്ത്രപ്രധാന പങ്കാളിത്തം ചർച്ച ചെയ്യുന്നതിനുമാണ് ഈ സന്ദർശനം ഒഴുക്കുന്നത്.
കഴിഞ്ഞ കുറച്ചുകാലമായി കാനഡയും ചൈനയും തമ്മിലുള്ള നയതന്ത്രബന്ധം കടുത്ത പ്രതിസന്ധിയിലായിരുന്നു. 2018-ൽ വാവെയ് കമ്പനിയുടെ ചീഫ് ഫിനാൻഷ്യൽ ഓഫീസർ മെങ് വാൻഷൂവിനെ കാനഡ അറസ്റ്റ് ചെയ്തതും, തുടർന്ന് രണ്ട് കനേഡിയൻ പൗരന്മാരെ ചൈന തടവിലാക്കിയതും ഇരു രാജ്യങ്ങളും തമ്മിലുള്ള ബന്ധം വഷളാക്കിയിരുന്നു. എന്നാൽ 2026 ജനുവരിയിൽ പ്രധാനമന്ത്രി മാർക്ക് കാർണി ബെയ്ജിംഗ് സന്ദർശിച്ചതോടെയാണ് ചർച്ചകൾക്ക് പുതിയ വഴിത്തിരിവുണ്ടായത്. കാനഡയിൽ നിന്നുള്ള കനോല വിത്ത്, പയർവർഗങ്ങൾ, സമുദ്രവിഭവങ്ങൾ എന്നിവയുടെ ചൈനയിലേക്കുള്ള കയറ്റുമതി നികുതി കുറയ്ക്കാനും പകരം ചൈനീസ് ഇലക്ട്രിക് വാഹനങ്ങളുടെ ഇറക്കുമതി നിയന്ത്രണങ്ങളിൽ കാനഡ ഇളവ് വരുത്താനും ഇരുരാജ്യങ്ങളും തമ്മിൽ പ്രാഥമിക ധാരണയായിരുന്നു.
ഇരു രാജ്യങ്ങളും തമ്മിലുള്ള സാമ്പത്തിക-സാംസ്കാരിക ബന്ധം ശക്തമായി തുടരുന്ന പശ്ചാത്തലത്തിലാണ് പുതിയ ചർച്ചകൾ നടക്കുന്നത്. നിലവിൽ 17 ലക്ഷത്തിലധികം ചൈനക്കാർ കാനഡയിലുണ്ട്. കൂടാതെ 2025-ൽ ഇരുരാജ്യങ്ങളും തമ്മിലുള്ള ഉഭയകക്ഷി വ്യാപാരം 125.1 ബില്യൺ ഡോളറിൽ എത്തിയിരുന്നു. അതേസമയം, ചൈനയുമായുള്ള പുതിയ വ്യാപാര നീക്കങ്ങളിൽ കാനഡയിലെ ചില പ്രാദേശിക സംഘടനകൾ ആശങ്ക പ്രകടിപ്പിച്ചിട്ടുണ്ട്. സാമ്പത്തിക ലാഭത്തിന് വേണ്ടി മനുഷ്യാവകാശ പ്രശ്നങ്ങളിൽ കാനഡ വിട്ടുവീഴ്ച ചെയ്യരുതെന്ന് വാങ്കൂവർ സൊസൈറ്റി ഇൻ സപ്പോർട്ട് ഓഫ് ഡെമോക്രാറ്റിക് മൂവ്മെന്റ് ചെയർമാൻ എഡ്മണ്ട് ല്യൂങ്ങ് പ്രതികരിച്ചു. കാനഡയിൽ എത്തുന്നതിന് മുൻപായി ന്യൂയോർക്കിൽ നടക്കുന്ന യുഎൻ സുരക്ഷാ കൗൺസിൽ യോഗത്തിൽ ചൈനീസ് വിദേശകാര്യ മന്ത്രി പങ്കെടുക്കും.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
New turning point in Canada-China relations; Chinese Foreign Minister visits Canada after disputes
