ഓട്ടവ: ആൽബർട്ടയിലുള്ള പ്രമുഖ സൈനിക താവളമായ സിഎഫ്ബി വെയിൻറൈറ്റിൽ (CFB Wainwright) ശനിയാഴ്ച വൈകുന്നേരമുണ്ടായ വൻ തീപിടിത്തത്തിലും അപകടത്തിലും നിരവധി പേർ കൊല്ലപ്പെടുകയും ഒട്ടേറെ പേർക്ക് പരിക്കേൽക്കുകയും ചെയ്തു. വൈകുന്നേരം നാലു മണിയോടെ സൈനിക പരിശീലന കേന്ദ്രത്തിലുണ്ടായ തീപിടിത്തം അതിശക്തമായ കാറ്റിൽ ചുറ്റുമുള്ള മേഖലകളിലേക്ക് അതിവേഗം പടരുകയായിരുന്നു. അടുത്ത ബന്ധുക്കളെ വിവരമറിയിക്കുന്ന നടപടികൾ പൂർത്തിയാകാത്തതിനാൽ കൊല്ലപ്പെട്ടവരുടെയോ പരിക്കേറ്റവരുടെയോ കൃത്യമായ കണക്കുകൾ പുറത്തുവിട്ടിട്ടില്ലെന്ന് കനേഡിയൻ സായുധ സേനയും പ്രതിരോധ മന്ത്രി ഡേവിഡ് മക്ഗിന്റിയും അറിയിച്ചു.
അപകടത്തെ തുടർന്ന് എഡ്മിന്റണിലെ ആശുപത്രികളിൽ അടിയന്തര സാഹചര്യങ്ങൾ നേരിടാനുള്ള ‘കോഡ് ഓറഞ്ച്’ പ്രഖ്യാപിച്ചു. പരിക്കേറ്റവരുടെ എണ്ണം പെട്ടെന്ന് വർദ്ധിച്ചതോടെ വെയിൻറൈറ്റിലെ പ്രാദേശിക ആരോഗ്യ കേന്ദ്രങ്ങൾ പൂർണ്ണമായും നിയന്ത്രണാതീതമായ അവസ്ഥയിലായി. തുടർന്നാണ് രോഗികളെ എഡ്മിന്റണിലെ പ്രധാന ആശുപത്രികളിലേക്ക് മാറ്റാൻ തീരുമാനിച്ചത്. 15 മുതൽ 25 വർഷത്തിനിടയിൽ ഉണ്ടാകുന്ന ഏറ്റവും വലിയ ദുരന്ത സാഹചര്യമാണിതെന്ന് റോയൽ അലക്സാണ്ട്ര ആശുപത്രിയിലെ അടിയന്തര വിഭാഗം ഡോക്ടറായ വാറൻ തിർസ്ക് വ്യക്തമാക്കി.
ലബോറട്ടറി അടക്കമുള്ള അടിയന്തര ചികിത്സ സംവിധാനങ്ങൾ സജ്ജമാക്കുന്നതിനായി യൂണിവേഴ്സിറ്റി ഓഫ് ആൽബെർട്ട ആശുപത്രിയിലെ അത്യാഹിത വിഭാഗത്തിൽ നിന്ന് ഒഴിഞ്ഞുനിൽക്കാൻ പൊതുജനങ്ങളോട് അഭ്യർത്ഥിച്ചിട്ടുണ്ട്. സ്ഥിതിഗതികൾ സങ്കീർണ്ണമാണെന്നും നിരവധി സൈനികരെ ദുരന്തം ബാധിച്ചിട്ടുണ്ടെന്നും ആൽബർട്ട പ്രീമിയർ ഡാനിയേൽ സ്മിത്ത് പ്രതികരിച്ചു. സംഭവം അതീവ ഗുരുതരമാണെന്ന് വ്യക്തമാക്കിയ കനേഡിയൻ പ്രധാനമന്ത്രി മാർക്ക് കാർണി, ആൽബെർട്ട സർക്കാരുമായും പ്രാദേശിക ഭരണകൂടങ്ങളുമായും കേന്ദ്ര സർക്കാർ ചേർന്ന് പ്രവർത്തിക്കുകയാണെന്ന് അറിയിച്ചു.
സമീപകാലത്തൊന്നും ഉണ്ടാകാത്ത തരത്തിലുള്ള വലിയൊരു ദുരന്തമാണിതെന്ന് പ്രതിരോധ മന്ത്രി കൂട്ടിച്ചേർത്തു. അതേസമയം, ബിസി, സസ്‌കാച്ചെവൻ പ്രവിശ്യകൾ ആൽബെർട്ടയ്ക്ക് ആവശ്യമായ എല്ലാ സഹായങ്ങളും വാഗ്ദാനം ചെയ്യുകയും ദുരിതാശ്വാസ സാമഗ്രികൾ അയക്കുകയും ചെയ്തിട്ടുണ്ട്. മണിക്കൂറിൽ 69 കിലോമീറ്റർ വേഗതയിൽ വീശിയടിച്ച കാറ്റാണ് താവളത്തിന് തെക്കുഭാഗത്തുണ്ടായ തീ വേഗത്തിൽ പടരാൻ കാരണമായത്. അതിശക്തമായ കാറ്റിൽ തീ താവളത്തിന്റെ അതിർത്തി വേലികൾ കടന്ന് സമീപത്തെ മുനിസിപ്പൽ ഡിസ്ട്രിക്റ്റിലേക്കും പടർന്നു. അപകടത്തെ തുടർന്ന് ഒക്ടോബർ 19-ന് നടക്കാനിരുന്ന റഫറണ്ടത്തിന് മുന്നോടിയായുള്ള അഡ്വാൻസ് വോട്ടിങ് കേന്ദ്രം അടയ്ക്കുകയും ബാലറ്റ് ബോക്സുകൾ സുരക്ഷിത സ്ഥാനത്തേക്ക് മാറ്റുകയും ചെയ്തു.
നിലവിൽ തീപിടിത്തം കൂടുതൽ മേഖലകളിലേക്ക് പടരാതെ നിയന്ത്രണവിധേയമാക്കിയിട്ടുണ്ടെന്ന് പ്രാദേശിക ഭരണകൂടം വ്യക്തമാക്കി. രണ്ടാം ലോകമഹായുദ്ധ കാലം മുതൽ കനേഡിയൻ സൈന്യത്തിന്റെ സുപ്രധാന പരിശീലന കേന്ദ്രമാണ് സിഎഫ്ബി വെയിൻറൈറ്റ്. കരസേന, ആർട്ടിലറി, വ്യോമസേന എന്നിവ ഒന്നിച്ചുനിന്നുള്ള തത്സമയ വെടിവെപ്പ് പരിശീലനങ്ങൾ നടത്തുന്ന പ്രധാന താവളം കൂടിയാണിത്. 690 സൈനികരും 300 സിവിലിയൻ ജീവനക്കാരുമടക്കം ആയിരത്തോളം പേർ സ്ഥിരമായി ജോലി ചെയ്യുന്ന കേന്ദ്രത്തിൽ പരിശീലന സമയങ്ങളിൽ കൂടുതൽ പേർ എത്താറുണ്ട്. അപകടത്തിന്റെ യഥാർത്ഥ കാരണത്തെക്കുറിച്ച് കനേഡിയൻ മിലിട്ടറിയും റോയൽ കനേഡിയൻ മൗണ്ടഡ് പോലീസും ചേർന്ന് അന്വേഷണം ആരംഭിച്ചിട്ടുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
