കനേഡിയൻ പ്രധാനമന്ത്രി മാർക്ക് കാർണി അവതരിപ്പിച്ച ‘ബിൽ സി-5’, അഥവാ Building Canada Act, വ്യാഴാഴ്ച പുലർച്ചെ ഹൗസ് കമ്മിറ്റിയുടെ അനുമതി നേടി. കാനഡയുടെ ദേശീയ താൽപ്പര്യം മുൻനിർത്തിയുള്ള വലിയ വ്യാവസായിക പദ്ധതികളായ ഖനികൾ, തുറമുഖങ്ങൾ, പൈപ്പ്ലൈനുകൾ എന്നിവയ്ക്ക് ഫെഡറൽ അനുമതികൾ നേരിട്ട് നൽകാൻ ഈ നിയമം മന്ത്രിസഭയ്ക്ക് അധികാരം നൽകും. കാനഡയിലെ ആഭ്യന്തര വ്യാപാര തടസ്സങ്ങൾ നീക്കുന്നതിനും, ദേശീയ പ്രാധാന്യമുള്ള പദ്ധതികൾക്ക് നിലവിലുള്ള നിയമങ്ങളിൽ ഇളവുകൾ നൽകി വേഗത്തിൽ അനുമതി ലഭ്യമാക്കുന്നതിനും ഈ ബിൽ ലക്ഷ്യമിടുന്നു.
എങ്കിലും, ഈ ബില്ലിനെതിരെ തദ്ദേശീയ വിഭാഗങ്ങളും പരിസ്ഥിതി പ്രവർത്തകരും ശക്തമായ പ്രതിഷേധമുയർത്തിയിട്ടുണ്ട്. ‘Idle No More’ പോലുള്ള വലിയ പ്രക്ഷോഭങ്ങൾ വീണ്ടും ഉണ്ടാകാമെന്ന് അവർ മുന്നറിയിപ്പ് നൽകി. കെബാവോക്ക് Indigenous നേതാവ് ലാൻസ് ഹെയ്മണ്ട് ഇതിനെ “Indigenous സമൂഹങ്ങളുമായി എങ്ങനെ സഹകരിക്കരുതെന്ന് പഠിപ്പിക്കുന്ന മാതൃകയാണ്” എന്ന് വിശേഷിപ്പിച്ചു. വന്യജീവി സംരക്ഷണ നിയമങ്ങളെയും പരിസ്ഥിതി ചട്ടങ്ങളെയും മറികടന്ന് മന്ത്രിസഭയ്ക്ക് പെട്ടെന്ന് തീരുമാനങ്ങളെടുക്കാൻ ഈ ബിൽ വഴിയൊരുക്കുമോ എന്ന ആശങ്കയാണ് പ്രധാനമായും ഉയരുന്നത്.
പ്രതിപക്ഷ പാർട്ടികളും ഈ നിയമത്തിനെതിരെ ആശങ്ക രേഖപ്പെടുത്തിയിട്ടുണ്ട്. കൺസർവേറ്റീവ് പാർട്ടിയും ബ്ലോക്ക് ക്യൂബെക്വയും (Bloc Québécois) ഈ നിയമം പ്രധാനമന്ത്രിക്കും മന്ത്രിസഭയ്ക്കും അമിതമായ അധികാരങ്ങൾ നൽകുമെന്ന് ചൂണ്ടിക്കാട്ടി. മുൻപ് ബ്രൂക്ക്ഫീൽഡിന്റെ ചെയർമാനായിരുന്ന കർണിയുടെ മുൻബന്ധങ്ങൾ ഈ നിയമത്തിൽ ധാർമ്മിക പ്രശ്നങ്ങൾ സൃഷ്ടിക്കുമോയെന്നും എം.പി. ഫിലിപ്പ് ലോറൻസ് ആരോപിച്ചു.
Ecojustice, West Coast Environmental Law പോലുള്ള പ്രമുഖ പരിസ്ഥിതി സംഘടനകൾ ഈ നിയമം ജൈവവൈവിധ്യത്തെയും, നിയമപരമായ കൂടിയാലോചനകളെയും അവഗണിക്കുന്നു എന്ന് ആരോപിച്ചു. “ഒരു വീട് പണിത ശേഷം അതിന്റെ സുരക്ഷയെക്കുറിച്ച് എഞ്ചിനീയറെ വിളിച്ച് ചോദിക്കുന്നത് പോലെയാണ് ഈ ബിൽ,” എന്ന് പരിസ്ഥിതി അഭിഭാഷക അന്ന ജോൺസ്റ്റൺ അഭിപ്രായപ്പെട്ടു.
തദ്ദേശീയ ജനതയുടെ കുടിയിറക്ക് ഭീഷണിയെ തുടർന്ന്, തദ്ദേശീയ നേതാക്കൾ ഗവർണർ ജനറലിനോട് ബിൽ സി-5 മാറ്റിവെക്കാനോ അല്ലെങ്കിൽ പൂർണ്ണമായി തള്ളിക്കളയാനോ ആവശ്യപ്പെട്ടിട്ടുണ്ട്. സാമ്പത്തിക പുനരുജ്ജീവനത്തിന് ഈ നടപടി അത്യന്താപേക്ഷിതമാണെന്ന് ചൂണ്ടിക്കാട്ടി ലിബറൽ എം.പി.മാരും ഉദ്യോഗസ്ഥരും നിയമം വേഗത്തിൽ പാസാക്കണമെന്ന് ആവശ്യപ്പെടുന്നു. ജൂൺ 27-ന് മുമ്പ് ഈ ബിൽ സെനറ്റിൽ പാസാകാൻ ശക്തമായ സാധ്യതയുണ്ടെന്നാണ് റിപ്പോർട്ടുകൾ.
