ഒട്ടാവ: ചൈനയുമായി സ്വതന്ത്ര വ്യാപാര കരാറിൽ ഏർപ്പെടാൻ കാനഡയ്ക്ക് യാതൊരു ഉദ്ദേശവുമില്ലെന്ന് പ്രധാനമന്ത്രി മാർക്ക് കാർണി വ്യക്തമാക്കി. കനേഡിയൻ ഉൽപ്പന്നങ്ങൾക്ക് മേൽ നൂറ് ശതമാനം നികുതി ചുമത്തുമെന്ന അമേരിക്കൻ പ്രസിഡന്റ് ഡൊണാൾഡ് ട്രംപിന്റെ കടുത്ത മുന്നറിയിപ്പിന് പിന്നാലെയാണ് കാനഡയുടെ ഈ പിന്മാറ്റം. ചൈനയുമായുള്ള ഇടപാടുകൾ കഴിഞ്ഞ കുറച്ച് വർഷങ്ങളായി നിലനിന്നിരുന്ന ചില വ്യാപാര തടസ്സങ്ങൾ നീക്കാൻ മാത്രമുള്ളതാണെന്നും മാർക്ക് കാർണി ഒട്ടാവയിൽ പറഞ്ഞു.
അമേരിക്കയും മെക്സിക്കോയുമായുള്ള നിലവിലെ വ്യാപാര കരാറുകൾ ലംഘിച്ചുകൊണ്ട് ചൈനയെപ്പോലെയുള്ള രാജ്യങ്ങളുമായി കാനഡ സഹകരിക്കില്ലെന്നും അദ്ദേഹം കൂട്ടിച്ചേർത്തു. എന്നാൽ കാനഡ സ്വയം നശിച്ചുകൊണ്ടിരിക്കുകയാണെന്നും ചൈനയുമായുള്ള ഇടപാട് ചരിത്രത്തിലെ ഏറ്റവും വലിയ ദുരന്തമായി മാറുമെന്നുമാണ് ട്രംപിന്റെ നിലപാട്. കാർണിയെ ‘ഗവർണർ’ എന്ന് പരിഹസിച്ച ട്രംപ്, അമേരിക്ക ഉള്ളതുകൊണ്ടാണ് കാനഡ നിലനിൽക്കുന്നത് എന്ന് ഓർക്കണമെന്നും മുന്നറിയിപ്പ് നൽകി. ചൈനീസ് ഇലക്ട്രിക് വാഹനങ്ങളുടെ നികുതി കുറയ്ക്കാനുള്ള കാനഡയുടെ തീരുമാനമാണ് ട്രംപിനെ പ്രകോപിപ്പിച്ചത്. വരും ദിവസങ്ങളിൽ ഇരു രാജ്യങ്ങളും തമ്മിലുള്ള വ്യാപാര തർക്കം കൂടുതൽ രൂക്ഷമാകാനാണ് സാധ്യത.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
Carney insists Canada has ‘no intention’ of seeking free trade deal with China
