2025-ലെ തെരഞ്ഞെടുപ്പിൽ വിജയിച്ച ലിബറൽ പാർട്ടി നേതാവ് മാർക്ക് കാർണി ന്യൂനപക്ഷ സർക്കാർ രൂപീകരിക്കാനൊരുങ്ങുമ്പോൾ, കാനഡയുടെ കുടിയേറ്റ നയത്തിൽ കാര്യമായ മാറ്റങ്ങൾ പ്രഖ്യാപിച്ചിരിക്കുകയാണ്. സ്ഥിരതാമസക്കാരുടെ പ്രവേശനം ജനസംഖ്യയുടെ 1% ത്തിൽ താഴെയായി നിലനിർത്തുന്നതോടൊപ്പം, താൽക്കാലിക താമസക്കാരുടെ എണ്ണം 2027-ഓടെ 5% ത്തിൽ താഴെയാക്കാനും പുതിയ സർക്കാർ ലക്ഷ്യമിടുന്നു. ഇത് ഭവന-അടിസ്ഥാന സൗകര്യ മേഖലകളിലെ സമ്മർദ്ദം കുറയ്ക്കാൻ സഹായിക്കുമെന്നാണ് കരുതുന്നത്.
ഫ്രഞ്ച് ഭാഷാ സമൂഹങ്ങളെ സംരക്ഷിക്കുന്നതിന്റെ ഭാഗമായി ക്യുബെക്കിന് പുറത്തുള്ള ഫ്രാങ്കോഫോൺ കുടിയേറ്റക്കാരുടെ എണ്ണം 2029-ഓടെ 12% വരെ ഉയർത്താൻ പുതിയ സർക്കാർ തീരുമാനിച്ചിട്ടുണ്ട്. അതേസമയം,വിദഗ്ധ തൊഴിലാളി നയം പുനഃക്രമീകരിക്കുന്നതിലൂടെ വിദഗ്ധ ജോലിക്കാരെ, പ്രത്യേകിച്ച് അമേരിക്കയിൽ നിന്നുള്ളവരെ ആകർഷിച്ച്, സാമ്പത്തിക കുടിയേറ്റം ശക്തിപ്പെടുത്താനും കാർണിയുടെ നേതൃത്വത്തിലുള്ള സർക്കാർ പദ്ധതിയിടുന്നതായും അറിയിച്ചു.
ഡിജിറ്റൽ സേവന ഉപകരണങ്ങളിലൂടെ കുടിയേറ്റ പ്രോസസിംഗ് സമയം കുറയ്ക്കുക, അഭയാർത്ഥികൾക്ക് നിയമ സഹായം നൽകുക, അതിർത്തി സുരക്ഷ ശക്തിപ്പെടുത്തുക എന്നിവയാണ് മറ്റ് പ്രധാന നിർദ്ദേശങ്ങൾ. ക്യുബെക്കിന് സർക്കാരുമായി സഹകരിച്ച് കുടിയേറ്റം നിയന്ത്രിക്കുന്നതോടൊപ്പം, വിസ നിബന്ധനകൾ കർശനമാക്കുന്നതിനും കുടിയേറ്റ തട്ടിപ്പുകൾ തടയുന്നതിനുമുള്ള നടപടികളും പുതിയ സർക്കാരിന്റെ അജണ്ടയിൽ ഉൾപ്പെടുന്നു.
