വാൻകൂവർ: പശ്ചിമേഷ്യൻ യുദ്ധസാഹചര്യങ്ങളുടെ പശ്ചാത്തലത്തിൽ ഊർജ്ജ സുരക്ഷ ഉറപ്പാക്കാനുള്ള യൂറോപ്യൻ രാജ്യങ്ങളുടെ നീക്കങ്ങൾക്ക് നിർണ്ണായക വേഗത കൈവരുന്നു. കാനഡയുടെ പസഫിക് തീരത്തുനിന്ന് ദ്രവീകൃത പ്രകൃതിവാതകം (എൽഎൻജി) ഇറക്കുമതി ചെയ്യുന്നതിനായി ജർമ്മനിയുടെ പൊതുമേഖലാ ഊർജ്ജ കമ്പനിയായ ‘സെഫെ’ (SEFE – സെക്യൂറിംഗ് എനർജി ഫോർ യൂറോപ്പ്) കാനഡയുമായി വൻകിട കരാറിൽ ഒപ്പുവെക്കാനൊരുങ്ങുന്നതായി അന്താരാഷ്ട്ര വാർത്താ ഏജൻസികൾ റിപ്പോർട്ട് ചെയ്തു. ബ്രിട്ടീഷ് കൊളംബിയ തീരത്ത് നിർമ്മാണം വിഭാവനം ചെയ്യുന്ന ‘ക്സി ലിസിംസ്’ (Ksi Lisims) എൽഎൻജി കയറ്റുമതി കേന്ദ്രത്തിൽ നിന്നാണ് ജർമ്മനി വാതകം വാങ്ങുന്നത്. കനേഡിയൻ പ്രകൃതിവിഭവ വകുപ്പ് മന്ത്രി ടിം ഹോഡ്സൺ ബുധനാഴ്ച വാൻകൂവറിൽ വെച്ച് കരാർ സംബന്ധിച്ച ഔദ്യോഗിക പ്രഖ്യാപനം നടത്തുമെന്നാണ് വിവരം.
പദ്ധതിയുടെ നിക്ഷേപകരും അന്താരാഷ്ട്ര വാങ്ങലുകാരും തമ്മിലുള്ള അന്തിമ കരാറുകൾ ഈ വർഷം തന്നെ പൂർത്തിയാക്കാനിരിക്കെയാണ് ജർമ്മനിയുമായുള്ള പുതിയ ധാരണ പുറത്തുവരുന്നത്. ജർമ്മൻ കമ്പനിയായ സെഫെയ്ക്ക് പുറമെ പ്രമുഖ ആഗോള ഊർജ്ജ ഭീമന്മാരായ ഷെൽ (Shell), ടോട്ടൽ എനർജീസ് (TotalEnergies) എന്നിവർ ക്സി ലിസിംസ് പദ്ധതിയിൽ നിന്ന് 20 വർഷത്തേക്ക് എൽഎൻജി വാങ്ങാനുള്ള കരാറുകളിൽ ഇതിനകം ഒപ്പുവെച്ചിട്ടുണ്ട്. എന്നാൽ, ഔദ്യോഗിക പ്രഖ്യാപനത്തിന് മുന്നോടിയായി പ്രതികരിക്കാൻ ക്സി ലിസിംസ് അധികൃതരോ കാനഡ പ്രകൃതിവിഭവ മന്ത്രാലയമോ തയ്യാറായിട്ടില്ല.
പ്രമുഖ ധനകാര്യ മാധ്യമമായ ബ്ലൂംബെർഗ് ആണ് ഈ വാർത്ത ആദ്യമായി പുറത്തുവിട്ടത്.
ഹൂസ്റ്റൺ ആസ്ഥാനമായുള്ള വെസ്റ്റേൺ എൽഎൻജി, കനേഡിയൻ പ്രകൃതിവാതക ഉത്പാദകരുടെ കൂട്ടായ്മയായ റോക്കീസ് എൽഎൻജി, പദ്ധതി പ്രദേശത്തിന്റെ അവകാശികളായ നിസ്ഗ ഫസ്റ്റ് നേഷൻ (Nisga’a First Nation) എന്നിവർ സംയുക്തമായാണ് ക്സി ലിസിംസ് പദ്ധതി മുന്നോട്ട് കൊണ്ടുപോകുന്നത്. പ്രതിവർഷം 1.2 കോടി ടൺ ദ്രവീകൃത പ്രകൃതിവാതകം ഉത്പാദിപ്പിക്കാൻ ശേഷിയുള്ള ഈ പദ്ധതി യാഥാർത്ഥ്യമാകുന്നതോടെ ഇത് കാനഡയിലെ രണ്ടാമത്തെ വലിയ എൽഎൻജി കയറ്റുമതി കേന്ദ്രമായി മാറും.
റഷ്യ-ഉക്രെയ്ൻ തർക്കത്തെത്തുടർന്നുണ്ടായ ഊർജ്ജ പ്രതിസന്ധിക്കിടെ, 2022-ൽ 630 കോടി യൂറോ ചിലവഴിച്ചാണ് ഗാസ്പ്രോമിന്റെ കീഴിലായിരുന്ന സെഫെയെ ജർമ്മനി ദേശീയവൽക്കരിച്ചത്. മിഡിൽ ഈസ്റ്റിലെ ഇപ്പോഴത്തെ സംഘർഷങ്ങളും ഇറാൻ യുദ്ധഭീഷണിയും യൂറോപ്പിന്റെ ഊർജ്ജ സുരക്ഷയ്ക്ക് പുതിയ വെല്ലുവിളികൾ ഉയർത്തുന്നുണ്ട്. റഷ്യൻ വാതക ആശ്രയത്വം പൂർണ്ണമായി ഒഴിവാക്കാനും സ്രോതസ്സുകൾ വൈവിധ്യവത്കരിക്കാനുമുള്ള ജർമ്മനിയുടെ തന്ത്രപരമായ നീക്കങ്ങളുടെ ഭാഗമായാണ് കാനഡയുമായുള്ള പുതിയ പങ്കാളിത്തം.
കാനഡയുടെ പസഫിക് തീരത്തുനിന്നുള്ള എൽഎൻജി പനാമ കനാൽ വഴി യൂറോപ്പിലേക്ക് എത്തിക്കാനുള്ള സാധ്യതകളാണ് ജർമ്മനിയുടെ യൂണിപ്പർ (Uniper) അടക്കമുള്ള കമ്പനികൾ പരിശോധിക്കുന്നത്. അമേരിക്കയിലെ വെഞ്ചർ ഗ്ലോബൽ, അർജന്റീനയിലെ സതേൺ എനർജി, തുർക്കിയുടെ ബോട്ടാസ് എന്നിവയുമായും സെഫെ നിലവിൽ എൽഎൻജി കരാറുകളിൽ ഏർപ്പെട്ടിട്ടുണ്ട്. വഴിത്തിരിവാകുന്ന ഈ നീക്കം ആഗോള ഇന്ധന വിപണിയിലെ സമവാക്യങ്ങൾ തിരുത്തിയെഴുതുമെന്നാണ് വിലയിരുത്തൽ.
Rising prices; Huge move in the cost-effective energy market; Germany to buy gas from Canada, Canadians to find new ways to quickly close mega deal worth crores!
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
