മെക്സിക്കോ സിറ്റി: മെക്സിക്കോയിലെ തെരുവുകളിൽ ലഹരിമാഫിയകൾ തമ്മിലുള്ള സായുധ സംഘർഷം രൂക്ഷമായതോടെ വിനോദസഞ്ചാരത്തിനെത്തിയ നൂറുകണക്കിന് വിദേശയാത്രക്കാർ ദുരിതത്തിലായി. പ്യൂർട്ടോ വല്ലാർട്ട വിമാനത്താവളത്തിന് പുറത്ത് വെടിവയ്പുണ്ടായെന്ന വാർത്ത പരന്നതോടെ യാത്രക്കാർ മണിക്കൂറുകളോളം പരിഭ്രാന്തരായി വിമാനത്താവളത്തിനുള്ളിൽ അഭയം തേടി. സംഘർഷത്തെത്തുടർന്ന് സർവീസുകൾ റദ്ദാക്കിയ വെസ്റ്റ് ജെറ്റ് വിമാനക്കമ്പനി, സുരക്ഷാ ഭീഷണിയുണ്ടായ ഘട്ടത്തിൽ തങ്ങളെ തിരിഞ്ഞുനോക്കിയില്ലെന്നും വിമാനത്താവളത്തിൽ ഉപേക്ഷിച്ചു കടന്നുകളഞ്ഞെന്നുമാണ് കാനഡയിൽ നിന്നുള്ള യാത്രക്കാരുടെ പ്രധാന പരാതി.
വിനോദയാത്രയ്ക്കെത്തിയ വിന്നിപെഗ് സ്വദേശി കതറീന സ്റ്റിഫൻഹോഫർ നേരിട്ടത് സമാനതകളില്ലാത്ത പ്രതിസന്ധിയാണ്. “പെട്ടെന്നായിരുന്നു വിമാനത്താവളത്തിൽ പരിഭ്രാന്തി പടർന്നത്. പുറത്ത് വെടിവയ്പ് നടക്കുന്നുണ്ടെന്നും എല്ലാവരും നിലത്തു കിടക്കണമെന്നും നിർദ്ദേശം ലഭിച്ചു. തൂണുകൾക്ക് പിന്നിൽ ഒളിച്ചിരുന്ന ആ നിമിഷങ്ങൾ ഭയാനകമായിരുന്നു,” കതറീന ഓർക്കുന്നു. എന്നാൽ ഈ സമയം സഹായത്തിനെത്തേണ്ട വെസ്റ്റ് ജെറ്റ് ജീവനക്കാർ, നഗരത്തിൽ കടകളെല്ലാം അടച്ചിട്ടിരിക്കുകയാണെന്നും ഇനി ഒന്നും ചെയ്യാൻ കഴിയില്ലെന്നും പറഞ്ഞ് സ്ഥലം വിടുകയായിരുന്നുവെന്ന് ഇവർ ആരോപിക്കുന്നു.
ഭക്ഷണവും താമസസൗകര്യവും ഇല്ലാതെ വിമാനത്താവളത്തിൽ കുടുങ്ങിയ യാത്രക്കാരെ സഹായിക്കാൻ അധികൃതർ തയ്യാറായില്ലെന്ന ആക്ഷേപം ശക്തമാണ്. മറ്റൊരു യാത്രക്കാരനായ ആൻഡ്രൂ പാർക്കസിനും പറയാനുള്ളത് വിമാനക്കമ്പനിയുടെ വീഴ്ചകളെക്കുറിച്ചാണ്. തന്റെ അഞ്ചംഗ കുടുംബത്തെ നാട്ടിലെത്തിക്കാൻ മാർച്ച് മൂന്നു വരെ കാത്തിരിക്കണമെന്നാണ് കമ്പനി അറിയിച്ചത്. ഒടുവിൽ ഗത്യന്തരമില്ലാതെ ആറു ലക്ഷത്തോളം രൂപ (6,000 ഡോളർ) അധികമായി നൽകി മറ്റൊരു വിമാനത്തിലാണ് അദ്ദേഹം കാനഡയിലേക്ക് മടങ്ങിയത്.
കുടുങ്ങിക്കിടക്കുന്ന യാത്രക്കാരെ തിരിച്ചെത്തിക്കാൻ പ്രത്യേക വിമാനങ്ങൾ അയക്കുന്നുണ്ടെന്ന് വെസ്റ്റ് ജെറ്റ് അവകാശപ്പെടുമ്പോഴും, തങ്ങളാരും അത്തരമൊരു സഹായം കണ്ടിട്ടില്ലെന്നാണ് ഭൂരിഭാഗം യാത്രക്കാരും പറയുന്നത്. ശാരീരികമായും മാനസികമായും തളർന്ന അവസ്ഥയിലാണ് തങ്ങളെന്ന് നാട്ടിൽ തിരിച്ചെത്തിയ പലരും വെളിപ്പെടുത്തുന്നു.
വിമാനക്കമ്പനികളുടെ ഈ നടപടിക്കെതിരെ നിയമപോരാട്ടത്തിന് ഒരുങ്ങുകയാണ് പാസഞ്ചർ റൈറ്റ്സ് സംഘടനകൾ. വിമാനം റദ്ദാക്കിയാൽ 48 മണിക്കൂറിനുള്ളിൽ പകരം സംവിധാനം ഒരുക്കാൻ കമ്പനികൾക്ക് ബാധ്യതയുണ്ടെന്ന് വ്യോമയാന അവകാശ പ്രവർത്തകനായ ഗാബോർ ലുക്കാസ് ചൂണ്ടിക്കാട്ടുന്നു. ഇതിൽ പരാജയപ്പെട്ടാൽ യാത്രക്കാർ സ്വന്തം നിലയ്ക്ക് ടിക്കറ്റ് എടുത്തു യാത്ര ചെയ്യണമെന്നും അതിന്റെ മുഴുവൻ തുകയും കമ്പനിയിൽ നിന്ന് ഈടാക്കാമെന്നുമാണ് നിയമം. ഇത്തരം ഘട്ടങ്ങളിൽ സർക്കാർ ഏജൻസികളെക്കാൾ ചെറുകിട തർക്കപരിഹാര കോടതികളെ (Small Claims Court) സമീപിക്കുന്നതാണ് നഷ്ടപരിഹാരം ഉറപ്പാക്കാൻ എളുപ്പമെന്നും അദ്ദേഹം മറ്റുള്ളവർക്കും നിർദ്ദേശം നൽകുന്നു.
canadians-abandoned-by-westjet-in-mexico-demand-compensation
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
