ദീപാവലി ആശംസ അയച്ച നെറ്റ്ഫ്ലിക്സിനെ ചീത്തവിളിച്ച് കനേഡിയൻ പൗരൻ; സമൂഹമാധ്യമത്തിൽ ചർച്ച

ദീപാവലി ആശംസകൾ നേർന്നു കൊണ്ടുള്ള ഇ-മെയിൽ ലഭിച്ചതിൽ പ്രകോപിതനായ കനേഡിയൻ പൗരന്റെ പ്രതികരണം സമൂഹ മാധ്യമങ്ങളിൽ വൈറലാകുന്നു. ഇന്ത്യക്കാരെ അധിക്ഷേപിക്കുന്ന ഭാഷ ഉപയോഗിച്ചതിനെ തുടർന്ന് ഇയാൾക്കെതിരെ വലിയ വിമർശനമാണ് ഉയരുന്നത്.

വിദേശ രാജ്യങ്ങളിൽ വലിയ പ്രവാസ സമൂഹമുള്ളതിനാൽ ദീപാവലി പോലുള്ള ഹൈന്ദവ ആഘോഷങ്ങൾ അന്താരാഷ്ട്ര തലത്തിൽ ശ്രദ്ധ നേടാറുണ്ട്. കാനഡ പ്രധാനമന്ത്രി മാർക്ക് കാർണി പോലും കഴിഞ്ഞ ദിവസം ഗ്രേറ്റർ ടൊറന്റോ ഏരിയയിലെ ദീപാവലി ആഘോഷത്തിൽ പങ്കെടുക്കുകയും, ‘ഇരുട്ടിനു മേൽ വെളിച്ചം നേടിയ വിജയം’ എന്നതാണ് ദീപാവലിയുടെ കാതൽ എന്ന് പറയുകയും ചെയ്തിരുന്നു.

എന്നാൽ, ആൽബർട്ടയിൽ നിന്നുള്ള പ്രൊഫഷണൽ എൻജിനീയറായ മാർട്ടി ബെലാൻഗറിന് ദീപാവലി ഇഷ്ടപ്പെട്ടില്ല. നെറ്റ്ഫ്ലിക്സിൽ നിന്ന് ദീപാവലി ആശംസകൾ നേർന്നു കൊണ്ടുള്ള ഇ-മെയിൽ ലഭിച്ചതോടെയാണ് അദ്ദേഹം തന്റെ രോഷം പ്രകടിപ്പിച്ചത്.

“എന്റെ രാജ്യത്തേക്ക് അതിക്രമിച്ച് കയറുന്ന മൂന്നാം ലോക കുടിയേറ്റക്കാർ ആഘോഷിക്കുന്ന ഒരു ഉത്സവത്തെക്കുറിച്ച് എനിക്ക് ഒട്ടും താൽപര്യമില്ല” എന്ന് മാർട്ടി ബെലാൻഗർ തുറന്നെഴുതി. തന്റെ സ്വകാര്യ വിവരങ്ങൾ എല്ലാം ശേഖരിക്കുന്ന സേവന ദാതാക്കൾ, താൻ ദീപാവലി ആഘോഷിക്കുന്നില്ലെന്ന് മനസ്സിലാക്കുന്നില്ലേ എന്നും അദ്ദേഹം അത്ഭുതം പ്രകടിപ്പിച്ചു.

“നിങ്ങൾ എന്നെക്കുറിച്ചുള്ള എന്റെ എല്ലാ സ്വകാര്യ വിവരങ്ങളും ശേഖരിച്ച് കഴിഞ്ഞല്ലോ. ഞാൻ ആൽബർട്ടയിൽ നിന്നുള്ള മധ്യവയസ്‌കനായ ഒരാളാണ്. എനിക്ക് യുദ്ധ സിനിമകളും സയൻസ് ഫിക്ഷൻ ഡോക്യുമെന്ററികളുമാണ് ഇഷ്ടം. ഇങ്ങനെയുള്ള അനാവശ്യ കാര്യങ്ങൾ അയക്കുന്നത് നിർത്തുക,” മാർട്ടി കുറിച്ചു.

വിമർശനവും പ്രതികരണങ്ങളും

മാർട്ടിയുടെ ഈ പ്രതികരണത്തിന് സമ്മിശ്ര അഭിപ്രായങ്ങളാണ് കമന്റ് സെക്ഷനുകളിൽ ലഭിച്ചത്. പല കനേഡിയൻ പൗരന്മാരും തങ്ങൾക്ക് ക്രിസ്മസിന് കമ്പനികളിൽ നിന്ന് ഇതേപോലെ ഇ-മെയിൽ ലഭിക്കാറില്ലെന്ന് പരാതിപ്പെട്ടു. എന്നാൽ, ഒരു ഇ-മെയിൽ ലഭിച്ചതിന്റെ പേരിൽ ഇത്രയധികം പ്രകോപിതനാകുന്നത് എന്തിനാണെന്നും അത് അവഗണിക്കാമായിരുന്നില്ലേ എന്നും ചിലർ ചൂണ്ടിക്കാട്ടി. ഈ രോഷപ്രകടനത്തിന്റെ പേരിൽ ചിലർ അദ്ദേഹത്തെ ശക്തമായി ട്രോളുകയും ചെയ്തു. നേരത്തെ, കനേഡിയൻ സ്റ്റോറിൽ വിൽപനയ്ക്ക് വെച്ച ‘ദീപാവലി തീമിലുള്ള ചോക്ലേറ്റി’ന്റെ ചിത്രവും എക്സിൽ വലിയ വാഗ്വാദങ്ങൾക്ക് കാരണമായിരുന്നു.

📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82

‘Festival of 3rd world immigrants’: Canadian engineer outraged on receiving ‘Happy Diwali’ email