ടൊറന്റോ: വരും വർഷങ്ങളിൽ കനേഡിയൻ ഡോളറിന്റെ മൂല്യം മുമ്പ് കണക്കാക്കിയിരുന്നതിനേക്കാൾ വർധിക്കുമെന്ന് റോയിട്ടേഴ്സ് പുറത്തുവിട്ട പുതിയ സർവേ റിപ്പോർട്ട് വ്യക്തമാക്കുന്നു. അമേരിക്കൻ ഫെഡറൽ റിസർവ് പലിശ നിരക്ക് കുറയ്ക്കുന്നതും വടക്കേ അമേരിക്കൻ വ്യാപാര കരാറിനെക്കുറിച്ചുള്ള (USMCA) അനിശ്ചിതത്വങ്ങൾ നീങ്ങുന്നതും കനേഡിയൻ ഡോളറിന് ഗുണകരമാകുമെന്നാണ് സാമ്പത്തിക വിദഗ്ധരുടെ വിലയിരുത്തൽ.
ജനുവരി 5 മുതൽ 7 വരെ 38 വിദേശ വിനിമയ വിദഗ്ധർക്കിടയിൽ നടത്തിയ സർവേയിലാണ് ഈ നിഗമനങ്ങളുള്ളത്. അടുത്ത മൂന്ന് മാസത്തിനുള്ളിൽ കനേഡിയൻ ഡോളറിന്റെ മൂല്യം 0.5 ശതമാനം ഉയർന്ന് ഒരു യുഎസ് ഡോളറിന് 1.38 (72.46 യുഎസ് സെന്റ്) എന്ന നിലയിലെത്തും. കഴിഞ്ഞ മാസത്തെ സർവേയിൽ ഇത് 1.39 ആയിരിക്കുമെന്നായിരുന്നു കണക്കാക്കിയിരുന്നത്. അടുത്ത ഒരു വർഷത്തിനുള്ളിൽ കറൻസി മൂല്യം 2.7 ശതമാനം വർധിച്ച് 1.35 എന്ന നിലയിലേക്ക് മെച്ചപ്പെടുമെന്നും റിപ്പോർട്ട് സൂചിപ്പിക്കുന്നു.
അമേരിക്കൻ ഫെഡറൽ റിസർവ് പലിശ നിരക്കുകളിൽ വരുത്തുന്ന കുറവും ആഗോള വിപണിയിൽ അമേരിക്കൻ ഡോളറിനുണ്ടാകുന്ന തളർച്ചയും കനേഡിയൻ കറൻസിക്ക് കരുത്താകുമെന്ന് ടിഡി സെക്യൂരിറ്റീസിലെ ഗ്ലോബൽ എഫ്എക്സ് സ്ട്രാറ്റജിസ്റ്റ് ജയതി ഭരദ്വാജ് പറഞ്ഞു. കൂടാതെ, അമേരിക്ക, മെക്സിക്കോ, കാനഡ എന്നിവർ ഉൾപ്പെടുന്ന വ്യാപാര കരാറായ ‘യുഎസ്എംസിഎ’ (USMCA) സംബന്ധിച്ചുള്ള അനിശ്ചിതത്വം ഈ വർഷം പകുതിയോടെ നീങ്ങുന്നത് നിക്ഷേപകർക്ക് കനേഡിയൻ വിപണിയിൽ കൂടുതൽ ആത്മവിശ്വാസം നൽകുമെന്നും അവർ ചൂണ്ടിക്കാട്ടി. 2026-ലാണ് ഈ വ്യാപാര കരാർ പുനഃപരിശോധനയ്ക്ക് വിധേയമാകുന്നത്.
അതേസമയം, അമേരിക്കയിലേക്കുള്ള വെനസ്വേലൻ എണ്ണ കയറ്റുമതി വർധിക്കുന്നത് സമാനമായ ഗുണനിലവാരമുള്ള എണ്ണ ഉൽപ്പാദിപ്പിക്കുന്ന കനേഡിയൻ കമ്പനികളെ ബാധിക്കുമെന്ന് ചില നിക്ഷേപകർ ആശങ്ക പ്രകടിപ്പിക്കുന്നുണ്ട്. എന്നാൽ കാനഡയുടെ ക്രൂഡ് ഓയിൽ വിപണി സുരക്ഷിതമാണെന്നും വെനസ്വേലയിൽ നിന്നുള്ള ഉൽപ്പാദനം വർധിച്ചാലും കാനഡ മത്സരക്ഷമത നിലനിർത്തുമെന്നും പ്രധാനമന്ത്രി മാർക്ക് കാർണി വ്യക്തമാക്കി. രാജ്യത്തിന്റെ ഉൽപ്പാദനക്ഷമതയും അടിസ്ഥാന സൗകര്യങ്ങളും വർധിപ്പിക്കാനായി വലിയ തുക ചെലവഴിക്കുമെന്നും അദ്ദേഹം അറിയിച്ചു.
പലിശ നിരക്കുകളുടെ കാര്യത്തിൽ അമേരിക്കൻ ഫെഡറൽ റിസർവിൽ നിന്ന് വ്യത്യസ്തമായ നിലപാടാണ് ബാങ്ക് ഓഫ് കാനഡ സ്വീകരിക്കുന്നത്. നിലവിൽ ബാങ്ക് ഓഫ് കാനഡയുടെ പലിശ നിരക്ക് മൂന്ന് വർഷത്തെ ഏറ്റവും താഴ്ന്ന നിലയായ 2.25 ശതമാനത്തിലാണ്. ഫെഡറൽ റിസർവ് നിരക്കുകൾ കുറയ്ക്കുമ്പോൾ, കാനഡയിലെ കേന്ദ്ര ബാങ്ക് 2026 അവസാനത്തോടെ പലിശ നിരക്കുകൾ വീണ്ടും വർധിപ്പിക്കാൻ (Tightening) 50 ശതമാനത്തോളം സാധ്യതയുണ്ടെന്നാണ് വിപണി നിരീക്ഷകരുടെ കണക്കുകൂട്ടൽ.
canadian-dollar-forecasts-grow-more-bullish-on-trade-pact-hopes
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
