ഒട്ടാവ: കാനഡയിലെ കായിക ലോകത്തെ കണ്ണീരിലാഴ്ത്തിയ 2018-ലെ ഹംബോൾട്ട് ബ്രോങ്കോസ് ബസ് അപകടക്കേസിലെ പ്രതിയും ഇന്ത്യൻ വംശജനുമായ ജസ്കിരത് സിംഗ് സിദ്ധുവിനെ നാടുകടത്താനുള്ള നീക്കം കാനഡ കോടതി തടഞ്ഞു. വരുന്ന തിങ്കളാഴ്ച ഇന്ത്യയിലേക്ക് നാടുകടത്താനിരിക്കെയാണ് ജസ്റ്റിസ് ജോസെലിൻ ഗാഗ്നെ അടിയന്തര സ്റ്റേ അനുവദിച്ചത്. സിദ്ധു സമർപ്പിച്ച നിയമപരമായ വെല്ലുവിളികൾ കോടതി പരിശോധിക്കുന്നതുവരെ നടപടികൾ നിർത്തിവെക്കാനാണ് ഉത്തരവ്.
സസ്കാച്ചവാനിൽ വെച്ച് സിദ്ധു ഓടിച്ച ട്രക്ക് ജൂനിയർ ഹോക്കി ടീം സഞ്ചരിച്ചിരുന്ന ബസിലിടിച്ച് 16 പേർ മരിക്കുകയും 13 പേർക്ക് പരിക്കേൽക്കുകയും ചെയ്ത സംഭവത്തിലാണ് ശിക്ഷിക്കപ്പെട്ടത്. അപകടകരമായി വണ്ടി ഓടിച്ച് മരണത്തിന് കാരണമായതിന് എട്ട് വർഷം തടവ് ശിക്ഷ അനുഭവിച്ച സിദ്ധുവിന് പിന്നീട് പരോൾ ലഭിച്ചിരുന്നു. എന്നാൽ കാനഡയിലെ നിയമപ്രകാരം ഗുരുതര കുറ്റകൃത്യങ്ങളിൽ ഏർപ്പെടുന്ന വിദേശ പൗരന്മാരെ നാടുകടത്തണമെന്ന ഇമിഗ്രേഷൻ ബോർഡിന്റെ ഉത്തരവിനെ തുടർന്നാണ് നടപടികൾ ആരംഭിച്ചത്.
മാനുഷിക പരിഗണനകൾ നൽകി കാനഡയിൽ തുടരാൻ അനുവദിക്കണമെന്നാണ് സിദ്ധുവിന്റെ അഭിഭാഷകർ കോടതിയിൽ വാദിക്കുന്നത്. സിദ്ധുവിന്റെ മുൻകാല റെക്കോർഡുകളും അപകടത്തിൽ അദ്ദേഹം പ്രകടിപ്പിച്ച പശ്ചാത്താപവും അധികൃതർ പരിഗണിച്ചില്ലെന്ന് പ്രതിഭാഗം ആരോപിക്കുന്നു. അതേസമയം ഇരകളുടെ കുടുംബങ്ങൾ സിദ്ധുവിനെ എത്രയും വേഗം നാടുകടത്തണമെന്ന നിലപാടിൽ ഉറച്ചുനിൽക്കുകയാണ്. ഇതോടെ ഈ കേസ് വീണ്ടും കാനഡയിൽ വലിയ ചർച്ചകൾക്ക് വഴിതുറന്നിരിക്കുകയാണ്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Canadian court pauses deportation of Indian-origin driver Jaskirat Singh Sidhu
