ഒന്റാരിയോ: ആറുമാസത്തെ സന്ദർശക വിസയിൽ പേരക്കുട്ടിയെ കാണാനായി കാനഡയിലെത്തിയ 51 വയസ്സുകാരനായ ഇന്ത്യൻ പൗരന് ഒന്റാരിയോ കോടതിയുടെ കനത്ത ശിക്ഷ. ഹൈസ്കൂൾ വിദ്യാർഥിനികളെ ക്രിമിനൽ സ്വഭാവത്തോടെ ശല്യം ചെയ്ത കേസിൽ കുറ്റക്കാരനെന്ന് കണ്ടെത്തിയ ജഗ്ജിത് സിംഗിനെ രാജ്യത്തുനിന്ന് ഉടൻ നാടുകടത്താൻ ഉത്തരവിട്ടു. അതോടൊപ്പം, സിംഗിന് ഇനി ഒരിക്കലും കാനഡയിലേക്ക് പ്രവേശിക്കാൻ സാധിക്കാത്ത രീതിയിൽ സ്ഥിരം വിലക്കും ഏർപ്പെടുത്തിയിട്ടുണ്ട്. ഈ സംഭവം കാനഡയിലെ ഇന്ത്യൻ സമൂഹത്തിന് നാണക്കേടുണ്ടാക്കിയതായാണ് റിപ്പോർട്ടുകൾ.
കഴിഞ്ഞ ജൂലൈ മാസത്തിലാണ് ജഗ്ജിത് സിംഗ് കാനഡയിലെ ഒന്റാരിയോയിൽ എത്തിയത്. എന്നാൽ, സെപ്റ്റംബർ 8 നും 11 നും ഇടയിൽ സാർണിയ പ്രദേശത്തെ ഒരു ഹൈസ്കൂളിന് പുറത്തുള്ള കുട്ടികൾ ഒത്തുകൂടുന്ന ഇടങ്ങളിൽ ഇയാൾ പതിവായി എത്താൻ തുടങ്ങി. യുവതികളായ വിദ്യാർഥിനികളോട് ലൈംഗിക താൽപര്യത്തോടെ സംസാരിക്കാൻ ശ്രമിച്ചു. മയക്കുമരുന്നിനെക്കുറിച്ചും മദ്യത്തെക്കുറിച്ചും സംസാരിക്കുകയും അവരെ പ്രലോഭിപ്പിക്കാൻ ശ്രമിക്കുകയും ചെയ്തു. പെൺകുട്ടികളോടൊപ്പം ഫോട്ടോയെടുക്കാൻ നിർബന്ധിച്ചതായും പോലീസ് റിപ്പോർട്ടിൽ പറയുന്നു. പെൺകുട്ടികളിലൊരാൾ നൽകിയ പരാതിയെത്തുടർന്ന് സെപ്റ്റംബർ 16-ന് പോലീസ് ഇയാളെ അറസ്റ്റ് ചെയ്യുകയായിരുന്നു.
ആദ്യം ലൈംഗിക അതിക്രമം ഉൾപ്പെടെയുള്ള വകുപ്പുകൾ ചുമത്തിയാണ് പോലീസ് കേസെടുത്തതെങ്കിലും, സെപ്റ്റംബർ 19-ന് കോടതിയിൽ ഹാജരാക്കിയപ്പോൾ പ്രതിയായ ജഗ്ജിത് സിംഗ് ക്രിമിനൽ ഹരാസ്മെൻ്റ് എന്ന കുറഞ്ഞ കുറ്റം സമ്മതിച്ചു. എന്നാൽ കേസ് പരിഗണിച്ച ജസ്റ്റിസ് ക്രിസ്റ്റ ലിൻ ലെസ്സിൻസ്കി പ്രതിക്ക് പരമാവധി ശിക്ഷ നൽകാൻ തീരുമാനിച്ചു. “ഈ ഹൈസ്കൂളിന്റെ പരിസരത്ത് വരാൻ നിങ്ങൾക്ക് യാതൊരു അവകാശവുമില്ല,” എന്ന് ചൂണ്ടിക്കാട്ടിയ ജസ്റ്റിസ്, ഇത്തരത്തിലുള്ള പെരുമാറ്റം ഒരു കാരണവശാലും അംഗീകരിക്കില്ലെന്ന് വ്യക്തമാക്കി.
ഡിസംബർ 30-ന് ഇന്ത്യയിലേക്ക് മടങ്ങാനുള്ള ടിക്കറ്റ് സിംഗിനുണ്ടായിരുന്നെങ്കിലും, കോടതിയുടെ ഉത്തരവ് പ്രകാരം ഇയാളെ ഉടൻ നാടുകടത്തും. കൂടാതെ, മൂന്ന് വർഷത്തെ പ്രൊബേഷൻ കാലയളവും കോടതി വിധിച്ചു. ഈ കാലയളവിൽ, ഉപദ്രവിക്കപ്പെട്ട പെൺകുട്ടികളുമായി സംസാരിക്കുന്നതിനോ, അവരുടെ പരിസരത്ത് പോകുന്നതിനോ സിംഗിന് പൂർണ വിലക്കുണ്ട്.
പേരക്കുട്ടിയൊഴികെ, 16 വയസ്സിന് താഴെയുള്ള ആരുമായും ബന്ധപ്പെടാൻ പാടില്ല. പൊതുഇടങ്ങളിൽ പ്രവേശിക്കുന്നതിനും ഇയാൾക്ക് നിയന്ത്രണങ്ങളുണ്ട്. ജഗ്ജിത് സിംഗിന് കാനഡയിലേക്കുള്ള സ്ഥിരം പ്രവേശന വിലക്ക് കൂടി വന്നതോടെ പേരക്കുട്ടിയെ കാണാനുള്ള ആഗ്രഹവുമായാണ് കാനഡയിലെത്തിയ ഇദ്ദേഹത്തിന് കനത്ത തിരിച്ചടിയായി ഈ കേസ് മാറിയിരിക്കുന്നത്.
canadian-court-deports-51yo-indian-man-harassing-students-lifetime-ban
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
