ഒട്ടാവ: ആർട്ടിഫിഷ്യൽ ഇന്റലിജൻസ് അധിഷ്ഠിത ചാറ്റ്ബോട്ടായ ചാറ്റ്ജിപിടിയുടെ നിർമ്മാതാക്കളായ ‘ഓപ്പൺ എഐ’ കാനഡയിലെ സ്വകാര്യതാ നിയമങ്ങൾ ലംഘിച്ചതായി കണ്ടെത്തൽ. ഫെഡറൽ പ്രൈവസി കമ്മീഷണർ ഫിലിപ്പ് ഡുഫ്രെസ്നും ബ്രിട്ടീഷ് കൊളംബിയ, ആൽബർട്ട, ക്യൂബെക്ക് പ്രവിശ്യകളിലെ അധികൃതരും സംയുക്തമായി നടത്തിയ അന്വേഷണത്തിലാണ് ഞെട്ടിക്കുന്ന വിവരങ്ങൾ പുറത്തുവന്നത്.
ചാറ്റ്ജിപിടിയെ പരിശീലിപ്പിക്കുന്നതിനായി (Training) പൊതുവിടങ്ങളിൽ നിന്ന് വിവരങ്ങൾ ശേഖരിച്ചപ്പോൾ ആവശ്യമായ മുൻകരുതലുകൾ സ്വീകരിച്ചില്ലെന്ന് റിപ്പോർട്ട് ചൂണ്ടിക്കാട്ടുന്നു. സോഷ്യൽ മീഡിയകൾ, ചർച്ചാ വേദികൾ തുടങ്ങിയ വെബ്സൈറ്റുകളിൽ നിന്ന് വ്യക്തിഗത വിവരങ്ങൾ ഉൾപ്പെടെയാണ് കമ്പനി ശേഖരിച്ചത്. ഇത്തരത്തിൽ വിവരങ്ങൾ സ്വീകരിക്കുന്നതിനെക്കുറിച്ച് ഉപയോക്താക്കൾക്ക് വ്യക്തമായ വിശദീകരണം നൽകുന്നതിൽ ഓപ്പൺ എഐ പരാജയപ്പെട്ടതായും അന്വേഷണ ഉദ്യോഗസ്ഥർ ബുധനാഴ്ച പുറത്തുവിട്ട റിപ്പോർട്ടിൽ പറയുന്നു.
വ്യക്തികളുടെ ആരോഗ്യസ്ഥിതി, രാഷ്ട്രീയ നിലപാടുകൾ എന്നിവയ്ക്ക് പുറമെ കുട്ടികളെ സംബന്ധിച്ച വിവരങ്ങളും കമ്പനി ശേഖരിച്ച ഡാറ്റയിൽ ഉൾപ്പെട്ടിട്ടുണ്ടാകാമെന്ന് സ്വകാര്യതാ വാച്ച്ഡോഗുകൾ മുന്നറിയിപ്പ് നൽകുന്നു. മുൻകൂട്ടി കണ്ടിരുന്ന സുരക്ഷാ പ്രശ്നങ്ങൾ പരിഹരിക്കാതെയാണ് കമ്പനി ചാറ്റ്ജിപിടി പുറത്തിറക്കിയത്. ഇത് കനേഡിയൻ പൗരന്മാർക്കിടയിൽ വിവേചനത്തിനും സുരക്ഷാ ഭീഷണികൾക്കും കാരണമായേക്കാമെന്ന് ഫെഡറൽ പ്രൈവസി കമ്മീഷണർ ഫിലിപ്പ് ഡുഫ്രെസ്ൻ വാർത്താ സമ്മേളനത്തിൽ വ്യക്തമാക്കി.
ചാറ്റ്ജിപിടി നൽകുന്ന മറുപടികളിലെ കൃത്യതയില്ലായ്മയെക്കുറിച്ച് മതിയായ മുന്നറിയിപ്പ് നൽകുന്നതിൽ കമ്പനി വീഴ്ച വരുത്തി. വ്യക്തിഗത വിവരങ്ങൾ തിരുത്താനോ നീക്കം ചെയ്യാനോ ഉള്ള സംവിധാനങ്ങൾ ലളിതമല്ലെന്നും റിപ്പോർട്ടിലുണ്ട്. എന്നാൽ, അന്വേഷണത്തെത്തുടർന്ന് സ്വകാര്യതാ സംരക്ഷണം ഉറപ്പാക്കാൻ ആവശ്യമായ നടപടികൾ സ്വീകരിക്കാമെന്ന് ഓപ്പൺ എഐ സമ്മതിച്ചിട്ടുണ്ട്. പുതിയ മോഡലുകളിൽ വ്യക്തിഗത വിവരങ്ങളുടെ ഉപയോഗം പരിമിതപ്പെടുത്തുമെന്നും കമ്പനി അറിയിച്ചു.
Canadian citizens' privacy violated; Investigation report against Open AI
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
