ഒട്ടാവ: പുതിയതായി വാങ്ങുന്ന എഫ്-35 സ്റ്റെൽത്ത് യുദ്ധവിമാനങ്ങൾ ഉൾപ്പെടെയുള്ള അത്യാധുനിക പ്രതിരോധ സംവിധാനങ്ങളുടെ സംരക്ഷണത്തിനായി 1,200-ലധികം സുരക്ഷാ ഉദ്യോഗസ്ഥരെ നിയമിക്കാൻ റോയൽ കനേഡിയൻ എയർഫോഴ്സ് (RCAF) ഒരുങ്ങുന്നു. അടുത്ത അഞ്ച് വർഷത്തിനുള്ളിൽ രാജ്യത്തെ വിവിധ വ്യോമതാവളങ്ങളിൽ ഘട്ടംഘട്ടമായി നിയമനം നടത്താനാണ് പദ്ധതി. വിവരവകാശ നിയമപ്രകാരം ലഭിച്ച ആഭ്യന്തര രേഖകളിലാണ് വ്യോമസേനയുടെ ഈ പുതിയ സുരക്ഷാ പദ്ധതിയെക്കുറിച്ചുള്ള വിവരങ്ങളുള്ളത്.
രേഖകൾ പ്രകാരം 2028-ഓടെ 199 സുരക്ഷാ ഉദ്യോഗസ്ഥരെയും, 2029-ൽ ഇത് 747 ആയും ഉയർത്താനാണ് പ്രാഥമിക തീരുമാനം. 2030 ആകുമ്പോഴേക്കും ആകെ സുരക്ഷാ സേനയുടെ എണ്ണം 1,227 ആയി വർധിപ്പിക്കും. സെൻസിറ്റീവ് ഡാറ്റകളും പ്രവർത്തന വിവരങ്ങളും കൈകാര്യം ചെയ്യുന്ന അത്യാധുനിക വിമാനങ്ങൾ സേനയുടെ ഭാഗമാകുന്നതോടെ സുരക്ഷാ ക്രമീകരണങ്ങൾ കർശനമാക്കേണ്ടത് അത്യാവശ്യമാണെന്ന് വ്യോമസേനാ അംഗങ്ങൾ അറിയിച്ചു.
എഫ്-35 സ്റ്റെൽത്ത് ഫൈറ്റർ വിമാനങ്ങൾ കൂടാതെ സിസി-330 ഹസ്കി, പി-8എ പോസിഡോൺ പട്രോളിംഗ് വിമാനം, എംക്യു-9ബി സ്കൈഗാർഡിയൻ ഡ്രോണുകൾ എന്നിവയുൾപ്പെടെ 140 പുതിയ വിമാനങ്ങളാണ് കാനഡയുടെ വ്യോമസേനയുടെ ഭാഗമാകുന്നത്. എഫ്-35 വിമാനങ്ങൾ 2028-ൽ എത്തുന്നതോടെ ഫൈറ്റർ ബേസുകളിലാകും ആദ്യഘട്ടത്തിൽ സുരക്ഷാ ഉദ്യോഗസ്ഥരെ വിന്യസിക്കുക. അത്യാധുനിക സാങ്കേതികവിദ്യകളും രഹസ്യവിവരങ്ങളും ചോരാതിരിക്കാൻ സഖ്യരാജ്യങ്ങൾ പിന്തുടരുന്ന സുരക്ഷാ രീതികൾ പഠിച്ചുവരികയാണെന്ന് ആർസിഎഎഫ് കമാൻഡർ ലെഫ്റ്റനന്റ് ജനറൽ ജാമി സ്പൈസർ-ബ്ലാഞ്ചെറ്റ് വ്യക്തമാക്കി.
നിലവിൽ 15,000 പേരുള്ള കനേഡിയൻ വ്യോമസേനയിൽ അടുത്ത 20 വർഷത്തിനുള്ളിൽ 5,400 പേരെ കൂടി പുതുതായി നിയമിക്കാനാണ് ആലോചിക്കുന്നത്. വിമാനങ്ങളുടെ സംരക്ഷണത്തിന് പുറമെ മിഷൻ പ്ലാനർമാർ, ഇന്റലിജൻസ് ഉദ്യോഗസ്ഥർ, ടെക്നീഷ്യൻമാർ എന്നിവരെയും സേനയിൽ ഉൾപ്പെടുത്തും. വിമാനങ്ങൾ സൂക്ഷിക്കാനായി കോൾഡ് ലേക്ക്, ബാഗോട്ട്വിൽ എന്നിവിടങ്ങളിൽ നിർമ്മിക്കുന്ന പുതിയ സ്ക്വാഡ്രൻ ഫെസിലിറ്റികളിൽ അതീവ സുരക്ഷാ സംവിധാനങ്ങളാകും ഏർപ്പെടുത്തുകയെന്ന് പ്രതിരോധ മന്ത്രാലയം അറിയിച്ചു.
കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt
Canadian Air Force to deploy 1,200 troops to protect F-35 fighter jets
