കാൽഗറി: ചരിത്രത്തിൽ ഇടംപിടിച്ച് കാനഡയുടെ ആദ്യ LNG കണ്ടെയ്നർ പസഫിക് തീരത്ത് നിന്ന് ഏഷ്യയിലേക്ക് യാത്ര ആരംഭിച്ചു.ഷെൽ കമ്പനിയുടെ നേതൃത്വത്തിലുള്ള എൽ.എൻ.ജി. കാനഡ ടെർമിനലിന്റെ വക്താവാണ് തിങ്കളാഴ്ച ഈ വിവരം അറിയിച്ചത്. ബ്രിട്ടീഷ് കൊളംബിയയിലെ കിറ്റിമാറ്റിലുള്ള ഈ കേന്ദ്രം ഉത്പാദനം ആരംഭിച്ചുവെന്ന് സ്ഥിരീകരിച്ച് ഒരാഴ്ച പിന്നിടുമ്പോഴാണ് രാജ്യത്തെ ആദ്യത്തെ വലിയ തോതിലുള്ള വാണിജ്യ എൽ.എൻ.ജി. കയറ്റുമതിക്ക് തുടക്കമായത്.
‘ഗാസ്ലോഗ് ഗ്ലാസ്ഗോ’ എന്ന ടാങ്കറിലാണ് ഈ ചരക്ക് നിറച്ചത്. ഇതോടെ കാനഡയുടെ ആദ്യത്തെ വലിയ തോതിലുള്ള എൽ.എൻ.ജി. കയറ്റുമതി പദ്ധതിക്ക് ഔദ്യോഗിക തുടക്കമായി. ഷെൽ പിഎൽസി, പെട്രോണാസ്, പെട്രോചൈന, മിത്സുബിഷി കോർപ്പറേഷൻ, കൊഗാസ് എന്നിവർ പങ്കാളികളായ ഏകദേശം 40 ബില്യൺ കനേഡിയൻ ഡോളർ (ഏകദേശം 29.4 ബില്യൺ യു.എസ്. ഡോളർ) ചെലവ് വരുന്ന ഈ പദ്ധതി, കനേഡിയൻ ചരിത്രത്തിലെ ഏറ്റവും വലിയ സ്വകാര്യമേഖലാ നിക്ഷേപം കൂടിയാണ്. പൂർണ്ണമായി പ്രവർത്തനക്ഷമമാകുമ്പോൾ, പ്രതിവർഷം 14 ദശലക്ഷം മെട്രിക് ടൺ എൽ.എൻ.ജി. കയറ്റുമതി ചെയ്യാനുള്ള ശേഷി ഈ ടെർമിനലിനുണ്ടാകും.
അമേരിക്കയുമായുള്ള വർദ്ധിച്ചുവരുന്ന വ്യാപാര തർക്കങ്ങൾക്കിടയിൽ, ഊർജ്ജ കയറ്റുമതി വിപണികൾ വൈവിധ്യവത്കരിക്കാനുള്ള കാനഡയുടെ ശ്രമങ്ങൾക്ക് ഇത് വലിയ പ്രചോദനമാകുമെന്ന് എൽ.എൻ.ജി. കാനഡ സി.ഇ.ഒ. ക്രിസ് കൂപ്പർ ഒരു അഭിമുഖത്തിൽ പറഞ്ഞു. “ഇത് ഇപ്പോൾ കാനഡക്ക് തീർച്ചയായും ആവശ്യമായ ഒന്നാണ്,” അദ്ദേഹം കൂട്ടിച്ചേർത്തു. ലോകത്തിലെ അഞ്ചാമത്തെ വലിയ പ്രകൃതിവാതക ഉത്പാദകരാണെങ്കിലും, കാനഡയുടെ പ്രകൃതിവാതക കയറ്റുമതിയിൽ മിക്കവാറും മുഴുവനും ഇതുവരെ അമേരിക്കയിലേക്കായിരുന്നു.
വടക്കേ അമേരിക്കയിലെ ആദ്യത്തെ പ്രധാന എൽ.എൻ.ജി. സൗകര്യമാണിത്. പസഫിക് തീരത്തുള്ള സ്ഥാനം കാരണം, എൽ.എൻ.ജി. കാനഡയ്ക്ക് ഏഷ്യൻ വിപണിയിലേക്ക് നേരിട്ട് പ്രവേശനം സാധ്യമാണ്. ഇത് പനാമ കനാലിനെ ആശ്രയിക്കാതെ തന്നെ ചരക്ക് നീക്കാൻ സഹായിക്കുന്നത് വഴി, അമേരിക്കൻ ഗൾഫ് തീരത്തെ കയറ്റുമതിക്കാരെ അപേക്ഷിച്ച് ഭൂമിശാസ്ത്രപരമായതും ചെലവ് സംബന്ധിച്ചതുമായ മുൻതൂക്കം നൽകുന്നു. കോസ്റ്റൽ ഗ്യാസ്ലിങ്ക് പൈപ്പ്ലൈൻ വഴി ബ്രിട്ടീഷ് കൊളംബിയയിലെ ഷെയ്ൽ പാടങ്ങളിൽ നിന്ന് ലഭിക്കുന്ന കനേഡിയൻ പ്രകൃതിവാതകത്തിന്, അമേരിക്കൻ ഹെൻറി ഹബ് മാനദണ്ഡങ്ങളെക്കാൾ നിലവിൽ പകുതിയിൽ താഴെയാണ് വില. “കാനഡയിലെ പടിഞ്ഞാറൻ തീരത്തെ എൽ.എൻ.ജി., അമേരിക്കയിൽ വികസിപ്പിക്കുന്ന ഏത് ഉൽപ്പങ്ങളോടും മികച്ച രീതിയിൽ മത്സരിക്കും,” ജൂണിൽ കാൽഗറിയിൽ നടന്ന ഒരു സമ്മേളനത്തിൽ പെട്രോണാസ് കാനഡ സി.ഇ.ഒ. മാർക്ക് ഫിറ്റ്സ്ജെറാൾഡ് നിരീക്ഷിച്ചു.
2012-ൽ ആദ്യമായി നിർദ്ദേശിക്കപ്പെട്ട എൽ.എൻ.ജി. കാനഡ പദ്ധതിയുടെ ആരംഭം, ആഗോള എൽ.എൻ.ജി. വിപണിയിലേക്കുള്ള കാനഡയുടെ ദീർഘകാല കാത്തിരിപ്പിന് വിരാമമിടുന്നു. അമേരിക്കയിൽ ആദ്യമായി എൽ.എൻ.ജി. കയറ്റുമതി ആരംഭിച്ചതിന് ഏകദേശം പത്ത് വർഷത്തിന് ശേഷമാണ് കാനഡയുടെ ഈ കടന്നുവരവ്. അമേരിക്ക പിന്നീട് ലോകത്തിലെ ഏറ്റവും വലിയ എൽ.എൻ.ജി. കയറ്റുമതിക്കാരായി മാറിയിരുന്നു. സ്വന്തം വ്യവസായം വികസിപ്പിക്കുന്നതിൽ കാനഡയ്ക്ക് കാലതാമസം നേരിട്ടതായി പല കനേഡിയൻ ഊർജ്ജ മേഖലയിലുള്ളവരും അഭിപ്രായപ്പെട്ടിരുന്നു.ഈ പദ്ധതിയുടെ ശേഷി ഇരട്ടിയാക്കുന്നതിനുള്ള അന്തിമ നിക്ഷേപ തീരുമാനം അടുത്ത വർഷത്തോടെ കൈക്കൊള്ളാൻ ഷെല്ലും പങ്കാളികളും ശ്രമിച്ചുവരികയാണെന്ന് ഷെല്ലിന്റെ ഗ്യാസ് ബിസിനസ് മേധാവി സെഡ്രിക് ക്രെമേഴ്സ് പറഞ്ഞു.
