ഒട്ടാവ: കാനഡയുടെ സാമ്പത്തിക ഭാവിയും തൊഴിൽ ശക്തിയും കുടിയേറ്റക്കാരെ ആശ്രയിച്ചിരിക്കുമ്പോൾ, രാജ്യത്തെ ഞെട്ടിച്ച് ‘ബ്രെയിൻ ഡ്രെയിൻ’ (Brain Drain) വർദ്ധിക്കുന്നതായി റിപ്പോർട്ട്. ‘ദി ലീക്കി ബക്കറ്റ് 2025’ നടത്തിയ പുതിയ പഠനമാണ് ആശങ്കാജനകമായ ഈ വിവരങ്ങൾ പുറത്തുവിട്ടത്. കാനഡ വലിയ പ്രയത്നത്തിലൂടെ ആകർഷിക്കുന്ന അത്യധികം വിദ്യാസമ്പന്നരും വിദഗ്ദ്ധരുമായ കുടിയേറ്റക്കാർ (Highly Skilled Immigrants) രാജ്യം വിട്ടുപോകുന്ന നിരക്ക് കുത്തനെ ഉയരുകയാണ്. നിയമനം മാത്രമല്ല, നിലനിർത്തലാണ് (Retention) കാനഡ നേരിടുന്ന ഏറ്റവും വലിയ വെല്ലുവിളിയെന്ന് പഠനം അടിവരയിടുന്നു.
പ്രധാന കണ്ടെത്തലുകൾ
കാനഡയിൽ എത്തുന്ന കുടിയേറ്റക്കാരിൽ നാലിലൊരാൾ (One in five) 25 വർഷത്തിനുള്ളിൽ രാജ്യം വിടുന്നു. എങ്കിലും, ഈ പലായനം ഏറ്റവും കൂടുതൽ നടക്കുന്നത് കാനഡയിൽ എത്തിച്ചേരുന്ന ആദ്യത്തെ അഞ്ച് വർഷത്തിനുള്ളിലാണ്. ഉയർന്ന വിദ്യാഭ്യാസം നേടിയവരും ഉയർന്ന വൈദഗ്ധ്യമുള്ളവരും (TEER 0–3) മറ്റ് തൊഴിലാളികളെ അപേക്ഷിച്ച് രാജ്യം വിടാൻ സാധ്യത ഇരട്ടിയിലധികമാണ്. എഞ്ചിനീയറിംഗ്, ഐ.സി.ടി, ബിസിനസ്സ് മാനേജ്മെന്റ് തുടങ്ങിയ നിർണ്ണായക വളർച്ചാ മേഖലകളിൽ നിന്നാണ് കൂടുതൽ പേർ മടങ്ങുന്നത്.
വിദഗ്ദ്ധർ കാനഡ വിടാൻ 10 കാരണങ്ങൾ
വിദഗ്ദ്ധരായ കുടിയേറ്റക്കാർ രാജ്യം വിട്ടുപോകുന്നതിന് പഠനം കണ്ടെത്തിയ പ്രധാന കാരണങ്ങൾ ഇവയാണ്:
വിദേശ യോഗ്യതകൾക്ക് അംഗീകാരമില്ലായ്മ: ഡോക്ടർമാർ, എഞ്ചിനീയർമാർ, ആർക്കിടെക്റ്റുകൾ തുടങ്ങിയ പ്രൊഫഷണലുകൾക്ക് അവരുടെ വിദേശ യോഗ്യതകൾക്ക് കാനഡയിൽ അംഗീകാരം ലഭിക്കാനോ ലൈസൻസിംഗ് പൂർത്തിയാക്കാനോ വർഷങ്ങൾ എടുക്കുന്നത്.
യോഗ്യതയ്ക്കനുസരിച്ചുള്ള ജോലി ലഭിക്കാത്തത് (Underemployment): ഉയർന്ന യോഗ്യതയുണ്ടായിട്ടും കനേഡിയൻ പ്രവൃത്തി പരിചയം ഇല്ലാത്തതിന്റെ പേരിൽ കുറഞ്ഞ തസ്തികകളിൽ ജോലി ചെയ്യേണ്ടിവരുന്നത്.
വരുമാനം വർധിക്കാത്ത അവസ്ഥ (Income Stagnation): ഉയർന്ന വൈദഗ്ധ്യമുള്ളവർക്ക് പോലും ആദ്യ വർഷങ്ങളിൽ ശമ്പളം വർദ്ധിക്കാതിരിക്കുന്നത് ജീവിത നിലവാരത്തെ ബാധിക്കുന്നു.
രാജ്യം വിടുന്നതിന് മുൻപുള്ള തൊഴിലില്ലായ്മ: ഉയർന്ന വിദ്യാഭ്യാസമുള്ളവർക്കിടയിൽ, രാജ്യം വിടുന്നതിന് തൊട്ടുമുമ്പുള്ള തൊഴിലില്ലായ്മ പലായനത്തിനുള്ള പ്രധാന കാരണമാണ്.
ആഗോള തൊഴിൽ അവസരങ്ങൾ: എഞ്ചിനീയറിംഗ്, ഐ.ടി മേഖലകളിൽ കാനഡയേക്കാൾ ഉയർന്ന ശമ്പളവും വേഗത്തിലുള്ള ലൈസൻസിംഗും നൽകി അമേരിക്ക, യൂറോപ്പ്, യു.എ.ഇ തുടങ്ങിയ രാജ്യങ്ങൾ ആകർഷിക്കുന്നത്.
വികസ്വര മേഖലകളിലെ കുറഞ്ഞ നിലനിർത്തൽ: ഐ.സി.ടി, സോഫ്റ്റ്വെയർ ഡെവലപ്മെന്റ് പോലുള്ള ഉയർന്ന വളർച്ചാ മേഖലകളിൽ പോലും നിലനിർത്തൽ നിരക്ക് ദുർബലമാണ്.
വിദഗ്ദ്ധർക്ക് മതിയായ സെറ്റിൽമെന്റ് പിന്തുണയില്ല: നിലവിലുള്ള സർക്കാർ സഹായ പദ്ധതികൾ പൊതുവായ ആവശ്യങ്ങൾക്കായി രൂപകൽപ്പന ചെയ്തതാണ്, പ്രൊഫഷണൽ ലൈസൻസിംഗ് പോലുള്ള വിദഗ്ദ്ധരുടെ ആവശ്യങ്ങൾ പരിഗണിക്കുന്നില്ല.
ചെറിയ കമ്മ്യൂണിറ്റികളിലെ വെല്ലുവിളികൾ: ചെറിയ നഗരങ്ങളിൽ വ്യവസായ വൈവിധ്യമോ ജീവിത സൗകര്യങ്ങളോ കുറവായതിനാൽ കുടുംബങ്ങൾ പ്രധാന നഗരങ്ങളിലേക്ക് മാറാൻ നിർബന്ധിതരാകുന്നു.
ഉയർന്ന ജീവിതച്ചെലവ്: വരുമാനമില്ലായ്മയും തൊഴിലില്ലായ്മയും ഉള്ളപ്പോൾ, ഭവന, ശിശുപരിപാലന മേഖലകളിലെ ഉയർന്ന ചെലവ് കാനഡ വിടാൻ ഒരു കാരണമാകുന്നു.
ആദ്യ അഞ്ച് വർഷത്തിന്റെ പ്രാധാന്യം: ആദ്യ അഞ്ച് വർഷത്തിനുള്ളിൽ കരിയറിൽ പുരോഗതി നേടാൻ കഴിഞ്ഞില്ലെങ്കിൽ, ദീർഘകാലം കാനഡയിൽ തുടരാനുള്ള സാധ്യത കുറയുന്നു.
കുടിയേറ്റക്കാരുടെ എണ്ണം വർദ്ധിപ്പിക്കുന്നത് കൊണ്ട് മാത്രം കാനഡയുടെ സാമ്പത്തിക ലക്ഷ്യങ്ങൾ കൈവരിക്കാനാവില്ലെന്നും, മികച്ചവരെ ആകർഷിക്കുന്നതിനേക്കാൾ അവരെ നിലനിർത്താൻ (Retention) വേണ്ടി പുതിയ ദേശീയ തന്ത്രങ്ങൾ ആവിഷ്കരിക്കേണ്ടത് കാനഡയുടെ അടിയന്തര ആവശ്യമാണെന്നും റിപ്പോർട്ട് മുന്നറിയിപ്പ് നൽകുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Canada’s Brain Drain Is Surging Fast and Here Are the Top 10 Reasons
