ഒട്ടാവ: സെന്റ് പിയറി ആൻഡ് മിക്കെലോണിൽ നിന്ന് കപ്പൽ മാർഗ്ഗവും മറ്റ് ബോട്ടുകൾ വഴിയും കാനഡയിലേക്ക് പ്രവേശിക്കുന്നവർക്കുള്ള യാത്രാ മാനദണ്ഡങ്ങൾ കാനഡ സർക്കാർ കർശനമാക്കി. വിസ ആവശ്യമില്ലാത്ത ഭൂരിഭാഗം യാത്രക്കാർക്കും ഇനി മുതൽ കാനഡയിലേക്ക് കടൽമാർഗ്ഗം പ്രവേശിക്കാൻ ‘ഇലക്ട്രോണിക് ട്രാവൽ ഓതറൈസേഷൻ’ (eTA) നിർബന്ധമാക്കിയിട്ടുണ്ട്. ഫെറികൾ, വാണിജ്യ കപ്പലുകൾ, സ്വകാര്യ ബോട്ടുകൾ എന്നിവയിൽ എത്തുന്നവർക്കെല്ലാം ഈ പുതിയ നിയമം ബാധകമായിരിക്കും.
കാനഡയുടെ പ്രീ-അറൈവൽ സ്ക്രീനിംഗ് സംവിധാനങ്ങൾ മറികടന്ന് സെന്റ് പിയറി ആൻഡ് മിക്കെലോണിൽ നിന്നും ന്യൂഫൗണ്ട്ലാൻഡിലെ ഫോർച്യൂണിലേക്ക് ബോട്ട് മാർഗ്ഗം വിദേശികൾ അനധികൃതമായി കടക്കാൻ ശ്രമിക്കുന്നത് തടയാനാണ് ഈ അടിയന്തര നടപടിയെന്ന് സർക്കാർ പ്രസ്താവനയിൽ വ്യക്തമാക്കി. 2026 ജൂൺ 5, പുലർച്ചെ 1:00 മണി (EDT) മുതലാണ് പുതിയ നിയമം പ്രാബല്യത്തിൽ വന്നത്.
പുതിയ നിയമത്തിൽ ചില വിഭാഗങ്ങൾക്ക് കാനഡ സർക്കാർ ഇളവുകൾ പ്രഖ്യാപിച്ചിട്ടുണ്ട്. ക്രൂയിസ് കപ്പലുകളിൽ എത്തുന്ന യാത്രക്കാർക്കും വാണിജ്യ കപ്പലുകളിലോ മീൻപിടുത്ത ബോട്ടുകളിലോ ജോലി ചെയ്യുന്ന ജീവനക്കാർക്കും ഇനി മുതൽ eTA ആവശ്യമില്ല. കൂടാതെ യു.എസ് പൗരന്മാർ, യു.എസിലെ സ്ഥിരതാമസക്കാർ എന്നിവരെയും ഈ നിയമത്തിൽ നിന്ന് ഒഴിവാക്കിയിട്ടുണ്ട്. സെന്റ് പിയറി ആൻഡ് മിക്കെലോണിൽ സ്ഥിരതാമസമാക്കിയ ഫ്രഞ്ച് പൗരന്മാർ കാനഡയിലേക്ക് നേരിട്ട് യാത്ര ചെയ്യുകയാണെങ്കിലും eTA എടുക്കേണ്ടതില്ല.
സാധാരണയായി വിസയില്ലാതെ കാനഡയിലേക്ക് വിമാനമാർഗ്ഗം എത്തുന്ന വിദേശികൾക്ക് ആവശ്യമുള്ള യാത്രാനുമതിയാണ് eTA. ഓൺലൈൻ വഴി അപേക്ഷിക്കാവുന്ന ഇതിന്റെ കാലാവധി 5 വർഷം വരെയാണ്. നിലവിൽ വിസ ആവശ്യമുള്ള രാജ്യങ്ങളിൽ നിന്നുള്ള യാത്രക്കാരുടെ മുൻപത്തെ നിയമങ്ങളിൽ യാതൊരുവിധ മാറ്റവുമില്ലെന്നും അധികൃതർ അറിയിച്ചു.
Canada tightens entry requirements for sea arrival from Saint-Pierre-et-Miquelon
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
