ഇറാൻ തലസ്ഥാനമായ ടെഹ്റാനിലെ അടിസ്ഥാന സൗകര്യങ്ങൾ ലക്ഷ്യമിട്ട് ഇസ്രായേൽ സൈന്യം വ്യാഴാഴ്ച പുലർച്ചെ വൻതോതിലുള്ള വ്യോമാക്രമണം ആരംഭിച്ചു. നഗരത്തിന്റെ പടിഞ്ഞാറൻ മേഖലയിലും കാരാജ് ഭാഗത്തും ശക്തമായ സ്ഫോടനങ്ങൾ ഉണ്ടായതായി ദൃക്സാക്ഷികൾ അറിയിച്ചു. ഇറാനിലെ 174 നഗരങ്ങളിലായി ഇതുവരെ 1,332 ആക്രമണങ്ങൾ രേഖപ്പെടുത്തിയതായും നിരവധി ജനവാസ മേഖലകൾ തകർക്കപ്പെട്ടതായും ഇറാൻ റെഡ് ക്രസന്റ് സൊസൈറ്റി വ്യക്തമാക്കി. ഇതിനിടെ, ടെഹ്റാനിലെ ഹിസ്ബുള്ള കമാൻഡ് സെന്ററുകൾ ലക്ഷ്യമിട്ടും ആക്രമണം നടത്തിയതായി ഇസ്രായേൽ സൈന്യം അവകാശപ്പെട്ടു.
ശ്രീലങ്കൻ തീരത്ത് ഇറാൻ ഫ്രിഗേറ്റായ ഐആർഐഎസ് ദേന യുഎസ് അന്തർവാഹിനി മുക്കിയതായി ഇറാൻ വിദേശകാര്യമന്ത്രി അബ്ബാസ് അരാഗ്ചി സ്ഥിരീകരിച്ചു. ഇന്ത്യൻ നാവികസേനയുടെ അതിഥിയായി എത്തിയ കപ്പലിനെ അന്താരാഷ്ട്ര സമുദ്രപരിധിയിൽ മുന്നറിയിപ്പില്ലാതെയാണ് ആക്രമിച്ചതെന്നും ഇതിന് അമേരിക്ക കടുത്ത വില നൽകേണ്ടി വരുമെന്നും അദ്ദേഹം മുന്നറിയിപ്പ് നൽകി. അതേസമയം, പേർഷ്യൻ ഗൾഫിൽ തങ്ങളുടെ ടാങ്കർ ഇറാൻ റവല്യൂഷണറി ഗാർഡ് ആക്രമിച്ചതായി അമേരിക്കയും ആരോപിച്ചു. ഇറാൻ ഇതുവരെ റഷ്യയോട് സൈനിക സഹായം ആവശ്യപ്പെട്ടിട്ടില്ലെന്ന് ക്രെംലിൻ വക്താവ് ദിമിത്രി പെസ്കോവ് വ്യക്തമാക്കി.
മേഖലയിൽ കുടുങ്ങിക്കിടക്കുന്ന വിദേശ പൗരന്മാരെ നാട്ടിലെത്തിക്കാൻ ഒമാൻ സർക്കാരും ഖത്തർ എയർവേയ്സും ചേർന്ന് പ്രത്യേക ‘റിലീഫ് ഫ്ലൈറ്റുകൾ’ ആരംഭിച്ചു. മസ്കറ്റ്, റിയാദ് എന്നിവിടങ്ങളിൽ നിന്ന് ലണ്ടൻ, ബെർലിൻ ഉൾപ്പെടെയുള്ള യൂറോപ്യൻ നഗരങ്ങളിലേക്കാണ് സർവീസുകൾ. ഓസ്ട്രേലിയയും സ്പെയിനും തങ്ങളുടെ പൗരന്മാരെ ഒഴിപ്പിക്കാൻ സൈനിക വിമാനങ്ങൾ വിന്യസിച്ചു. ദക്ഷിണ കൊറിയ തങ്ങളുടെ പൗരന്മാർക്ക് ഇറാൻ സന്ദർശിക്കുന്നതിന് വിലക്കേർപ്പെടുത്തുകയും നിലവിലുള്ളവരോട് ഉടൻ രാജ്യം വിടാൻ നിർദ്ദേശിക്കുകയും ചെയ്തു.
ഇറാനിയൻ ഷാഹെദ് ഡ്രോണുകളെ പ്രതിരോധിക്കാൻ ഉക്രെയ്നിന്റെ സാങ്കേതിക സഹായം അമേരിക്കയും അറബ് സഖ്യകക്ഷികളും തേടിയതായി ഉക്രേനിയൻ പ്രസിഡന്റ് വൊളോഡിമിർ സെലൻസ്കി വെളിപ്പെടുത്തി. യുഎഇ, ഖത്തർ, ബഹ്റൈൻ തുടങ്ങിയ രാജ്യങ്ങളിലെ നേതാക്കളുമായി അദ്ദേഹം ചർച്ച നടത്തി. അതേസമയം, തുർക്കിയെക്കും അസർബൈജാനും നേരെ ഇറാൻ നടത്തിയ മിസൈൽ-ഡ്രോൺ ആക്രമണങ്ങളെ ഖത്തർ ശക്തമായി അപലപിച്ചു. ഇറാൻ അതിർത്തിയിൽ അതീവ ജാഗ്രത തുടരുകയാണെന്നും എന്നാൽ അഭയാർത്ഥി പ്രവാഹം നിലവിൽ റിപ്പോർട്ട് ചെയ്തിട്ടില്ലെന്നും തുർക്കി പ്രതിരോധ മന്ത്രാലയം അറിയിച്ചു.
സംഘർഷം ലഘൂകരിക്കാൻ ചൈന പ്രത്യേക പ്രതിനിധിയെ പശ്ചിമേഷ്യയിലേക്ക് അയക്കുമെന്ന് വിദേശകാര്യ മന്ത്രാലയം അറിയിച്ചു. സൈനിക നടപടികൾ ഉടൻ അവസാനിപ്പിക്കണമെന്ന് ചൈനീസ് വിദേശകാര്യമന്ത്രി വാങ് യി വിവിധ രാജ്യങ്ങളോട് ഫോണിലൂടെ ആവശ്യപ്പെട്ടു. എന്നാൽ ഇറാനെതിരായ ആക്രമണം ലക്ഷ്യം കാണുന്നത് വരെ തുടരുമെന്ന സൂചനയാണ് ഇസ്രായേലും അമേരിക്കയും നൽകുന്നത്. സൈപ്രസിലെ ബ്രിട്ടീഷ് വ്യോമതാവളത്തിന് നേരെയുണ്ടായ ഡ്രോൺ ആക്രമണം ലബനനിൽ നിന്നാണ് തൊടുത്തതെന്ന് സൈപ്രസ് സ്ഥിരീകരിച്ചു. മേഖലയിലെ സംഘർഷം ഏഴാം ദിവസവും അതീവ ഗുരുതരമായി തുടരുകയാണ്.
